Xota̱ Roma̱ 13 - Xo̱jo̱n eén Néná1 Ngayeje xotaa̱ chjiéngá sku̱i̱e̱ndikón ngayeje xota̱ xi botixómaá, ngatꞌa̱ xá xí tjiín xota̱ xi botixómaá, Néná boá xí katsjaá, kó ngayeje xá xí tjiín, Néná boá xí íjñá. 2 Kó kuíni nga ngayeje xota̱ xi ku̱i̱ntꞌiéꞌénjiín xota̱ xi botixómaá, kondraa̱ ni xi íjñá Néná tikónnii̱, kó ngayeje xota̱ xi ku̱i̱ntꞌiéꞌénjiín, mongijérií yojoo̱. 3 Ngatꞌa̱ ngayeje xota̱ xi botixómaá jmí tsi síndo tsi̱ꞌe̱ nga ku̱i̱ndyiándikoón xota̱ xi ni xi nda ndyi̱tsꞌeèn, kuí xota̱ xi ndajín ndyi̱tsꞌèn xí ku̱i̱ndyiándikoón. A mejeén nga ko̱nda̱kínjín ji xota̱ xi botixómaá. Ja̱ ni xi nda ti̱ꞌin, kó xota̱ xi botixómaá nda sku̱i̱e̱e̱. 4 Ngatꞌa̱ Néná boá xi katsjaá xá xota̱ xi botixómaá tsi̱ꞌe̱ nga nda sa̱ꞌínjoo̱ ji. Ta̱nga tsi ni xi ndajín tiniꞌín, ti̱nda̱kin jí, ngatꞌa̱ jmí tsi ta̱ kjo̱a̱nda nga tjiín ngaꞌniú nga ka̱maa̱ ko̱tíjeé, ngatꞌa̱ mosoo̱ Néná boá, kó kuí boá xi ko̱tíjeé xota̱ xi ndajín ndyi̱tsꞌeèn. 5 Kó kuíni nga chjiéngá ko̱nda̱ꞌyáꞌée̱n xota̱ xi botixómaá, jmí tsi kjo̱a̱a̱ nga ko̱tíjéná, ta̱sá nda si̱ꞌán tsi̱ꞌe̱ nga nda tsꞌén kꞌuijñá kjo̱a̱kjíntakónná. 6 Kó kuíni nga ꞌbíchjítjéjnú ni xi foaꞌáchjítjé jáxaá, ngatꞌa̱ mosoo̱ Néná boá, kó ngatsjéni̱xtjin nga ndyi̱tsꞌèn kuí nii̱. 7 Te̱ꞌéjnúu̱ ni xi tsoboaá nga ngo nga ngo xota̱ xi botixómaá: Xi foaꞌáchjí to̱n xi machjítjé ja̱kꞌi̱e̱ ja̱ngaján ni, tꞌíchjíjnúu̱, cha̱ndikónjnú xota̱ xi botixómaá, xikótsꞌèn tsoboaá nga xcha̱ndikón nga ngo nga ngo. 8 Ngata̱ ngojín xi tsjienjnú tsi̱ꞌe̱, ta̱sá ja̱kꞌi̱e̱ ja̱ngaján tjó ti̱ꞌánjnú xingi̱jnú, ngatꞌa̱ xota̱ xi tjoó xotaa̱, tjítsꞌénkjátjosón ni xi tsó ngayeje kjo̱a̱kitii̱. 9 Ngatꞌa̱ bi̱ tsó kjo̱a̱kitii̱ Néná: “Ngata̱ niꞌíntꞌejíi̱n kjo̱a̱ chjóo̱n ko̱jo tsi xi̱ꞌíi̱n, ngata̱ xota̱jín niꞌínkꞌín ji, ngata̱ niꞌínchejéjín ji, ngata̱ ꞌbíndisejín ji, ngata̱ niꞌínmejénjín ji ni xi tjiín kje̱ꞌe xota̱”, kó tikón ngo kjo̱a̱botíxoma xi tsi si̱ꞌinkjatjosén ji, jè tiniꞌínkjatjosén xi ngasee̱ nga, kó kuí bí xi̱ꞌbi̱: “Tjó ti̱ꞌin xotaa̱ xikó má tsꞌén tjoó yojòo̱.” 10 Xi tjoó xotaa̱, kuí boá xi jmí tsi ni xi ndajín ndyi̱tsꞌènjo̱ xkjín, kó kuíni nga kjo̱a̱tjoó boá xi tsꞌénkjátjosón ngayeje kjo̱a̱kitii̱. 11 Bo̱a̱ ni̱ꞌánjnú ngatꞌa̱ jè ya ni̱xtjin xi timá, kó jè jachó chi̱bo̱a̱ nga je ku̱i̱stjíe̱njin kuí ńjñá xi tindyionjin nga nda ku̱i̱ndyión, ngatꞌa̱ jè ta̱ chiboa tsí chajaa̱ nga kꞌo̱xiéꞌáná Néná, ta̱bo̱a̱jiín ngasꞌe̱ nga kji̱e̱ kisꞌijinjínná. 12 Kuíni nga jè chi̱bo̱a̱a̱ nga ngiti̱ si̱ꞌanjé jàn, ngatꞌa̱ kjiꞌanga niꞌánjé xikónií tsi nínga jñoó mindyión, ni xi nda si̱ꞌán, xikoó tsi nínga tsijee̱n tindyión. Xín si̱ꞌankjaꞌá ngayeje nii̱ kjo̱a̱jñoó, kó kꞌuínda yojoná tsi̱ꞌe̱ nga ki̱a̱ ku̱i̱ṉtsomajin nínga tsijee̱n. 13 Kixi̱ ku̱i̱ṉtsomá, xikoó tsi nga ni̱xtjin timá, jmí tsi ta̱ kui xá ku̱i̱ndyión ñá nga xi̱ni̱e̱ nga sꞌi̱o̱, jmí tsi si̱ꞌanchꞌi̱ yojoná, jmí tsi chꞌo si̱ꞌáa̱n yojo ndikónná, jmí tsi kjo̱a̱tondo̱ si̱ꞌán, jmí tsi kjo̱a̱xchán ko̱ꞌna̱xié, ko̱jo jmí tsi kjo̱a̱ꞌontakón kꞌuiéná. 14 Ta̱sá chja̱ꞌángíi̱ Ndi̱a̱ná Jesukristoo̱ xikoó tsi kui xi ka̱ma ńjño xi xcha̱já, kó ngata̱ niꞌánkjatjosónjínjnú ni xi mejeén yojojnú nga si̱ꞌánjnú. |
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
Bible Society of Mexico