Xota̱ Roma̱ 12 - Xo̱jo̱n eén Néná

Bi̱ tsꞌén íni̱jmì Pabloo̱ kjo̱a̱a̱ ni xi chjiéngá sa̱ꞌín xota̱ xi je Néná chji̱a̱ni

¹ Kó kuíni ntsꞌie, ꞌniú míꞌájnúꞌun ta̱ngatꞌanii̱ kjo̱a̱ni̱ma̱takoón Néná, tsi̱ꞌe̱ nga kui si̱ꞌankꞌasꞌienjnúu̱ yojojnú xikoó ngo kjo̱a̱tjó xi tikón, ko̱jo xi tsjie, ko̱jo xi tsja ka̱maa̱ Néná. Kuí bí kjo̱a̱niꞌántsjà xi ja̱koxi̱ xi chjiéngá ko̱e̱ꞌé.

² Kó ngata̱ bo̱a̱jín tsꞌén mindyiónjnú xikótsꞌèn síndo xotaa̱ kui nga̱sondiee̱, ta̱sá te̱ꞌéndièjnúu̱ nga ka̱matja̱tsi̱e̱ya kjo̱a̱kjíntakónjnú, tsi̱ꞌe̱ nga bo̱a̱ tsꞌén xcha̱jnú ni xi nda, ko̱jo xi tsjakjiꞌi, ko̱jo xi ndo̱jò kjin kjin xi mejeén Néná.

³ Kuí nii̱ xi xian an kjo̱a̱a̱ ngayeje kjo̱a̱nda xi katseꞌéna, míꞌájnúꞌun nga jejín ꞌnaxié ngasejnú yojojnú, ta̱sá ti̱ juún ti̱ꞌankjó cha̱n cha̱njnú xikó kjiꞌi kjo̱a̱sꞌijin xi katsjájnú Néná nga ngo nga ngojnú.

⁴ Ngatꞌa̱ xikótsꞌèn nga yojoná kjín ndiè yaꞌanii̱, ta̱nga jmí tsi ngayejee̱ nga ta̱ ngo tsí ni xi tsꞌén.

⁵ Ti̱ bo̱a̱ ti̱ kjiꞌinii̱ ñá, achichí má ñá, kó ngayeje ñá ta̱ ngo tsí yojo kamájo̱ Kristoo̱, kó nga ngo nga ngo ñá ngo ndiè yojoo̱ Kristoo̱ má, kó ngo kichꞌiá xingi̱ nga ngo tsí yojo ndokjo̱a̱.

⁶ Kó ñá ja̱ kje̱ꞌe ja̱ kje̱ꞌe kjo̱a̱nda xi katseꞌéná, xikótsꞌèn kamámejeén Néná. Tsi tjín xí tjiín ngo kjo̱a̱nda tsi̱ꞌe̱ nga ka̱maa̱ ku̱i̱chji̱a̱ én xí Néná tsjaá, ngatsꞌénkjién kuí kjo̱a̱ndaa̱ xikó kjiꞌi kjo̱a̱sꞌijin xi tjiín.

⁷ Xi katseꞌeé kjo̱a̱nda tsi̱ꞌe̱ nga sa̱ꞌínseén xotaa̱, ngatsꞌénseén. Xi katseꞌeé kjo̱a̱nda tsi̱ꞌe̱ nga ko̱kóyá, ngatakoyá.

⁸ Xi katseꞌeé kjo̱a̱nda tsi̱ꞌe̱ nga tsja̱angaꞌniuú xotaa̱, nga tsja ngaꞌniuú. Xi katseꞌeé kjo̱a̱nda tsi̱ꞌe̱ nga tsja̱a to̱n, ngayeje kon nga ngatasikójo. Xi katseꞌeé kjo̱a̱nda tsi̱ꞌe̱ nga kꞌuijñátjón, kixi̱ nga tsꞌén kuí xaá. Xi katseꞌeé kjo̱a̱nda tsi̱ꞌe̱ nga ni̱ma̱ ka̱maa̱ xotaa̱, tsjangatamaa̱ nga sa̱ꞌín kui xaá.

⁹ Ti̱ꞌantjó ja̱koxi̱jnú xingi̱jnú. Ti̱ꞌanchꞌójnú ni xi ndajiín, kó ni xi ndaa̱ tangíntji̱ngíjnú.

¹⁰ Ja̱kꞌi̱e̱ ja̱ngaján ti̱ꞌantjójnú xingi̱jnú xikoó tsi ngo ntsꞌiejnú, ngatꞌa̱ ntsꞌié májnú, kó cha̱ndikón ngasejnú xingi̱jnú.

¹¹ Inda inda ti̱ꞌánjnú ngo ni, ngata̱ tsiꞌéjín májnú, ngatꞌié tsja tsjaa̱ a̱si̱énni̱xtjinjnú, nga si̱ꞌansenjnúu̱ Ndi̱a̱ná.

¹² Tsja ngatamajnú nga ndyi̱chiyájnú, ti̱ꞌanchíkjo̱a̱jnú ngayeje kjo̱a̱ni̱ma̱, kó ngatsjéni̱xtjin ndókjo̱a̱jnúu̱ Néná.

¹³ Tasíko̱jojnú ngayeje xota̱ tsjiee̱ Néná kjo̱a̱a̱ ni xi chjieén, kó tjó ti̱ꞌánjnú ngayeje xota̱ xi kjo̱chó ndiꞌajnú.

¹⁴ Ndókjo̱a̱tjéjnú xota̱ xi ndyi̱mongatji̱ngijnú, chji̱a̱ꞌajnúu̱ Néná nga sa̱ꞌínchikonñé, kó jmí tsi chꞌo kꞌuínjnúu̱.

¹⁵ Tsja ngatamajnú tsi tjín xí tsja tjiín, kó chaꞌájo̱jnú tsi tjín xí ndyi̱kjandà.

¹⁶ Tsjatsꞌèn ti̱ndyiónjnú nga ngo nga ngojnú, ngata̱ jejín ꞌna̱xiéjnú yojojnú, ta̱sá ngatamani̱ma̱jnú xota̱ xi ni̱ma̱. Ngata̱ bo̱a̱jín ꞌmíjnú nga jún xi tjín ngasejnú kjo̱a̱kjíntakón.

¹⁷ Ngata̱ chꞌójín niꞌánjo̱jnú xota̱ xi ndajín katsꞌénjo̱jnú, ngatsjéni̱xtjin nda ti̱ꞌánjnú ngindyi̱ko̱n ngayeje xotaa̱.

¹⁸ Tsi jún xi ka̱majnú, xió ti̱ndyionjo̱jnú ngayeje xotaa̱.

¹⁹ Jún ndí ntsꞌie xi tjóna, ngata̱ niꞌánngojojínjnú ngo ni, ta̱sá ngi̱ya tsja Néná tꞌíjñájnú xi ndajín sa̱ꞌínjo̱jnú, ngatꞌa̱ jè kjitꞌa xo̱jo̱n eén Néná nínga bi̱ tsoó: “Án xí sa̱ꞌingojo an, án xí tsjàa̱ chjií: Tsó Ndi̱a̱ná.”

²⁰ Kó ti̱ bi̱ tsó nga “tsi bojoó kondràa̱, te̱ꞌée̱ nichinie, kó tsi xíndaá, te̱ꞌée̱ ni xi kꞌuí, ngatꞌa̱ tsi bo̱a̱ si̱ꞌin ji ngaskande bojójin ma si̱ꞌin ji kje̱n.”

²¹ Ngata̱ boeꞌéndièjín ji nga sa̱ꞌiín ni xi ndajiín, ta̱sá ni xi nda ti̱ꞌin ji, tsi̱ꞌe̱ nga kui ni xi ndaa̱, sa̱ꞌiín ni xi ndajiín.