Xota̱ Roma̱ 11 - Xo̱jo̱n eén Néná

Bi̱ tsꞌén íni̱jmì Pabloo̱ kjo̱a̱a̱ xota̱ Israee̱l xi tsꞌangii̱

¹ Jún ntsꞌie, bi̱ xian an: A katsꞌénchꞌó Néná xota̱ na̱xi̱ńdaá. ¡Jmí! Ngatꞌa̱ an ti̱ xota̱ Israee̱l án, tji̱e̱e̱ Abraa̱n, xtín xota̱ xi chji̱a̱ni Benjaa̱.

² Néná katsꞌénchꞌójín xota̱ na̱xi̱ńdaá, kui xi ndeskande ngasꞌe̱ nga kamábe. Axa̱ yàjínjnú xi ni tsó xo̱jo̱n eén Néná kjo̱a̱a̱ Eliyaa̱, kjiꞌanga yíngítaꞌin xota̱ Israee̱l ngindyi̱ko̱n Néná, bi̱ katsó:

³ “Ji Ndi̱a̱, xota̱ chji̱ni̱e̱ꞌée̱n je kiniꞌánkꞌién, kó je katsꞌénkjatsón ṉchandikóo̱n, kó an je kisꞌijña so̱bo̱a̱ an, kó mejeén nga sa̱ꞌínkꞌiénna an nga”.

⁴ Ta̱nga, kó katsoó Néná. “Je tikóntꞌaxínna yito mi̱ jáxíꞌín xi kji̱e̱ bosiéntꞌajiíntikoó ne Baa̱l.”

⁵ Kó kuíni nga kui ni̱xtjin xi̱ꞌbi̱, je síndo chiboa xota̱ xi katjoꞌójin ta̱ngatꞌanii̱ kjo̱a̱ndaa̱ Néná.

⁶ Kó kjo̱a̱a̱ kjo̱a̱ndaa̱ Néná boá, jmí tsi kjo̱a̱a̱ ni xi katsꞌén, ngatꞌa̱ tsi kje̱ꞌe tsꞌén kjo̱a̱ndaa̱, ta̱ kjo̱a̱ndajín bo̱a̱. Kó tsi kjo̱a̱a̱ ni xi niꞌán, kjo̱a̱ndajín bo̱a̱, tsi kje̱ꞌe tsꞌén, ni xi niꞌaán, ni xi niꞌánjín bo̱a̱.

⁷ Ja̱, mí ni tsobo̱a̱. Ni xi tsangase xota̱ na̱xi̱ńdá xí chji̱a̱ni Israee̱l, kasakojiín, ta̱nga xota̱ xi je jaꞌájin Néná jè kasakoo̱, kó xota̱ xi ngasee̱ xota̱ xi tajá ini̱ma̱ kamá.

⁸ Xikó tsꞌén kjitꞌa xo̱jo̱n eén Néná nínga bi̱ tsoó: “Néná katsjaá kui xotaa̱ ngo kjo̱a̱kjíntakón xi jñó, katsjaá nga si̱chjá ndyi̱ko̱n, tsi̱ꞌe̱ nga ka̱májiín sku̱i̱e̱, nga si̱chjá tji̱bo̱a̱nijon, tsi̱ꞌe̱ nga ka̱májiín ku̱i̱ntꞌiè, kó ta̱kó bo̱a̱ tsꞌén kꞌuíndo ngaskande ngotꞌe̱.”

⁹ Kó bi̱ katsó Ndabii̱: Chja̱ya̱ ko̱jo nda̱ꞌya ngatama sꞌueé kui xotaa̱. Ngatixó, kó ngatama jeé.

¹⁰ Ngasichjá ndyi̱ko̱n kó ngatama ti̱ka̱. Kó ngatsjéni̱xtjin ngatindiyá ńdayìtsꞌe̱n.

Bi̱ tsꞌén íni̱jmì Pabloo̱ kjo̱a̱a̱ nga jatjoꞌa xota̱ xi jundío̱jín

¹¹ Kuíni nga bi̱ xian an: A kastingí xota̱ Israee̱l nga ixó tsi̱ꞌe̱ nga ngiti̱ kjo̱stjíe̱njín. ¡Jmí! Ta̱nga kuí ni xi ndajínkjiꞌi xi katsꞌén, nga xota̱ xi jundío̱jiín jachótꞌaa̱ nga kasakoo̱ kjo̱a̱ꞌnaxiéꞌaá, tsi̱ꞌe̱ nga ka̱maꞌonkon xota̱ Israee̱l.

¹² Ta̱nga tsi kui ni xi ndajínkjiꞌi xi katsꞌén xota̱ Israee̱l tsi kui xi kjo̱a̱cho̱n kjimaa̱ xotaa̱ kui nga̱sondiee̱, kó tsi kui ni xi ndajínkjiꞌi xi katsꞌén xi kjo̱a̱cho̱n kjimaa̱ xota̱ xi jundío̱jín, kókjiꞌi ni xi ka̱ma ngase kjiꞌanga xota̱ Israee̱l sa̱ko̱ó ngi̱ndie xi tsoboaá ngindyi̱ko̱n Néná.

¹³ Ta̱nga jún xí xota̱ xi Israee̱ljínjnú xi tsꞌénchji̱a̱jojnúꞌun, ngatꞌa̱ án xí apostroo̱ xota̱ xi jundío̱jín, kó kuíni nga tsꞌén bendikón án xána.

¹⁴ Tsi tjítsꞌen onkon an xota̱ na̱xi̱ńdaá nangina, bo̱a̱ tjítsꞌen an, tsi̱ꞌe̱ nga kjo̱tjoꞌa chiboa kui xotaa̱.

¹⁵ Ngatꞌa̱ tsi nga ikꞌíjñátꞌaxín kui xotaa̱ tsi kuíni nga Néná yíndaa̱ xotaa̱ kui nga̱sondiee̱, kókjiꞌi ni xi ka̱ma ngase kjiꞌanga Néná sa̱ꞌínjo̱ꞌo. Xota̱ xi je jesoón kꞌuíndo nginí.

¹⁶ Tsi tsjie kui pan xi tjón Néná je kiniꞌánkꞌasꞌiee̱n, ja̱ ngayeje pan xi ngasee̱ ti̱ tsjie nga, kó tsi ja̱ma̱a̱ yaá xi tsjie, ja̱ ti̱ ngayeje tjiaa̱ yaá xi tsjie nga.

¹⁷ Xota̱ Israee̱l xikónií tsi tjiaa̱ yáꞌolibo̱ xi ikichaá, kó tsi ji xi xikoó ngo tjiaa̱ yáꞌolibo̱ ngindie kꞌijñá, kó tsi kui ngi̱ndie nínga kitii̱ yaá kanangindyioó xikoó ngo tjiaa̱ yá xí tjín ngi̱jin kꞌijñaá, kó tsi ngotꞌe̱ ꞌne̱, je ja̱ma̱a̱ yaá ndokjo̱e̱ni, kó nijan tindyin xikótsꞌèn tikón yáꞌoliboo̱.

¹⁸ Ngata̱ jejín ꞌnaxié ngase ji yojòo̱ ta̱bo̱a̱jiín tjiaa̱ yá xí je kitii̱, tsi je ngase máa yojòo̱, ngatjaꞌátsjiee̱n nga jijín xi tiboeꞌée̱ nga tikón kui ja̱ma̱a̱, kuí ja̱ma̱a̱ xi tsꞌéntsjaá kjo̱a̱mindyion ji.

¹⁹ Bi̱ra̱ sée̱ ja̱ma̱a̱: “Ikichá kui tjiaa̱ tsi̱ꞌe̱ nga an kanangindyióna.”

²⁰ ¡Ndakjiꞌi! Kui tjiaa̱ yaá kiti, ngatꞌa̱ kisꞌijinjiín Néná, ta̱nga ji ta̱kó ki̱a̱ tindyin ji kjo̱a̱a̱ kjo̱a̱sꞌijìi̱n. Kó kuíni nga ka̱májín je ko̱ꞌna̱xié ji yojòo̱, ta̱sá chjiéngá ti̱nda̱kin jí Néná.

²¹ Ngatꞌa̱ tsi Néná katsꞌénjetakónjiín tjia ndaa̱ kui yáꞌoliboo̱, akja̱ꞌmíra̱ ji sa̱ꞌínjetakoón nga ta̱ kisitꞌa jí kui yaá.

²² Ja̱ ngatamaye ji nga achichí ndaxota̱ ko̱jo tajá tsꞌénjo̱ Néná xotaa̱, tajá katsꞌénjo̱ xota̱ xi kastingí nga ixó, kó ji nda tjítsꞌénjoo̱, tsi bo̱a̱ tsꞌén ꞌniú ku̱i̱ndyinjin ji kjo̱a̱ndaa̱, ngatꞌa̱ tsi bo̱a̱jín si̱ꞌin ku̱i̱chátꞌaa̱ ji kui yaá.

²³ Kó tsi kui xota̱ Israee̱l sꞌi̱jin nginií, ti̱ ka̱ma kꞌuíndo nginí nínga tikón kui yaá, ngatꞌa̱ Néná achichí ngaꞌniú tjiín, kó ka̱márií ku̱i̱ꞌíjñá nginí nínga síndo ngasꞌe̱.

²⁴ Ngatꞌa̱ tsi ji xi xikoó ngo tjiaa̱ yáꞌolibo̱ kꞌijñá, kó ta̱ katseꞌéndieèri tꞌa kui yáꞌolibo̱ xi ndaa̱. Kótsꞌèn nga niꞌínjín ka̱maa̱ xota̱ Israee̱l nga sa̱kó nginií ngo ngi̱ndie tꞌa yáꞌolibo̱ xi tsi̱ꞌe̱, ngatꞌa̱ kuí xí tjia xi ndaa̱.

Bi̱ tsꞌén íni̱jmì Pabloo̱ kjo̱a̱a̱ nga kamándaya xota̱ Israee̱l

²⁵ Jún ntsꞌie, mejénna nga xcha̱jnú ngo ni xi tjiꞌmá, tsi̱ꞌe̱ nga nkꞌa nga jejín ko̱ꞌna̱xiéjnú ti̱ juún yojojnú: Nga kjín xota̱ xi chji̱a̱ni Israee̱l xi je kamákitikjo̱a̱, ngaskande nga sa̱ko̱ó ngi̱ndie ngindyi̱ko̱n Néná ngayeje xota̱ xi jundío̱jín xi chjiéngá kjo̱tjoꞌa.

²⁶ Kó bo̱a̱ tsꞌén nga ngayeje xota̱ xi chji̱a̱ni Israee̱l kjo̱tjoꞌa. Xikó tsꞌén kjitꞌa xo̱jo̱n eén Néná: Na̱xi̱ńdáꞌniú Jerusale̱n kji̱ndi̱báni nda̱ xi kꞌo̱xiéꞌá xotaa̱, kuí xí kjo̱a̱ꞌáxiín ni xi ndajiín, xota̱ tji̱e̱e̱ Jako̱b.

²⁷ Kui nii̱ xi je kixiyatjóo̱n nga sa̱ꞌin an, kjiꞌanga je katsꞌenjetakóo̱n jeé.

²⁸ Kamámejénjiín xota̱ Israee̱l éntjatsi̱e̱e̱ Néná, ta̱ngatꞌanii̱ nganda tsa̱jún nga xota̱ Israee̱l kondraa̱ Néná kamá, ta̱nga Néná tjoó xota̱ Israee̱l ngatꞌa̱ jaꞌájin xota̱ tji̱e̱ xchaá.

²⁹ Ngatꞌa̱ ngiti̱ foaꞌáxínjín Néná kjo̱a̱nda xi je katsjá, ko̱jo kjinjín tsꞌénkjáꞌa xota̱ xi je jaꞌájin.

³⁰ Ngasꞌe̱ jún kamámejénjínjnú nga kiniꞌánkjatjosónjnúu̱ Néná, ta̱nga ngotꞌe̱ ꞌne̱ tjisákójnú kjo̱a̱ni̱ma̱takoón Néná, ngatꞌa̱ xota̱ Israee̱l kamámejénjiín katsꞌénkjatjosón.

³¹ Kó bo̱a̱ tsꞌén kui xotaa̱ ngotꞌe̱ tsꞌénkjátjosónjín, tsi̱ꞌe̱ nga kui kjo̱a̱ni̱ma̱takón xi katseꞌéjnú jún, sa̱ko̱ó ndatsa kui nga.

³² Bi̱ kjiꞌi kui nii̱: Nde ngojín xota̱ tjín xi tsꞌénkjátjosoón Néná, kó Néná íjñá ngayeje xotaa̱ nga tsintꞌiéꞌénjín, tsi̱ꞌe̱ nga ka̱mani̱ma̱a̱ ngayeje xotaa̱.

³³ Achichí tsie kjo̱a̱cho̱o̱n Néná, achichí tsie kjo̱a̱kjínkoón ko̱jo ni xi tjíjinkon. Nde ngojín xi ka̱makjiín ni xi tsꞌén Néná, ko̱jo tsi ka̱tso̱yà ánní nga bo̱a̱ tsꞌén.

³⁴ Ngatꞌa̱, “ꞌyá xí kamákjiín kótsꞌèn tsꞌénkjó Néná. Axa̱, ꞌyá xí ka̱ma ka̱tso̱yaa̱ ni xi sa̱ꞌín Néná.

³⁵ Axa̱, ꞌyá xí tjón katsꞌénkíyaá ngo ni Néná, tsi̱ꞌe̱ nga Néná tsjangojo nginií.”

³⁶ Ngatꞌa̱ Néná boá xi katsꞌénda ngayeje nii̱, kó ngayeje nii̱ síndo ta̱ngatꞌanii̱ kui, kó kuí tsi̱ꞌe̱. Néná xí Na̱ꞌmii̱ kui tsi̱ꞌe̱ ngatama kjo̱a̱jee̱ ngatsjéni̱xtjin. Bo̱a̱ kjiꞌi.