Xota̱ Roma̱ 10 - Xo̱jo̱n eén Néná

¹ Jún ntsꞌie, ni xi nda xí mejeén ini̱ma̱na, kó míꞌáa̱ Néná nga kꞌo̱xiéꞌá ngayeje xota̱ Israee̱l.

² Ngatꞌa̱ an xiyà an nga kui xotaa̱ achichí tsꞌénchíni̱tꞌaa̱ Néná, ta̱nga kamákjínjiín nga Néná maá tsꞌénkixi̱ xotaa̱.

³ Ngatꞌa̱ katsꞌénxki̱jín nga Néná mejeén nga kixi̱ ka̱ma xotaa̱, ta̱sá kui tsangase ndi̱yà kótsꞌèn nga kixi̱ kꞌuíndo ngindyi̱ko̱n Néná, ni̱ma̱kjo̱a̱jín katsꞌén yojoo̱ nga katsꞌénjo̱ꞌo kjo̱a̱kixi̱ xi tsjá Néná.

⁴ Ngatꞌa̱ nga fetꞌanii̱ kjo̱a̱kitii̱ Kristoo̱ boá, tsi̱ꞌe̱ nga xota̱ kixi̱ ka̱ma ngayeje xi sꞌijii̱n kui.

⁵ Bi̱ tsꞌén ítꞌa Moisee̱ xikótsꞌèn kixi̱ ka̱ma xota̱ xi tsꞌénkjátjosón kjo̱a̱kitii̱: “Xi sa̱ꞌínkjatjosón ni xi kjitꞌa kjo̱a̱kitii̱, kuí nii̱ xi kꞌuíndoni nga̱sondie.”

⁶ Ta̱nga bi̱ tsꞌén ítꞌa kjo̱a̱a̱ xota̱ xi sꞌijii̱n Néná: Ngata̱ bi̱jín se ji ngi̱jii̱n ini̱màa̱: ꞌYá xi ko̱e̱je̱ ndiꞌakꞌajmi jàn. (Bi̱ xian an, tsi̱ꞌe̱ nga ko̱e̱je̱kjaꞌá Kristoo̱, kó kji̱ndi̱bájo̱ kꞌi̱e̱ tꞌanangii̱).

⁷ Axa̱, ꞌyá xi kjo̱tjajen nga̱sondie nínga tikón kjo̱a̱bo̱yaa̱. (Bi̱ xian an, ꞌyá xi ko̱e̱je̱kjaꞌá Kristoo̱ sꞌe̱ sa̱ꞌínkjaꞌáꞌyaá ngi̱jii̱n xota̱ xi je jesoón).

⁸ Ta̱nga, kó tsó. “Eén Néná je tikón tiñaa̱, tꞌa ndso̱ꞌbe ko̱jo ini̱màa̱.” Kuí bí eén kjo̱a̱sꞌijin xi ikꞌíni̱jmìjne̱ ngotꞌe̱:

⁹ Nga tsi ndso̱ꞌbe xi bo̱a̱ katsó nga Kjisoo̱ xi Ndi̱a̱ná, ko̱jo tsi ngayeje ini̱màa̱ nga sꞌijii̱n nga Néná katsꞌénkjaꞌáꞌyaá ngi̱jii̱n xota̱ xi je jesoón, kjo̱tjoꞌa jí.

¹⁰ Ngatꞌa̱ ngi̱jii̱n ini̱ma̱ná boá nga sꞌijinná kjo̱a̱a̱ ni xi kixi̱i̱, ta̱nga ndso̱ꞌbá ñá boá xi ku̱i̱chji̱a̱ nga sꞌi̱jinná nga kjo̱tjoꞌa ñá.

¹¹ Ngatꞌa̱ bi̱ tsó xo̱jo̱n eén Néná: “Ngayeje xota̱ xi sꞌi̱jii̱n Néná jmí kjo̱a̱soboá sa̱kójiín.”

¹² Ngatꞌa̱ Néná jmí ndasénjiín tsi xota̱ jundío̱ ko̱jo tsi xota̱ xi jundío̱jín, ngatꞌa̱ Néná kuí boá xi Ndi̱a̱a̱ ngayeje xota̱, kó achichí ndaxota̱ tsꞌénjo̱ ngayeje xota̱ xi sa̱ꞌínkaxoma jaꞌeén.

¹³ Ngatꞌa̱ “ngayeje xota̱ xi sa̱ꞌínkaxoma jaꞌeén Ndi̱a̱ná, kjo̱tjoꞌa.”

¹⁴ Ta̱nga, kótsꞌèn sa̱ꞌínkaxoma jaꞌeén Néná kui xota̱ xi kji̱e̱ sꞌijinjiín Néná. Kó kótsꞌèn sꞌi̱jii̱n Néná tsi kji̱e̱ ntꞌiéjín ꞌyání xi Néná. Kó kótsꞌèn ku̱i̱ntꞌiè tsi jmíjín xi ku̱i̱ꞌíni̱jmi̱ì.

¹⁵ Kó kótsꞌèn kꞌuiníjmì eén Néná tsi jmíjín xi sa̱ngíyá. Bi̱ tsꞌén kjitꞌa xo̱jo̱n eén Néná: “Achichí tsjatsꞌèn fochokónná ngo xota̱ xi tsáyà éntjatsi̱e̱e̱ Néná.”

¹⁶ Ta̱nga jmí tsi ngayeje xota̱ Israee̱l xi katsꞌénkjatjosón éntjatsi̱e̱e̱ Néná, kuíni nga nda̱ chji̱ni̱e̱ꞌe̱én Néná xi ꞌmí Isayaa̱ bi̱ tsó: “Ndi̱a̱, ꞌyá xi je kisꞌijii̱n én xí kiꞌmíyàjne̱.”

¹⁷ Kuíni nga sꞌijinná Néná, kjiꞌanga ndaꞌyá eén, nga ꞌbíni̱jmìná kjo̱a̱a̱ Jesukristoo̱.

¹⁸ Ta̱nga an bosíyá an: A tsintꞌiéjín. ¡Ja̱koxi̱ nga jè tsintꞌié! Bi̱ tsó xo̱jo̱o̱n Néná: Nda̱a̱ je kandaꞌyá ngayeje nga̱sondiee̱, kó eén je jachó ngaskande nínga fetꞌanii̱ nga̱sondiee̱.

¹⁹ Ta̱nga bi̱ xian an: Xota̱ Israee̱l a kamábejín kui nii̱. Tjón má Moisee̱ bi̱ katsó: Án xí sa̱ꞌin onkon an nga sa̱ꞌinkjièn án xota̱ na̱xi̱ńdá xi na̱xi̱ńdájín, kó ngo na̱xi̱ńdá xi ndajín kuí xí sa̱ꞌinxtíñaa̱ ji.

²⁰ Ta̱nga nda̱ chji̱ni̱e̱ꞌe̱én Néná xi ꞌmí Isayaa̱ ma kon nga bi̱ tsó: Xota̱ xi ndyi̱mongasejínna kuí xí kasakoo̱ an, ki̱a̱ jatjokjàa̱ xota̱ xi asíyájín kjo̱a̱a̱ an.

²¹ Ta̱nga kjo̱a̱a̱ Israee̱l bi̱ tsó: “Ngatsjéni̱xtjin tsꞌénkoyàa̱ kui xota̱ na̱xi̱ńdá xí ntꞌiéꞌénjiín ko̱jo xi mejénjiín ko̱e̱je̱tji̱ngina.”