Xota̱ Filipo̱ 4 - Xo̱jo̱n eén Néná

Bi̱ tsꞌén íni̱jmì Pabloo̱ kjo̱a̱a̱ nga ngatsjéni̱xtjin tsja ngatamajnú kjo̱a̱a̱ Ndi̱a̱ná

¹ Kuíni nga jún bo̱a̱ ndí ntsꞌie xi achichí mejénna nga skuie an ko̱jo xi tjóna, jún boá xi kjo̱a̱tsjana ko̱jo chjií xá xi je katsꞌen an. Jún ndí ntsꞌie xi tjóna, ꞌniú ti̱ndyiàjnú ngatꞌaa̱ Ndi̱a̱ná.

² ꞌNiú míꞌáa̱ na̱ Ebondiaa̱ ko̱jo na̱ Síntikee̱, tsi̱ꞌe̱ nga ti̱ kuii̱ ni xi sa̱ꞌínkjó nga joó ngatꞌaa̱ Ndi̱a̱ná.

³ Kó ji ꞌniú míꞌaá, ji xi ꞌniátakoón nga nijan ndyi̱niꞌánxá, tsi̱ꞌe̱ nga ko̱si̱ke̱je ji kui ínchjiín, kui xi nijan katsꞌénxájo̱na nga ini̱jmi án éntjatsi̱e̱e̱ Néná, ko̱jo Klementee̱ ko̱jo xota̱ xi ngase xi nijan katsꞌénxájo̱na. Kui xi je kjitꞌa jaꞌeén xo̱jo̱n nínga tjítꞌa jaꞌeén xota̱ xi kꞌuíndo ngatsjéni̱xtjii̱n.

⁴ Tsja ngatamajnú ngatsjéni̱xtjin ngatꞌaa̱ Ndi̱a̱ná. Ingo ndi̱yà bo̱a̱ xian nginíjnúꞌun: ¡Tsja ngatamajnú!

⁵ Ngayeje xota̱ xi ngatamabejnú nga xota̱ xi ndaxota̱jnú. Ndi̱a̱ná je tikón tiña.

⁶ Ngata̱ jmíjín ni xi nda̱ ngatamajnú, ta̱sá ngayeje ni xi machjiénjnú tꞌíyájnúu̱ Néná nga ko̱ndókjo̱a̱jnúu̱. Chji̱a̱ꞌajnúu̱, kó ti̱ bo̱a̱ ti̱ tsꞌén te̱ꞌéjnúu̱ ndokꞌóchjì kjo̱a̱a̱ ni xi tsꞌéntsjájnú.

⁷ Kó kjo̱a̱xioó Néná, kui kjo̱a̱xió xi foaꞌatjoón ngayeje kjo̱a̱kjíntakoón, skoón ini̱ma̱jnú ko̱jo kjo̱a̱kjíntakónjnú ngatꞌaa̱ Kristo̱ Kjisoo̱.

Bi̱ tsꞌén akóyá Pabloo̱ kjo̱a̱a̱ ni xi si̱ꞌankjójnú

⁸ Kó nga fetꞌaa̱ já ntsꞌie, kuí nii̱ xi ti̱ꞌankjójnú: ngayeje ni xi ja̱koxi̱, ngayeje ni xi yandikón ngindyi̱ko̱n Néná, ngayeje ni xi kixi̱, ngayeje ni xi tsjie, ngayeje ni xi ꞌniú nda, ko̱jo ngayeje ni xi tjiín jaꞌén xi nda. Tsi tjín ni xi nda ko̱jo ni xi tsoboaá nga niꞌántsjá, kuí nii̱ xi ti̱ꞌankjójnú.

⁹ Ti̱ꞌankjatjosónjnú ni xi kamájnú nga akoyájnúꞌun, ni xi je kachjábéjnú, ni xi je kandaꞌyájnú ko̱jo ni xi kitsitsijenjnúu̱ nga katsꞌen an, kuí nii̱ xi ti̱ꞌánjnú. Bo̱a̱ tsꞌén nga kui Néná xi tjiín kjo̱a̱xioó kꞌuijñájinjnú.

Pabloo̱ bi̱ tsꞌén katsjaá ndokꞌóchjì xota̱ na̱ngo̱xi̱ xi chji̱a̱ni Filipo̱, ngatꞌa̱ asíko̱jo

¹⁰ Achichí tsja mana ngatꞌaa̱ Ndi̱a̱ná nga jachó ni̱xtjin nga jún kiniꞌánkjó nginíjnúꞌun. Kjénní nga kiniꞌánkjójnúꞌun, ta̱nga kisꞌiejínjnú ngi̱ndie kótsꞌèn ko̱si̱ko̱jójnúꞌun.

¹¹ Jmí tsi kui nii̱ tꞌíxiánjnúꞌun kjo̱a̱a̱ nga ngo ni chjiénna, ngatꞌa̱ je be an kótsꞌèn nga chjiéngá tsja ka̱mana ta̱ xikótsꞌèn tikòn an.

¹² Je be an kótsꞌèn mindyión nga xota̱ ni̱ma̱, kó ti̱ je be an kótsꞌèn mindyión nga tsie ni tjínná. Je kamána nga jaꞌajin an ta̱jmì niní, ta̱ bo̱a̱a̱ tsi kitsiena ko̱jo tsi bojóna, ko̱jo tsi tsꞌatio tjínna ko̱jo tsi ta̱ jmíjín ni xi tjínna.

¹³ Kristoo̱ xí tsjangaꞌniúna, tsi̱ꞌe̱ nga xchíkjo̱a̱na ta̱jmì niní.

¹⁴ Ta̱nga jún, nda kiniꞌánjnú nga kamándasénjnú kjo̱a̱a̱ kjo̱a̱ni̱ma̱na.

¹⁵ Kó xikótsꞌèn nga je yàjnú jún, xota̱ xi chji̱a̱ni Filipo̱, nga kjiꞌanga ítsꞌi̱yañáa̱ nga ini̱jmi án éntjatsi̱e̱e̱ Néná, kjiꞌanga jatjoni an nangi Masendonia̱, nde ngojín xota̱ na̱ngo̱xi̱ xi katsjá ko̱jo tsi asíko̱jona, ta̱ jún chií xi bo̱a̱ kiniꞌánjnú.

¹⁶ Ngatꞌa̱ nga kisꞌijña an na̱xi̱ńdá Tesalónika̱, ngo jó ndi̱yà kanangiyajnúꞌun ni xi kamáchjiénna.

¹⁷ Jmí tsi chji̱e̱ xi tsꞌénmongase an, ta̱sá tsꞌénmongase an nga tsie ngase kjo̱a̱cho̱n kꞌuiéjnú ngindyi̱ko̱n Néná.

¹⁸ Ngayeje ni xi kanangiyajnúꞌun je kiniꞌánkꞌasꞌienna, kó ngaskande tsꞌatio tjínna ngotꞌe̱. Epafronditoo̱ katsꞌénkꞌasꞌienna ni xi kanangiyajnúꞌun, kó kui nii̱ xi katsꞌéndo̱jò ni xi kamáchjiénna. Kuí nii̱ xi xikoó ngo kjo̱a̱nda xi tjiín nisije̱n, ngo kjo̱a̱tjó xi tsja maa̱ Néná nga kjíbé.

¹⁹ Kui Néná xi tsꞌénxájo̱ an tsja̱ajnú jún ngayeje ni xi chajajnú, xikó kjiꞌi kjo̱a̱cho̱o̱n kjo̱a̱je xi tjiín Kristo̱ Kjisoo̱.

²⁰ Néná xí Na̱ꞌmii̱ kui tsi̱ꞌe̱ ngatama kjo̱a̱jee̱ ngatsjéni̱xtjin. Bo̱a̱ kjiꞌi.

Pabloo̱ bi̱ tsꞌén katsꞌénkjietꞌa xo̱jo̱o̱n

²¹ Tinde bo̱a̱ tꞌínjnú ngayeje xota̱ tsjiee̱ Kristo̱ Kjisoo̱. Já ntsꞌie xi nijan síndojo̱na tinde xò bo̱a̱ tsó.

²² Ti̱ bo̱a̱ ti̱ tsꞌén tinde xò bo̱a̱ tsó ngayeje xota̱ tsjiee̱ Néná. Ti̱ tsꞌentíndejnú kui xota̱ xi ndyi̱tsꞌènxá ndiꞌaa̱ nda̱ xtitjoón xi ꞌmí Sesaa̱.

²³ Nga tꞌíjñajinjnú kjo̱a̱ndaa̱ Ndi̱a̱ná Jesukristoo̱. Bo̱a̱ kjiꞌi.