Xota̱ Filipo̱ 2 - Xo̱jo̱n eén Néná

Bi̱ tsꞌén íni̱jmì Pabloo̱ xi kókón chjiéngá ka̱ma ñá

¹ Kó kuíni nga tsi Kristoo̱ tsjangaꞌniújnú, tsi kjo̱a̱tjoó xi tsꞌéntsjájnú ngaꞌniú, tsi A̱siénni̱xtjin xi tjítsꞌéngojnú, tsi ꞌniú tjójnú xingi̱jnú, kó tsi tjínjnú kjo̱a̱ni̱ma̱takón,

² ti̱ꞌando̱jojnú kjo̱a̱tsjana, nga ti̱ bo̱a̱ ti̱ tsꞌén ku̱i̱ndyionjnú, nga kꞌuiéjnú ti̱ kuii̱ kjo̱a̱tjó, nga ngo ndséje̱n ka̱majnú, ko̱jo nga ti̱ kuii̱ ni xi kjójintakónjnú.

³ Ngata̱ ngojín nii̱ xi niꞌánjnú tsi kjo̱a̱a̱ nga ku̱i̱tjátjónjnú, ko̱jo tsi kjo̱a̱a̱ nga kjo̱a̱nkꞌatakón, ta̱sá ni̱ma̱kjo̱a̱ ngatamajnú xikoó tsi nkꞌa ngase tꞌíjñájnú xota̱ xi ngasee̱.

⁴ Jmí tsi nganda tsa̱jún xi ku̱i̱ndyi̱séjnú, ta̱sá ngandaa̱ xota̱ xi ngasee̱ xi ti̱ndyi̱séjnú.

⁵ Xi kókón Kristo̱ Kjisoo̱, bo̱a̱ kon ngatamajnú.

⁶ Kó ndatsi Néná boá kui, ta̱nga jmí tsi iskjíbé tsján tsján kui nii̱.

⁷ Ta̱sá ti̱ kui íjñátꞌaxín yojoo̱ nga Néná, kó moso̱ kamá, xikoó ngo xota̱ nga̱sondie kamá nga kisꞌijña,

⁸ kó nga xota̱ kamá, ni̱ma̱kjo̱a̱ katsꞌén ti̱ kui yojoo̱, kó tsintꞌiéꞌeén Néná ngaskande nga kꞌien, nga kꞌientꞌa kroo̱.

⁹ Kó kuíni nga Néná katsjaá ngo kjo̱a̱je xi je, kó katsjaá ngo jaꞌén xí nkꞌa ta̱bo̱a̱jiín jaꞌén xí ngasee̱.

¹⁰ Tsi̱ꞌe̱ nga kjiꞌanga ko̱nda̱ꞌyá jaꞌeén Kjisoo̱, ngayeje xi ko̱siéntikoó, ki̱a̱ ndiꞌakꞌajmii̱, ko̱jo tꞌanangii̱, ko̱jo ngindie tꞌanangii̱.

¹¹ Kó nga ngayeje xi bo̱a̱ ka̱tso̱ nga Jesukristoo̱ boá xi Ndi̱a̱ná. Bo̱a̱ tsꞌén nga sꞌi̱jña tsijen kjo̱a̱jee̱ Néná xí Na̱ꞌmii̱.

Bi̱ tsꞌén íni̱jmì Pabloo̱ kjo̱a̱a̱ kótsꞌèn chjiéngá kꞌuíndo xota̱ na̱ngo̱xi̱i̱ ngi̱jii̱n xota̱ xi ngasee̱

¹² Kó kuíni, jún ndí ntsꞌie xi tjóna, xikótsꞌèn nga ndyi̱ndaꞌyáꞌénjnú ngatsjéni̱xtjin, kó nga jmí tsi ta̱ kjiꞌa tsí nga ki̱a̱ tikòn an, bo̱a̱ra̱ ti̱ꞌánjnú ngotꞌe̱ nga kjin tikòn an. Cha̱ndikónjnú Néná, kó ngatjatsiéjnú jún tji̱e̱nga si̱ꞌando̱jòjnú ni xi tjítsꞌén ngi̱jinjnú nga tsꞌénꞌboxiéꞌájnú.

¹³ Ngatꞌa̱ Néná boá xi tjítsꞌén nga ka̱mamejénjnú, ko̱jo nga si̱ꞌankjatjosónjnú ni xi ndyi̱niꞌánjnú, ta̱ngatꞌanii̱ ni nda xi mejeén kui.

¹⁴ Ti̱ꞌánjnú ngayeje nii̱, kó nga ndokjo̱a̱taꞌínjínjnú xingi̱jnú, ti̱nde ngata̱ ndokjo̱a̱tijínjnú.

¹⁵ Tsi̱ꞌe̱ nga jmíjín xi ka̱maa̱ chꞌo tsꞌén ku̱i̱chji̱a̱taꞌinjnú, ko̱jo nga ndií Néná xi tsjie ka̱majnú jún ngi̱jii̱n kui xota̱ chꞌokon, ko̱jo xota̱ xi ndajín xi tjín ngotꞌe̱. Ngi̱jii̱n kui xotaa̱, jún xikónií ngo ńño ꞌna̱a̱ nga̱sondiee̱ kjimajnú,

¹⁶ nga ꞌniú kichꞌiájnú kui eén kjo̱a̱mindyioo̱n, kó bo̱a̱ tsꞌén kjiꞌanga kjo̱e̱ꞌe nginí Kristoo̱, an tsja ka̱mana kjo̱a̱a̱ jún, nga skuie an nga ta̱ kjo̱a̱ndajiín nga kistsoꞌbá an, ko̱jo nga katsꞌenxá an.

¹⁷ Jún kjimaꞌniátakónjnú Néná, kó ndyi̱niꞌántsjájnúu̱, kó kui ni xi̱ꞌba̱ xikónií tsi ngo chji̱e̱ ndyi̱boeꞌéjnúu̱. Tsi an si̱ꞌankꞌienna, án xí ka̱mando̱joní an kui chji̱e̱e̱. Tsi bo̱a̱ ka̱ma achichí tsjá ka̱mana, kó ti̱ tsja mana kjo̱a̱a̱ jún.

¹⁸ Kó ti̱ bo̱a̱ ti̱ tsꞌén jún, tsja ngatamajnú kjo̱a̱a̱ kjo̱a̱tsjana.

Bi̱ tsꞌén íni̱jmì Pabloo̱ nga Timoo̱ xi sa̱ngíyaá xota̱ xi chji̱a̱ni na̱xi̱ńdáꞌniú Filipo̱

¹⁹ Ta̱nga tsi Ndi̱a̱ná Kjisoo̱ xi tsjandiè, tsá sangiyájnúꞌun Timoo̱, tsi̱ꞌe̱ nga tsja ka̱mana nga sku̱i̱e̱ an xikótsꞌèn tindyiónjnú jún.

²⁰ Ngatꞌa̱ jmíjínna ingo nda̱ xi nda̱ kjimaa̱ nganda tsa̱jún xikoó Timoo̱.

²¹ Ngatꞌa̱ ngayeje xota̱ xi ngasee̱ kjo̱a̱nda tsi̱ꞌe̱ xí mongase, kó jmí tsi kjo̱a̱ndaa̱ Kristo̱ Kjisoo̱ xi mongase.

²² Ta̱nga jún jè yàjnú kókón Timoo̱. Kui xi tsꞌénxájo̱na kó tsꞌénꞌbíni̱jmìjo̱na éntjatsi̱e̱e̱ Néná, kó bo̱a̱ kon kui xikoó ngo ndí xí tsꞌénxájo̱ na̱ꞌmii̱.

²³ Kó kuíni nga tsꞌénkoya an tsi̱ꞌe̱ nga tsá sangiyájnúꞌun Timoo̱, ngije skuie an kó kꞌuié kjo̱a̱a̱ ni xi kjimana.

²⁴ Kó kjimaꞌniátakón an Ndi̱a̱ná nga tsja̱ndiè nga ko̱jo an tsá kjuínkátsijenjnúꞌun.

Bi̱ tsꞌén íni̱jmì Pabloo̱ nga Epafronditoo̱ xi sa̱ngíyaá xota̱ xi chji̱a̱ni na̱xi̱ńdáꞌniú Filipo̱

²⁵ Ta̱nga tjítsꞌenkjó án nga chjiéngá sangiya nginíjnúꞌun nda̱ ntsꞌié Epafronditoo̱, nda̱ ntsꞌie án xi nijan tjítsꞌénxájo̱na, kó tsꞌénfoaꞌatiojo̱na kjo̱a̱ni̱ma̱ ngatꞌaa̱ Kristoo̱, kui xi ti̱ juún kanangiyajnúꞌun tsi̱ꞌe̱ nga ko̱síko̱jona nga sa̱ꞌín ni xi chjiénna.

²⁶ Ngatꞌa̱ achichí kamámejeén nga sku̱i̱e̱jnú ngayejejnú, kó achichí nda̱ kamaá kjo̱a̱a̱ nga jún je kamáyàjnú nga ndajín kisꞌiee̱ kui.

²⁷ Ngatꞌa̱ ja̱koxi̱ boá nga kamáꞌoón, kó ngaskande mején kꞌien katsaki, ta̱nga Néná ni̱ma̱ kamaá kui, kó ko̱jo an ni̱ma̱ kamaá an Néná nga, tsi̱ꞌe̱ nga kꞌuiéjín ngasena kjo̱a̱ndasen xikoó xi ja̱bo̱a̱ je tjínna.

²⁸ Kuíni nga ta̱sá tsá tsꞌéntsangiyajnúꞌun, tsi̱ꞌe̱ nga tsja ka̱majnú jún nga xcha̱ nginíjnú, ko̱jo tsi̱ꞌe̱ nga nda̱jín ka̱mana an.

²⁹ Ngatꞌaa̱ Ndi̱a̱ná nda ti̱ꞌanjo̱jnú nga kjo̱chókónjnú. Ngatsjéni̱xtjin tjó ti̱ꞌanjo̱jnú kui xota̱ xi xikoó kui.

³⁰ Ngatꞌa̱ mejeén kꞌien nga íni̱jmì éntjatsi̱e̱e̱ Kristoo̱. Ndasénjín kamaá yojoo̱, kó mejeén kꞌien, ta̱ngatꞌanii̱ nga katsjána kui kjo̱a̱bosíko̱jo xi kamájín nga jún má xi katseꞌéjnúꞌun.