Xota̱ Filipo̱ 1 - Xo̱jo̱n eén Néná

Bi̱ tsꞌén katsꞌéntinde Pabloo̱ xota̱ na̱ngo̱xi̱ xi chji̱a̱ni na̱xi̱ńdáꞌniú Filipo̱

¹ An Pabloo̱, ko̱jo Timoo̱, ji̱n xi mosoo̱ Jesukristoo̱, niꞌántindejne̱ ngayeje jún, xi xota̱ tsjiee̱ Kristo̱ Kjisoo̱ xi tindyiónjnú na̱xi̱ńdáꞌniú Filipo̱, kó ti̱ niꞌántindejne̱ já xí ngito̱ko̱o̱ na̱ngo̱xi̱i̱, ko̱jo já xí bosikójo kui jaá.

² Néná xí Na̱ꞌminá, ko̱jo Ndi̱a̱ná Jesukristoo̱, ngatsjájnú kjo̱a̱ndaa̱ ko̱jo kjo̱a̱xioó.

Bi̱ tsꞌén íni̱jmì Pabloo̱ xikótsꞌèn tsíchji̱a̱tjé xota̱ na̱ngo̱xi̱ xi chji̱a̱ni na̱xi̱ńdáꞌniú Filipo̱

³ Ngatsjéni̱xtjin nga foaꞌátsjienna jún tsjàa̱ ndokꞌóchjì Néná.

⁴ Tsja mana ngatsjéni̱xtjin nga chjiátjejnúꞌun ngayejejnú.

⁵ Ngatꞌa̱ jè ta̱ ngo tsí kichꞌiá yojoná nga ndyi̱niꞌán xaá éntjatsi̱e̱e̱ Jesukristoo̱, ndeskande ni̱xtjin nga tjón kandaꞌyájnú, kó ngaskande ngotꞌe̱.

⁶ Néná xí ítsꞌi̱yanii̱ nga katsꞌén ngo xá xí nda ngi̱jii̱n jún, kó bee̱ko̱n an nga sa̱ꞌíndo̱jo ngaskande ni̱xtjin nga kjo̱e̱ꞌe nginí Jesukristoo̱.

⁷ Ndakjiꞌi nga bo̱a̱ tsꞌén tjítsꞌenkjó án kjo̱a̱a̱ ngayejejnú, ngatꞌa̱ ngi̱jin ini̱ma̱na tindyiónjnú. Ngatꞌa̱ ti̱kuíní kjo̱a̱ndaa̱ Néná xi tjisákóná jún ko̱jo an. Tsi ndo̱bo̱a̱yà ko̱jo tsi ngindyi̱ko̱n xota̱xa̱á tikòn an, tsꞌénxiya an kó tsꞌénboko cha̱n cha̱n an, nga ja̱koxi̱ boá éntjatsi̱e̱e̱ Jesukristoo̱.

⁸ Ngatꞌa̱ Néná xí chistiko̱ nga achichí tjóna ngayeje jún xikótsꞌèn ꞌniú tjoó Jesukristoo̱ an.

⁹ Kó míꞌáa̱ Néná nga chjiáa̱ nga ꞌniú ngase kꞌuiéjnú kjo̱a̱tjó, kó nga Néná tsja̱a ngasejnú kjo̱a̱kjíntakón, ko̱jo nga kixi̱ tsꞌén ka̱makjínjnú ni xi tsi̱ꞌe̱.

¹⁰ Tsi̱ꞌe̱ nga bo̱a̱ tsꞌén nda ka̱ma chje̱ꞌéjinjnú mí ni xi ja̱koxi̱ nga nda, ko̱jo nga tsjietsꞌén ku̱i̱ndyionjnú ko̱jo nga jmíjín xi ka̱maa̱ chꞌo tsꞌén ku̱i̱chji̱a̱taꞌinjnú ni̱xtjin nga kji̱ndi̱bá nginí Kristoo̱.

¹¹ Kui ni̱xtjii̱n ko̱kójnú jún kjín to̱ko̱ya ni xi kixi̱ xi kiniꞌánjnú, ni xi katsjájnú Jesukristoo̱ nga si̱ꞌánjnú, tsi̱ꞌe̱ nga xotaa̱ tsja̱á kjo̱a̱je, kó sa̱ꞌíntsjaá Néná.

Bi̱ tsꞌén íni̱jmì Pabloo̱ nga nganda tsi̱ꞌe̱ kjima ni xi tsꞌénfoaꞌajin

¹² Jún ntsꞌie, mejénna nga xcha̱jnú nga kui ni xi kjimataꞌin an, kuí nii̱ xi katsjangaꞌniú ngasee̱ nga kjimatsie éntjatsi̱e̱e̱ Jesukristoo̱.

¹³ Ngatꞌa̱ ngayeje jájún xi ꞌniú nkꞌa xaá xi tsi̱ꞌe̱ xtitjoón, ko̱jo xota̱ xi ngasee̱ be nga tikón ꞌniú án ta̱ngatꞌanii̱ Kristoo̱.

¹⁴ Kó mején ngayeje já ntsꞌiee̱, nga be nga tikón ꞌniú án, ꞌniú kjimaꞌniátakón ngase Ndi̱a̱ná, kó tsakjónjín má nga ndyi̱ꞌbini̱jmì eén Néná.

¹⁵ Kjénní nga ja̱koxi̱ nga tjín xota̱ xi ꞌbini̱jmì kjo̱a̱a̱ Kristoo̱, ta̱nga ta̱ kjo̱a̱a̱ kjo̱a̱ꞌontakón tsí ko̱jo tsi kjo̱a̱a̱ nga kjo̱a̱ꞌatjón, ta̱nga kje̱ꞌe xí ngayejee̱ kon nga tsꞌén kuí nii̱.

^16-17 Xota̱ xi ꞌbini̱jmì kjo̱a̱a̱ Kristoo̱ ta̱nga nga kjo̱a̱a̱ nga mejeén kjo̱a̱ꞌatjón, bo̱a̱ ndyi̱tsꞌèn ngatꞌa̱ nganda tsi̱ꞌe̱ xí ndyi̱mongase, kó ndyi̱tsꞌènkjó nga mejeén sa̱ꞌínniꞌin ngasena nga kꞌi̱e̱ tikón ꞌniú án. Ta̱nga xota̱ xi ngasee̱ xi ndyi̱ꞌbini̱jmì kjo̱a̱a̱ Kristoo̱, ta̱ngatꞌanií kjo̱a̱tjoó nga bo̱a̱ ndyi̱tsꞌèn, ngatꞌa̱ be nga tikón ꞌniú án, tsi̱ꞌe̱ nga xiyà cha̱n cha̱n an éntjatsi̱e̱e̱ Néná ngindyi̱ko̱n xota̱xa̱á.

¹⁸ Ta̱nga jmí ndasénjín, tsi bo̱a̱ kjiꞌi ko̱jo tsi bo̱a̱jín kjiꞌi, ta̱nga tjíꞌbíni̱jmì kjo̱a̱a̱ Kristoo̱, kó kuí ni xi̱ꞌbi̱ xi tsja mana. Kó sꞌe̱ tsja ngase ka̱mana.

¹⁹ Ngatꞌa̱ jè be an nga kjo̱a̱a̱ nga ndyi̱ndokjo̱a̱jnúu̱ Néná, ko̱jo nga kjo̱a̱a̱ Jesukristoo̱ tsꞌéntsjána A̱si̱énni̱xtjii̱n, kuí nii̱ xi xota̱ ndé sa̱ꞌínna.

²⁰ Bo̱a̱ ka̱ma xikótsꞌèn mejénna, kó tsꞌénkoyàa̱ nga ta̱ jmíjín ni xi tsja̱ana kjo̱a̱soboá. Ta̱sá ꞌniú kosien an xikótsꞌèn síkijí an, kó xcha̱ kjo̱a̱jee̱ Kristoo̱ ta̱ngatꞌanii̱ ni xi kjimataꞌin an, tsi tikòn an ko̱jo tsi kꞌien an.

²¹ Ngatꞌa̱ bi̱ xian an: Tsi tikòn an, Kristoo̱ xi tikónni an. Kó tsi ko̱yà an, jè katsꞌen an.

²² Ta̱nga tsi nga tikón ngase an kui nga̱sondiee̱, ꞌniú chjínií xá xí tjítsꞌen an. Bejín an mí ni xi kjo̱a̱ꞌajin an.

²³ Ngatꞌa̱ achichí niꞌin mana nga ngo nga jó kui nii̱ xi kjo̱a̱ꞌajin an: Ngatꞌa̱ ta̱ bo̱a̱ mejénna ko̱yà án, tsi̱ꞌe̱ nga ki̱a̱ kotíjña̱ an nínga tikón Kristoo̱, ngatꞌa̱ nda ngase kjimana kui nii̱,

²⁴ ta̱nga mejénna kotíjña̱ ngase an kui nga̱sondiee̱, ta̱ngatꞌanii̱ jún.

²⁵ Kó be án nga bo̱a̱ kjiꞌi kui nii̱, kó kotíjña̱ ngase an, kó ta̱kó kotíjña̱jinjnúꞌun ngayejejnú tsi̱ꞌe̱ nga ꞌniú ngase sꞌi̱jinjnú, kó tsja ka̱majnú nga bo̱a̱ si̱ꞌánjnú.

²⁶ Bo̱a̱ tsꞌén kjiꞌanga kjuínkátsijen nginíjnúꞌun kꞌuié ngasejnú kjo̱a̱ nga si̱ꞌantsjajnúu̱ Kristo̱ Kjisoo̱.

Bi̱ tsꞌén akóyaá Pabloo̱ xota̱ na̱ngo̱xi̱i̱ nga ꞌniú kꞌuíndo

²⁷ Ta̱ kuí tsí nii̱ xi míꞌájnúꞌun: Ti̱ndyiónjnú xikótsꞌèn tsoboaá nga kꞌuíndo xota̱ je sꞌijii̱n éntjatsi̱e̱e̱ Kristoo̱. Kuíni nga tsi kjuínkátsijenjnúꞌun skuie an, kó tsi ki̱a̱jín kotíjña̱ an kuintꞌie an én xikótsꞌèn tindyiónjnú. ꞌNiú ti̱ndyiónjnú. Ngo tsí ni xi tjajintakónjnú. Ngo ndséje̱n ti̱ꞌangaꞌniújnú nga ku̱i̱xkántjéjnú kjo̱a̱sꞌijii̱n éntjatsi̱e̱e̱ Kristoo̱.

²⁸ Kó nga ta̱ ndakonjínmájnúu̱ kondra̱jnú, ngatꞌa̱ kuí nii̱ xi ko̱ko̱ó ngo chi̱bo̱a̱ kui xotaa̱ nga kju̱i̱e̱, ta̱nga nga jún kjo̱tjoꞌajnú. Néná tsja̱ajnú nga jún xi si̱ꞌánjnú.

²⁹ Ngatꞌa̱ jún jè katseꞌéjnú nga sꞌi̱jinjnú Kristoo̱, ta̱nga ti̱ katseꞌéjnú nga ta̱ngatꞌanii̱ kui nga ku̱i̱tja̱tiójnú kjo̱a̱ni̱ma̱.

³⁰ Ti̱ kuíní ni xi ndyi̱bitjajinjnú jún, xikoó ni xi je kamáyàjnú nga kamátaꞌin an, kó ngotꞌe̱ ꞌne̱ ndyi̱ndaꞌyájnú nga ta̱kó tsꞌénfoaꞌajin an.