Xota̱ Éfeso̱ 6 - Xo̱jo̱n eén Néná

¹ Jún xi ndí jún xi sꞌijinjnú Ndi̱a̱ná, ndaꞌyáꞌénjnúu̱ xi xchájnú, ngatꞌa̱ kuí nii̱ xi kixi̱ ngindyi̱ko̱n Néná.

² Kjo̱a̱botíxoma xi tjón xi tsꞌéntsáyà ni xi Néná tsja̱á xota̱ xi ku̱i̱ntꞌiéꞌeén, kuí bí xi̱ꞌbi̱: “Che̱ndikín jí na̱ꞌmíi̱ ko̱jo na̱áa̱n,

³ tsi̱ꞌe̱ nga nda tsꞌén ku̱i̱ndyin ji, kó tsie ka̱maa̱ nga ku̱i̱ndyin ji kui nga̱sondiee̱.”

⁴ Kó jún xi xi xchájnú, ngata̱ niꞌánxtindajínjnú ndíjnú, ta̱sá nda ti̱ꞌanchji̱ni̱e̱jnú, ko̱jo ndókjo̱a̱jojnú nga si̱ꞌanxchájnú xikótsꞌèn mejeén Ndi̱a̱ná.

⁵ Jún xi moso̱ xi kastiñájnú, ti̱nda̱kònjnú ko̱jo cha̱ndikónjnú nga ko̱nda̱ꞌyáꞌénjnúu̱ kui xi ndi̱a̱jnú ma kui nga̱sondiee̱, kó ngayeje ini̱ma̱jnú nga ti̱ꞌánjnú xaá, xikótsꞌèn ndaꞌyáꞌénjnúu̱ Kristoo̱.

⁶ Bo̱a̱ ti̱ꞌánjnú, ta̱nga jmí tsi ta̱ kjiꞌa tsí nga ndyi̱kotsijenjnú xotaa̱, ta̱sá xikoó nga moso̱ xi tsi̱ꞌe̱ Kristoo̱ májnú, kuíni nga ngayeje ini̱ma̱jnú nga ti̱ꞌánjnú ni xi mejeén Néná.

⁷ Ngayeje takónjnú nga ti̱ꞌánjnú kui xaá, xikoó tsi tsi̱ꞌe̱ Ndi̱a̱ná boá, kó jmí tsi tsi̱ꞌe̱ xotaa̱.

⁸ Ngatꞌa̱ je yàjnú nga Néná tsja̱á ngo chjí xota̱ xi ni xi nda ndyi̱tsꞌe̱én, tsi xota̱ ndé, ko̱jo tsi xota̱ xi moso̱ xi kastiñá.

⁹ Kó jún xi ndi̱a̱jnú, jè yàjnú nga ta̱ ngo tsí má Ndi̱a̱ xi tikón ndiꞌakꞌajmii̱ xi botixómájnú jún, ko̱jo moso̱ xi kastiñaá, kó Ndi̱a̱ná skjánjín tsꞌénjo̱ xota̱a̱, kuíni nga bo̱a̱ ti̱ ti̱ꞌanjo̱jnú moso̱jnú kó ngata̱ mindyiandikónjínjnúu̱.

Bi̱ tsꞌén akóyá Pabloo̱ xikótsꞌèn kꞌuijñánda yojoná tsi̱ꞌe̱ nga sa̱ꞌínjínná xindajín

¹⁰ Kó nga fetꞌaa̱ ntsꞌie, ngasakó ngaꞌniújnú ngi̱jii̱n ngaꞌniú xí jee̱ Ndi̱a̱ná.

¹¹ Xikoó jájún xi ꞌbínda yojoo̱ nga fí kján, bo̱a̱ tsꞌén tꞌíndajnú yojojnú, tsi̱ꞌe̱ nga ꞌniú ku̱i̱ndyiajnú kjiꞌanga ka̱mamejeén kꞌo̱ṉcha̱jojnú xindajín ndiabloo̱.

¹² Ngatꞌa̱ jmí tsi xota̱ nga̱sondie xi ndyi̱bixkánjo̱, xi tjiín ngaꞌniú boá xi ndyi̱bixkánjo̱, ko̱jo xi nkꞌa xaá, ko̱jo xi botixómá nga̱sondie jñó xi̱ꞌbi̱, ko̱jo ngaꞌniuú a̱siénni̱xtjin xi ndajín xi tjín nkꞌa jàn.

¹³ Kuíni nga, tꞌíndajnú yojojnú xikoó jájún xi Néná je katsjaá ngayeje ni, tsi̱ꞌe̱ nga skoón yojoo̱, tsi̱ꞌe̱ nga kjo̱chíkjo̱a̱jnú nga kjo̱chó ni̱xtjin xindajiín. Kó ngije tjíndajnú yojojnú ꞌniú ti̱ndyiónjnú.

¹⁴ Kuíni nga ꞌniú ti̱ndyiàjnú. Ti̱ꞌankjiénjnú ni xi ja̱koxi̱i̱, xikoó tsi kui xi ngatamajnú ngo tji̱xin xí ꞌbíkjá ndáyaá ngo nda̱jun. Ti̱ꞌankjiénjnú kjo̱a̱kixi̱i̱ xikoó tsi kui xi ngatamajnú ngo ńjño ki̱cha̱ xi boꞌmá ni̱se̱e̱n ngo nda̱jun.

¹⁵ Ti̱ndyiondajnú nga kꞌuiníjmi̱jnú éntjatsi̱e̱e̱ kjo̱a̱xioó xikoó tsi kui xi ngatamajnú ndié xí boyá ngo nda̱jun.

¹⁶ Ngatsjéni̱xtjin chjábéjnú kjo̱a̱sꞌijii̱n, kó kui xi ngatamajnú xikoó ngo ki̱cha̱ xi ꞌbíchjaá ni xi ndajín xi tsꞌénkjién ngo nda̱jun. Kuí kjo̱a̱sꞌijii̱n xi ngatꞌíchjaá kjiꞌanga xindajín ka̱mamejeén sa̱ꞌínꞌónjnú.

¹⁷ Kó chjábéjnú kjo̱a̱ꞌnaxiéꞌaá, kó kui xi ngatamajnú xikoó ngo ki̱cha̱ xi ꞌbijñaá to̱ko̱ ngo nda̱jun. Kó chjábéjnú eén Néná, kó kui xi ngatamajnú xikoó ngo ki̱cha̱ndojó xi tsi̱ꞌe̱ A̱si̱énni̱xtjii̱n Néná.

¹⁸ Ngatsjéni̱xtjin ndókjo̱a̱jnúu̱ Néná, kó te̱ꞌéndièjnúu̱ nga A̱si̱énni̱xtjii̱n xi ko̱síko̱jójnú nga ko̱ndókjo̱a̱jnú, ti̱ndyiondajnú kó ngata̱ niꞌánkjiejínjnú takónjnú, kó chji̱a̱ꞌatjejnú ngayeje xota̱ tsjiee̱ Néná.

¹⁹ Ti̱ bo̱a̱ ti̱ tsꞌén ndókjo̱a̱tjéjnúꞌun nga ko̱ndókjo̱a̱jnúu̱ Néná, tsi̱ꞌe̱ nga tsja̱ana én xí kꞌuini̱jmì an, ko̱jo tsi̱ꞌe̱ nga stsakjonjín an nga kuichjiá an, kó bo̱a̱ tsꞌén nga ka̱ma koko an ni xi kisiꞌma ngasꞌe̱ xi tsꞌén bokó éntjatsi̱e̱e̱ Néná ngotꞌe̱.

²⁰ Ta̱ngatꞌanii̱ kui nii̱ nga ndo̱bo̱a̱yà tikón an ngotꞌe̱. Xota̱xcha̱à Néná boá án, ndókjo̱a̱tjéjnúꞌun nga ko̱ndókjo̱a̱jnúu̱ Néná tsi̱ꞌe̱ nga stsakjonjín an nga kuichjiá an xikótsꞌèn chjiéngá ku̱i̱chji̱a̱ an.

Pabloo̱ bi̱ tsꞌén katsꞌénkjietꞌa xo̱jo̱o̱n

²¹ Tikikoo̱, nda̱ ntsꞌie xi tjóna, ko̱jo xi kixi̱ tsꞌén xaá Ndi̱a̱ná, ka̱tso̱yàjnú kótsꞌèn tikòn an ko̱jo mí ni xi tjítsꞌen an.

²² Kuíni nga ki̱a̱ tsꞌéntsangiyajnúꞌun jún, tsi̱ꞌe̱ nga ka̱tso̱yàjnú kótsꞌèn tindyionjne̱, kó bo̱a̱ tsꞌén tsja̱angaꞌniuú ini̱ma̱jnú.

²³ Néná xí Na̱ꞌmii̱, ko̱jo Ndi̱a̱ná Jesukristoo̱, nga tsjaá ngayeje ntsꞌié, kjo̱a̱xió, ko̱jo kjo̱a̱tjó, ko̱jo kjo̱a̱sꞌijin.

²⁴ Ngatꞌieé kjo̱a̱nda ngayeje xota̱ xi tjoó Ndi̱a̱ná Jesukristoo̱, ngo kjo̱a̱tjó xi fejín. Bo̱a̱ kjiꞌi.