Xota̱ Éfeso̱ 5 - Xo̱jo̱n eén Néná

Bi̱ tsꞌén akóyá Pabloo̱ kjo̱a̱a̱ nga ku̱i̱ṉtja̱jnú xikoó xota̱ xi tjimá nínga tsijee̱n

¹ Chja̱ꞌángíjnúu̱ Néná, ngatꞌa̱ jún boá xi ndí tjoó kui.

² Kó tjó ti̱ꞌanjo̱jnú ngayeje xotaa̱, xikótsꞌèn tjó katsꞌénná Kristoo̱ nga kꞌientjéná, kó katsjá yojoo̱ xikoó ngo chji̱e̱, ko̱jo kjo̱a̱tjó xi sije̱n kamaá Néná nga kiniꞌánkꞌasꞌiee̱n.

³ Ta̱nga kjo̱a̱tondo̱, ko̱jo ngayeje ni xi ndándí, ko̱jo kjo̱a̱xki̱ꞌá, nde chjiénjín nga ko̱ndókjo̱a̱ kjo̱a̱a̱ kui nii̱ ngi̱jinjnú, ngatꞌa̱ kui nii̱ jmí tsi tsi̱ꞌe̱ xota̱ xi tsjiee̱ Néná.

⁴ Ti̱nde nga ndokjo̱a̱jínjnú én xi tsjáná kjo̱a̱soboá, ko̱jo én xí ta̱xkiya, ko̱jo énkjàn xi chꞌo tsó, ngatꞌa̱ jmí ni chjíjiín kui eén, ta̱sá én xí tsjaá ndokꞌóchjì Néná xí ndókjo̱a̱jnú.

⁵ Ngatꞌa̱ chjiéngá xcha̱jnú kui nii̱: Nga ja̱koxi̱ boá nga kui xota̱ xi ndyi̱tsꞌèn kjo̱a̱tondo̱, ko̱jo xi ni xi ndándí ndyi̱tsꞌèn, ko̱jo xi xki̱ꞌá xi tjimátji̱ngi kje̱ꞌe ne xi Nénájín, nga ngayeje kui xotaa̱ sa̱kójiín nga Kristoo̱ ko̱jo nga Néná xí ko̱tíxomaa̱.

⁶ Ngata̱ ngojín xota̱ xi kꞌo̱ṉcha̱jojnú nga ku̱i̱chji̱a̱jojnú én xí jmí ni chjíjiín, ngatꞌa̱ ta̱ngatꞌanii̱ kui nii̱ nga ndibánié kjo̱a̱xcha̱án Néná kui xota̱ xi ntꞌiéꞌénjiín.

⁷ Ngata̱ ki̱a̱jín niꞌánkamajo̱jnú kui xota̱ xi bo̱a̱ ndyi̱tsꞌe̱én.

⁸ Ngatꞌa̱ kje̱ꞌe ni̱xtjin kixindyionjñójnú, ta̱nga ngotꞌe̱ ꞌne̱, ngije yàjnú Ndi̱a̱ná, jè nínga tsijen tindyiónjnú, kuíni nga ti̱ńtja̱jnú xikoó xota̱ xi tjimá nínga tsijee̱n.

⁹ Ti̱ꞌánjnú ni xi ndaa̱, ko̱jo ni xi kixi̱, ko̱jo ni xi ja̱koxi̱i̱, ngatꞌa̱ kuí nii̱ xi bokó nga nínga tsijee̱n ndokjo̱a̱ ñá.

¹⁰ Ngatsjéni̱xtjin ti̱ndyi̱séjnú mí ni xi tsja maa̱ Ndi̱a̱ná.

¹¹ Kó ngata̱ ki̱a̱jín niꞌánkamajo̱jnú kui xota̱ xi ndyi̱tsꞌèn ni xi jmí ni chjíjiín xi tjimá nínga jñoó, ta̱sá takójnúu̱ nga ndajínkjiꞌi ni xi ndyi̱tsꞌèn.

¹² Ngatꞌa̱ ngaskande soboá má máná nga ndokjo̱a̱ kjo̱a̱a̱ ni ꞌma xi ndyi̱tsꞌèn.

¹³ Ta̱nga ngije ngayeje nii̱ ꞌbíndo tsijen nínga tsijee̱n, ya ngayejee̱, ngatꞌa̱ nínga tsijee̱n tsꞌén tsijen ngayeje nii̱.

¹⁴ Kuíni nga bi̱ tsꞌén tjítꞌa xo̱jo̱n eén Néná: Ti̱ꞌinkjeꞌée̱ yojòo̱, ji xi titsjafé ji, kó ti̱sítji̱n ji ngi̱jii̱n xota̱ xi je jesoón, tsi bo̱a̱ si̱ꞌin ji, Kristoo̱ xí sa̱ꞌíntsijeen.

¹⁵ Tsitsíjen cha̱n cha̱njnúu̱ kótsꞌèn tińtja̱jnú, jmí tsi ku̱i̱ndyionjnú xikoó xota̱ xi makjínjiín ni xi tsi̱ꞌe̱ Néná, ta̱sá ti̱ndyiónjnú xikoó xota̱ xi kjínkón.

¹⁶ Ni xi nda ti̱ꞌánjnú ta̱ xikótsꞌèn sa̱kóndièjnú nga si̱ꞌánjnú, ngatꞌa̱ ja̱ jè yàjnú nga chꞌo kjima kui ni̱xtjin xi̱ꞌbi̱.

¹⁷ Ta̱ngatꞌanii̱ kui nii̱ nga ngata̱ chi̱nijín niꞌánjnú yojojnú, ta̱sá ngatamakjínjnú mí ni xi mejeén Ndi̱a̱ná nga si̱ꞌánjnú.

¹⁸ Ngata̱ niꞌánchꞌi̱jínjnú yojojnú, ngatꞌa̱ xaán xí tsꞌén nga niꞌán ta̱jmì niní, ta̱sá ngasꞌikitsienijnú A̱si̱énni̱xtjii̱n Néná,

¹⁹ nga ko̱ndókjo̱a̱jojnú xingi̱jnú ti̱ꞌankjiénjnú salmo̱, só xi ndaa̱ Néná, ko̱jo só xi bokoyájnú a̱si̱énni̱xtjii̱n, kó ndaàjnú, ko̱jo ti̱ꞌantsjàjnúu̱ Ndi̱a̱ná ngayejee̱ ini̱ma̱jnú.

²⁰ Ngatsjéni̱xtjin te̱ꞌéjnúu̱ ndokꞌóchjì Néná kjo̱a̱a̱ ngayeje nii̱, kui Néná xí Na̱ꞌmii̱, nga si̱ꞌankjiénjnú jaꞌeén Ndi̱a̱ná Jesukristoo̱.

Bi̱ tsꞌén akóyá Pabloo̱ xikótsꞌèn kꞌuíndojo̱ xkjín xotaa̱

²¹ Ja̱kꞌi̱e̱ ja̱ngaján cha̱ndikónjnú xingi̱jnú, xikótsꞌèn yandikónjnú Kristoo̱.

²² Jún xi ínchjínjnú, cha̱ndikónjnú xi̱ꞌinjnú, xikótsꞌèn yandikónjnú Ndi̱a̱ná.

²³ Ngatꞌa̱ xi xi̱ꞌii̱n kuí boá xi tikóntjoón xi chjo̱ón, xikótsꞌèn Kristoo̱ kuí boá xi tikóntjoón ko̱jo xi tsꞌaxiéꞌá xota̱ na̱ngo̱xi̱i̱, kó nga xota̱ na̱ngo̱xi̱i̱ boá xi yojoo̱ Kristoo̱.

²⁴ Kó xikótsꞌèn xota̱ na̱ngo̱xi̱i̱ bendikón Kristoo̱, ti̱ bo̱a̱ ti̱ tsꞌén ínchjiín chjiéngá sku̱i̱e̱ndikón xi̱ꞌii̱n kjo̱a̱a̱ ngayeje nii̱.

²⁵ Jún xi já xi̱ꞌinjnú, ti̱ꞌantjójnú chjo̱ónjnú xikótsꞌèn Kristoo̱ katsꞌéntjó xota̱ na̱ngo̱xi̱i̱, kó ta̱ngatꞌanii̱ kui nga katsjá yojoo̱,

²⁶ kui nii̱ xi katsꞌén nga katsꞌéntsi̱ꞌe̱. Eén katsꞌéntsjieni, kó ndáfoa aniéjónni,

²⁷ tsi̱ꞌe̱ nga xota̱ na̱ngo̱xi̱i̱ kꞌuieé kjo̱a̱je nga kjo̱chó ngindyi̱ko̱n Kristoo̱, kó nga kꞌuiéjiín ni xi ndándí, ko̱jo ni xi chꞌo tsꞌén xcha̱, ngatꞌa̱ Kristoo̱ mejeén nga tsjie ko̱jo nga ndo̱jò kjin kjin ka̱ma xota̱ na̱ngo̱xi̱i̱.

²⁸ Ti̱ bo̱a̱ ti̱ tsꞌén já xi̱ꞌii̱n chjiéngá sa̱ꞌíntjó chjo̱ón xikótsꞌèn tjoó ti̱ kuii̱ yojoo̱. Kui nda̱ xi tjoó chjo̱ón, tjórií ti̱ kuii̱ yojoo̱.

²⁹ Ngatꞌa̱ ngojín xota̱ xi chꞌoo̱ yojoo̱, ta̱sá tsjaá nichinie ko̱jo koo̱n, xikótsꞌénjo̱ Kristoo̱ xota̱ na̱ngo̱xi̱i̱.

³⁰ Ngatꞌa̱ ñá boá xi tindyionjin ni xi yaꞌanii̱ yojoo̱ Kristoo̱.

³¹ “Ta̱ngatꞌanii̱ kui nii̱ nga nda̱ xi xi̱ꞌii̱n ku̱i̱ꞌíjñá na̱ꞌmii̱ ko̱jo na̱aa̱n, tsi̱ꞌe̱ nga sa̱ꞌíngojo̱ yojoo̱ chjo̱ón, kó nga joó nga ta̱ ngo tsí yojo ka̱ma.”

³² Achichí je kui ni xi tjiꞌmaá Néná, ta̱nga tsꞌenkjién án kui nii̱ nga chjiá an kjo̱a̱a̱ Kristoo̱, ko̱jo kjo̱a̱a̱ xota̱ na̱ngo̱xi̱i̱.

³³ Kuíni nga jún, nga ngo nga ngojnú tjó ti̱ꞌánjnú chjo̱ónjnú, xikótsꞌèn tjójnú yojojnú, kó kui xi chjo̱ón ngatamabendikón xi̱ꞌii̱n.