Xota̱ Éfeso̱ 4 - Xo̱jo̱n eén Néná

Bi̱ tsꞌén akóyá Pabloo̱ nga ki̱a̱ tindyionjìi̱n Kristoo̱

¹ Kuíni nga an, nga ndo̱bo̱a̱yà tikòn an ta̱ngatꞌanii̱ Ndi̱a̱ná, ꞌniú míꞌájnúꞌun tsi̱ꞌe̱ nga kixi̱ ku̱i̱ndyionjnú xikótsꞌèn chjiéngá kꞌuíndo xota̱ xi Ndi̱a̱ná tsíchji̱a̱a̱.

² Nga xota̱ xi ni̱ma̱kjo̱a̱, ko̱jo xi ntꞌiéꞌén ka̱majnú, tsie takón ngatamajnú, kó ja̱kꞌi̱e̱ ja̱ngaján ti̱ꞌanchíkjo̱a̱jnúu̱ xingi̱jnú nga kꞌuiéjnú kjo̱a̱tjó.

³ Ti̱ꞌánjnú ngo kjo̱a̱ꞌniú tsi̱ꞌe̱ nga kꞌuiéjnú kjo̱a̱xió, kó ngo xtín chꞌi̱a̱jnú yojojnú xikótsꞌèn katsꞌéngojnú A̱si̱énni̱xtjii̱n Néná.

⁴ Ta̱ ngo tsí yojoo̱ Kristoo̱ má ngayeje ñá, kó ti̱kuíní A̱siénni̱xtjin xi tikónjinná, kó ti̱ bo̱a̱ ti̱ tsꞌén ta̱ ngo tsí kjo̱a̱chiyá xi kandokjo̱a̱ná ñá.

⁵ Ta̱ ngo tsí má Ndi̱a̱ná xí tikón, ko̱jo ta̱ ngo tsí má kjo̱a̱sꞌijii̱n, ko̱jo ta̱ ngo tsí má kjo̱a̱stíndaá.

⁶ Ta̱ ngo tsí má Néná, kui xi Na̱ꞌminá ngayeje ñá, kui xi botixómaá, xi tsꞌénkjién ko̱jo tikónjii̱n ngayeje ni xi tjiín.

⁷ Ta̱nga nga ngo nga ngo ñá jè kasakoná kjo̱a̱nda xi Kristoo̱ kamámejeén katsjáná.

⁸ Kuíni nga bi̱ tsó xo̱jo̱n eén Néná: Kjiꞌanga kijínijíngí nkꞌa jàn kijíjo̱ xi síndoꞌniú, kó katsjaá kjo̱a̱nda xotaa̱.

⁹ Kó mí ni xi mejeén tsó nga “kijínijíngí nkꞌa jàn”. Kuíni nga bo̱a̱ tsó, kjo̱a̱a̱ nga tjón jatjajen nínga na̱nga̱a̱ tꞌanangii̱.

¹⁰ Kó kui xi jatjajee̱n, ti̱kuíní bo̱a̱ xi kijínijíngí ngaskande nínga ꞌniú nkꞌaá nkꞌa jàn, bo̱a̱ tsꞌén nga kisꞌijñajin kui, ngayeje nga̱sondiee̱.

¹¹ Kó kuí boá xi índo nga ngotꞌe̱ tjín já xí apostro̱, ko̱jo xi chji̱ni̱e̱ꞌe̱én Néná, ko̱jo xi ꞌbini̱jmì éntjatsi̱e̱e̱ Néná, ko̱jo xi síndotjoón xota̱ na̱ngo̱xi̱i̱, ko̱jo xi mostro̱.

¹² Tsi̱ꞌe̱ nga ko̱ko̱yaá xota̱ tsjiee̱ Néná xikótsꞌèn ko̱síko̱jo xkjín, kó bo̱a̱ tsꞌén sa̱kó ngaꞌniuú kui xota̱ na̱ngo̱xi̱i̱, kui xi yojoo̱ Kristoo̱.

¹³ Bo̱a̱ ka̱ma ngaskande nga ngayeje ñá, ngo kamá nga sꞌi̱jinná ko̱jo nga xcha̱ ndií Néná, kó nga ka̱ma ñá, xikoó xota̱ xi je xchá xi je ndo̱jò kjin kjin xikoó Kristoo̱.

¹⁴ Bo̱a̱ tsꞌén nga ngiti̱ xikójiín ngo ndí ka̱ma ñá xí ngotjón ngotjón bosíkjo ni xi tsꞌénkjó. Ka̱májín ta̱xkiya kongíntji̱ngí ngo kjo̱a̱bokoyá tja̱tsi̱e̱ xi skjiénná kó kꞌo̱ṉcha̱joná, kui xi bokoyá xota̱ maña̱ xi ndi̱yà xi ndajín tjimaá.

¹⁵ Ta̱sá ni xi ja̱koxi̱i̱ xi ko̱ndókjo̱a̱ nga kꞌuiéná kjo̱a̱tjó, kó xikótsꞌèn kjimaxchá bo̱a̱ kon ka̱ma ngase ndyiojón ndyiojón xikoó Kristoo̱, kui xi ngito̱ko̱o̱ xota̱ na̱ngo̱xi̱i̱.

¹⁶ Kristoo̱ boá xi tjitsꞌénngo ngayeje xota̱ na̱ngo̱xi̱i̱ ta̱ xikó kjiꞌi xá xí tsꞌén nga ngo nga ngo, kó kuí boá xi tsꞌén nga nda tsꞌén ko̱síko̱jo xkjín, tsi̱ꞌe̱ nga ngi̱jii̱n kjo̱a̱tjoó xtjonínkꞌá kui xota̱ na̱ngo̱xi̱i̱.

Bi̱ tsꞌén akóyá Pabloo̱ kjo̱a̱a̱ xikótsꞌèn ku̱i̱ndyión ngindyi̱ko̱n Néná

¹⁷ Kuí ni xi̱ꞌbi̱ xi tꞌíxiánjnúꞌun ngi̱yaa̱ jaꞌeén Ndi̱a̱ná, nga ngiti̱ bo̱a̱jín tsꞌén mindyiónjnú xikótsꞌèn síndo xota̱ xi bejín Néná, kui xota̱ xi síndo xikótsꞌèn ndyi̱tsꞌènkjó chi̱ni.

¹⁸ Kui xotaa̱ kjiꞌijñórií kjo̱a̱kjíntakoón, kó bo̱a̱jín tsꞌén síndo xikótsꞌèn mejeén Néná, ta̱ngatꞌanii̱ nga bejín ni xi ndyi̱tsꞌèn ngatꞌa̱ ta̱nisién tajá ini̱ma̱a̱.

¹⁹ Jè ngiti̱ jmí kjo̱a̱soboájiín, jè katsꞌénkꞌasꞌiee̱n yojoo̱ ni xi ndajín, ko̱jo ngayeje to̱ko̱ya ni xi ndándí ngindyi̱ko̱n Néná.

²⁰ Ta̱nga jún jmí tsi kui nii̱ xi kamájnú nga akakoyájnú kjo̱a̱a̱ Kristoo̱.

²¹ Tsi ja̱koxi̱ nga je kandaꞌyájnú, ko̱jo tsi ja̱koxi̱ nga Kristoo̱ xi akóyájnú, xikó kjiꞌi kui ja̱koxi̱ xi tikoón kui,

²² kuíni nga chjiéngá ngiti̱ bo̱a̱jín tsꞌén mindyiónjnú xikótsꞌèn kixindyionjnú ngasꞌe̱, kjiꞌanga ni xi tsꞌenṉcha̱jojnú xi kamámejénjnú kiniꞌánjnú. Ti̱ꞌantja̱tsi̱e̱yàjnú yojojnú,

²³ kó ngatamatja̱tsi̱e̱ya a̱si̱énni̱xtjinjnú, ko̱jo kjo̱a̱kjíntakónjnú.

²⁴ Ti̱ꞌantja̱tsi̱e̱yàjnú yojojnú xikótsꞌèn Néná tjítsꞌéntja̱tsi̱e̱yajnú, xikótsꞌèn tjíjinkon kui, nga ja̱koxi̱ nga kixi̱ ko̱jo tsjie.

²⁵ Kó kuíni nga ngiti̱ ꞌbíndisójínjnú, ta̱sá én xí ja̱koxi̱ xi ndókjo̱a̱jojnú xotaa̱, ngatꞌa̱ ngayeje ñá, ta̱ ngo tsí yojo ndokjo̱a̱.

²⁶ Tsi si̱ꞌanxchánjnú, ngata̱ niꞌánjéjínjnú, kó nga jmí tsi nga ngo ni̱xtjii̱n nga kꞌuijñájnú kui kjo̱a̱xcha̱án.

²⁷ Ngata̱ boeꞌéndièjínjnúu̱ xindajín ndiabloo̱.

²⁸ Kui xota̱ xi katsꞌénchejé ngasꞌe̱, ngiti̱ bo̱a̱jín nga tsꞌén, ta̱sá ngatsꞌénxá, ngo xá xí nda nga tsꞌén nga sa̱ꞌínkjién tsja, tsi̱ꞌe̱ nga kꞌuieé ngo ni xi tsja̱á xota̱ xi ka̱machjieén ngo ni.

²⁹ Ngata̱ jmí én chꞌo tsó ndokjo̱a̱jínjnú, ta̱sá én nda xi tsja̱angaꞌniuú xotaa̱ xi ndókjo̱a̱jnú, tsi̱ꞌe̱ nga ni xi nda sa̱ko̱ó xota̱ xi ku̱i̱ntꞌiè kuí eén.

³⁰ Ngata̱ niꞌándasénjínjnúu̱ A̱si̱énni̱xtjii̱n Néná, kui xi katseꞌéjnú tsi̱ꞌe̱ nga xcha̱ nga kjo̱tjoꞌajnú ni̱xtjin nga ku̱i̱ndyiondéjnúu̱ jeé ngatsjéni̱xtjin.

³¹ Ti̱ꞌanchꞌójnúu̱ yojojnú kjo̱a̱ndasee̱n, ko̱jo kjo̱a̱xtindaa̱, ko̱jo kjo̱a̱tamaá, ko̱jo kjo̱a̱chaꞌayaá, ko̱jo kjo̱a̱chꞌotsoó, ko̱jo ngayeje ni xi ndajiín.

³² Ta̱sá ndaxota̱ ngatamajnú ja̱kꞌi̱e̱ ja̱ngaján, ni̱ma̱takón ngatamajnú, kó ti̱ꞌanjetakónjnúu̱ ja̱kꞌi̱e̱ ja̱ngaján xingi̱jnú, xikótsꞌèn Néná katsꞌénjetakónjnú ngatꞌaa̱ Kristoo̱.