Xota̱ Éfeso̱ 2 - Xo̱jo̱n eén Néná

Bi̱ tsꞌén akóyá Pabloo̱ kjo̱a̱a̱ nga jatjoꞌa ñá ta̱ngatꞌanii̱ ni xi katsꞌén Kristoo̱

¹ Néná katsjájnú kjo̱a̱mindyion kjiꞌanga jún, xota̱ xi je jesón kamájnú ta̱ngatꞌanii̱ kjo̱a̱a̱ ni xi ndajín xi kiniꞌánjnú, ko̱jo kjo̱a̱a̱ jéjnú,

² kui ni xi kixindyionjinjnú kje̱ꞌe ni̱xtjin, ngatꞌa̱ ki̱a̱ tsangíntji̱ngijnúu̱ nii̱ kui nga̱sondiee̱, kó kiniꞌánjnú ni xi mejeén ngito̱ko̱o̱ a̱siénni̱xtjin xi ndajín, kui xi botixómá ngi̱jin tjo̱o̱, ko̱jo xi tsꞌénxá ngi̱jii̱n xota̱ xi ntꞌiéꞌénjiín Néná.

³ Ti̱ bo̱a̱ ti̱ tsꞌén kixindyión ngayeje ñá kje̱ꞌe ni̱xtjin, nga ki̱a̱ tsangíntji̱ngíi̱, ko̱jo nga kiniꞌánkjatjosóo̱n kui ni xi kamámejeén yojoná, ko̱jo ni xi kiniꞌánkjó. Kuíni nga Néná kamá atíjéná, xikoó xota̱ xi ngasee̱.

⁴ Ta̱nga Néná achichí ꞌniú ni̱ma̱ máa xotaa̱, kó katsꞌénkjién kjo̱a̱tjó jee̱ nga katsꞌéntjóná,

⁵ kó ndatsi je akayà ngi̱jii̱n jéná, nijan katsjáná kjo̱a̱mindyion ko̱jo Kristoo̱. Ta̱ngatꞌaa̱ kjo̱a̱ndaa̱ Néná nga jún je ta̱ jatjoꞌa kjo̱a̱nda tsíjnú.

⁶ Kó Néná nijan katsꞌénkjaꞌáꞌyáná ko̱jo Kristoo̱, kó ki̱a̱ nijan katsꞌénkꞌíndoná ko̱jo Kristo̱ Kjisoo̱ ki̱a̱ ndiꞌakꞌajmii̱,

⁷ bo̱a̱ katsꞌén tsi̱ꞌe̱ nga ni̱xtjin xi sꞌe̱ ndibaá, ko̱kó kókjiꞌi je kjo̱a̱cho̱o̱n kjo̱a̱ndaa̱, ko̱jo xikótsꞌèn nda ni xi katsjáná ñá, ngatꞌaa̱ ni xi katsꞌén Kristo̱ Kjisoo̱.

⁸ Ngatꞌa̱ ta̱ngatꞌanii̱ kjo̱a̱ndaa̱ Néná nga jún je jatjoꞌajnú ngatꞌa̱ kisꞌijinjnú, kó kui nii̱ jmí tsi ngo ni xi jún kasako so̱bo̱a̱jnú, kjo̱a̱nda xi tsi̱ꞌe̱ Néná boá.

⁹ Jmí tsi kjo̱a̱a̱ ni xi ndyi̱niꞌánjnú, tsi̱ꞌe̱ nga jmíjín xi je kꞌo̱xié yojoo̱.

¹⁰ Ngatꞌa̱ Néná boá xi katsꞌéndaná, ngatꞌaa̱ Kristo̱ Kjisoo̱, tsi̱ꞌe̱ nga ni xi nda si̱ꞌán, kui ni xi Néná índa tjón tjón tsi̱ꞌe̱ nga ki̱a̱ ku̱i̱ṉtsomajin ni xi ndaa̱.

Bi̱ tsꞌén íni̱jmì Pabloo̱ kjo̱a̱a̱ kjo̱a̱xió xi tjínná ngatꞌaa̱ Kristoo̱

¹¹ Kó kuíni nga jún xi xota̱ xi jundío̱jínjnú ndeskande koó nga katsenjnú, ngatjaꞌátsjienjnú nga kje̱ꞌe ni̱xtjin “xota̱ xi kiniꞌánjiín sirkunsisio̱n” katsójnú kui xota̱ jundío̱ xi je katsꞌeén sirkunsisio̱n yojoo̱.

¹² Kui ni̱xtjin jàn kjin kixindyionnijnúu̱ Kristoo̱, kó xín kixindyionnijnúu̱ xota̱ Israee̱l, kó nde tsa̱júnjín kamá ni xi índajo̱ Néná xi katsóyàtjón nga tsja̱á xota̱ xi tsi̱ꞌe̱, kisꞌiejínjnú kjo̱a̱chiyá, ko̱jo kisꞌiejínjnú Néná kꞌi̱e̱ kui nga̱sondiee̱.

¹³ Kjin kixindyionjnú kje̱ꞌe ni̱xtjin, ta̱nga ngotꞌe̱ ꞌne̱ ngatꞌaa̱ Kristo̱ Kjisoo̱ je tiña tindyiónjnú, ta̱ngatꞌanii̱ nga kꞌien Kristoo̱.

¹⁴ Ngatꞌa̱ Kristoo̱ boá xi kjo̱a̱xióná, kó kuí boá xi xota̱ ngo tji̱e̱ katsꞌén xota̱ xi jundío̱ ko̱jo xi jundío̱jín, kó katsꞌénkjié kui ni xi kondra̱ kamánii̱ nga ndajín tsaꞌa xkjín kuí xotaa̱, kui xi xikoó tsi ngo xó xí kisꞌijña ngamasiee̱n.

¹⁵ Kristoo̱ katsjá yojoo̱ nga katsꞌénkjié kjo̱a̱kiti xi kjín ni tjítꞌaa̱, kó nga jó tjín xota̱ na̱xi̱ńdaá ta̱ ngo tsí tji̱e̱ katsꞌén, nga katsꞌénda ngo tjín xota̱ na̱xi̱ńdá xí tja̱tsi̱e̱ xi katsꞌéngojo̱ yojoo̱ kui, kó kuí boá xi katsꞌén nga nda tsaꞌa nginí xkjín nga ngo nga ngo.

¹⁶ Kꞌientꞌa kui kroo̱, tsi̱ꞌe̱ nga ta̱ ngo tsi yojo katsꞌén nga jó tji̱e̱e̱ xota̱ na̱xi̱ńdaá, kó yíndajo̱ Néná nga katsꞌénkjié ni xi kondra̱ kamánii̱ nga ndajín tsaꞌa xkjín nga jó kui na̱xi̱ńdaá.

¹⁷ Kristoo̱ jeꞌetsjá éntjatsi̱e̱ xi yaꞌa kjo̱a̱xioó. Kó bo̱a̱ tsꞌén kasakojnú kjo̱a̱xioó jún xi kjin kixindyionnijnúu̱ Néná ngasꞌe̱, kó ti̱ kasakoo̱ xota̱ xi tiña síndonii̱ Néná nga.

¹⁸ Kó ngatꞌaa̱ Kristoo̱ nga xota̱ xi jundío̱ ko̱jo xi jundío̱jín ta̱ ngo tsí A̱siénni̱xtjin tikónná, kó ka̱ma kjóchochontiñáa̱ Na̱ꞌmii̱.

¹⁹ Kó kuíni nga jún, jè ngiti̱ xota̱ xi xín nangijínjnú, ko̱jo tsi xota̱ xi timasónjnú, jè xota̱ tsjiee̱ Néná jún, kó jèe kꞌi̱e̱ ndokjo̱a̱nijnú ndiꞌaa̱ Néná.

²⁰ Jún xikónií ngo ndiꞌa nkꞌa xi kjimanda kui xi já apostroo̱, ko̱jo já chji̱ni̱e̱ꞌe̱én Néná ítjatsꞌennii̱ nga ndyi̱kjininkꞌa, kó Jesukristoo̱ boá kui xi ndi̱jo̱ ngaꞌniuú kui ndiꞌaa̱.

²¹ Kristoo̱ boá xi be kótsꞌèn nga nda kjimanda kui ndiꞌaa̱, kó kui ndiꞌaa̱ kjimanda ngaskande nga ngo na̱ngo̱xi̱ tsjiee̱ Ndi̱a̱ná ka̱ma.

²² Ta̱ngatꞌanii̱ nga ngo majo̱jnú Kristoo̱, nga jún xí ka̱majnú xikoó ngo na̱ngo̱xi̱ nínga kꞌuijñá A̱si̱énni̱xtjii̱n Néná.