Xota̱ Ebreo̱ 8 - Xo̱jo̱n eén Néná

Bi̱ tsꞌén tjibóko nga Kjisoo̱ boá xi ngo chináꞌmi xi ꞌniú nkꞌa xaá

¹ Ngayeje ni xi ndyi̱chiboá, kuí ni xi̱ꞌbi̱ xi ꞌniú chjínií: Nga tikónná ngo chináꞌmi xi ꞌniú nkꞌa xaá, kui xi tikón nga fojnií kui Néná xí tsꞌénbotixómá ndiꞌakꞌajmii̱.

² Kuí boá xi tjiín xaá Néná ki̱a̱ na̱ngo̱xi̱ ndikoón, kuí boá xi ngi̱ndie ndikón xi iskjininkꞌa Ndi̱a̱ná, jmí tsi xotaa̱ xi iskjininkꞌa.

³ Ngayeje chináꞌmi xi ꞌniú nkꞌa xaá katseꞌéxárií tsi̱ꞌe̱ nga sa̱ꞌínkꞌasꞌien chji̱e̱ ko̱jo kjo̱a̱tjó, kó kuíni nga Jesukristoo̱ ti̱ chjiéngá kꞌuieé ngo ni xi sa̱ꞌínkꞌasꞌien nga.

⁴ Tsi kꞌi̱e̱ tikón kui nga̱sondiee̱, nde chináꞌmijín kamá, ngatꞌa̱ kꞌi̱e̱e̱ jè síndo chináꞌmi xi tsꞌenkꞌásꞌién kjo̱a̱tjó xikó tsó kjo̱a̱kitii̱.

⁵ Ngi̱ndie ndikón xí ja̱koxi̱i̱ ndiꞌakꞌajmi jàn tikón, kó ki̱a̱ katjoꞌótꞌani kui xi tikón kui nga̱sondiee̱ nínga tsꞌénxá chináꞌmii̱. Ngatꞌa̱ kjiꞌanga Moisee̱ skjinínkꞌá ngo ngi̱ndie ndikón xí tsi̱ꞌe̱ Néná, Néná bi̱ katsoó: “Ti̱ꞌinde ji ngayeje nii̱, xikótsꞌèn akoo ji ngo chi̱bo̱a̱ ki̱a̱ tji̱ngi̱i̱.”

⁶ Ta̱nga kui xá xí Néná katsjaá Jesukristoo̱, kui chináꞌmi xi ꞌniú nkꞌa xaá, nda ngase, kó ngatꞌaa̱ kuí boá nga Néná katsꞌén ngo kjo̱a̱ꞌbínda xi nda ngase, ngatꞌa̱ Néná katsóyàtjón nga nda ngase ni xi tsja̱á xota̱ xi tsi̱ꞌe̱.

Bi̱ tsꞌén tjibóko kjo̱a̱ꞌbínda tja̱tsi̱e̱e̱ Néná

⁷ Ngatꞌa̱ tsi kui kjo̱a̱ꞌbínda xi tjoón jmí ni kichajájiín, nde chjiénjínra̱ nga kisꞌijña xi ma joó kjo̱a̱ꞌbíndaa̱.

⁸ Ta̱nga Néná kasasienjiín ni xi katsꞌén kui xotaa̱, kuíni nga bi̱ katsó xikótsꞌèn tjítꞌa xo̱jo̱o̱n: Bi̱ katsó Ndi̱a̱ná: Sꞌe̱ kjo̱chó ni̱xtjin, kjiꞌanga sa̱ꞌinjo̱ an ngo kjo̱a̱ꞌbínda tja̱tsi̱e̱ xota̱ Israee̱l, ko̱jo xota̱ na̱xi̱ńdá Jundáa̱.

⁹ Kui kjo̱a̱ꞌbíndaa̱ jmí tsi bo̱a̱ kꞌuié xikoó kui xi katsꞌenjo̱ an xota̱ tji̱e̱ xchaá, kjiꞌanga iskjíbé án tsja nga tsꞌaxié an nangi Ejipto̱, ngatꞌa̱ kui xotaa̱ katsꞌénkjatjosónjín kjo̱a̱ꞌbínda xi tjoón, kó án índomasien an.

¹⁰ Kjiꞌa ngije bo̱a̱ ka̱ma, kuí ni xi̱ꞌbi̱ xi kꞌuindajo̱ an xota̱ Israee̱l: Jaskan ngije jaꞌa kui ni̱xtjii̱n, ngi̱jii̱n kjo̱a̱kjíntakoón kꞌuijñájin an kjo̱a̱kitina, kó nga̱són ini̱ma̱a̱ sa̱ꞌinꞌindó an. Án xí Nee̱ kui ka̱ma an, kó kuí boá xi xota̱ na̱xi̱ńdána ka̱ma.

¹¹ Kó nde ngojín xi ko̱kóyaá xota̱a̱, ti̱nde ngojín xi bi̱ ka̱tso̱o̱ ntsꞌi̱e̱: Chjiéngá xchi̱e̱ ji Ndi̱a̱ná, ngatꞌa̱ ngayejee̱ nga sku̱i̱e̱na, ndeskande xi ꞌniú chichií, ngaskande xi ꞌniú xchaá.

¹² Ngatꞌa̱ sa̱ꞌinjetakóo̱n ni xi kixi̱jín xi katsꞌén, kó nginijánjín kjo̱a̱ꞌátsjienna jeé, ko̱jo ni xi ndajín xi katsꞌén.

¹³ Kó kjiꞌanga Néná chji̱a̱ kjo̱a̱a̱ ngo kjo̱a̱ꞌbínda xi tja̱tsi̱e̱, tjítsó nga je ngiti̱ chjíjiín kjo̱a̱ꞌbínda xi tjoón, kó ngo ni xi je xchá ko̱jo xi je kjimaxchá, je ta̱ chiboa tsí chajaa̱ nga xcha̱ja.