Xota̱ Ebreo̱ 7 - Xo̱jo̱n eén Néná

Bi̱ tsꞌén tjibóko xaá chináꞌmi Melkisendee̱k

¹ Melkisendee̱k nda̱ ree̱ nangi Salee̱n, ko̱jo chináꞌmii̱ kui Néná xi tikón ndiꞌakꞌajmi jàn, kuí boá xi kijíkjaꞌáyíndi̱yà Abraa̱n ngije kjindibáni ngi̱jii̱n kjo̱a̱xchán nínga ja̱bo̱a̱ je katsꞌeén já ree̱, kó Melkisendee̱k tsíꞌá tsi̱ꞌe̱ nga Néná sa̱ꞌínchikonñé,

² kó Abraa̱n katsꞌénkꞌasꞌiee̱n kui nda̱ ree̱, tie nga úchán ngayeje ni xi kasakoo̱ xi katsꞌén kui kjo̱a̱xcha̱án. Jaꞌeén Melkisendee̱k, “nda̱ Re xi kixi̱” tsó, ko̱jo Ree̱ nangi Salee̱n, kó kui jaꞌeén “Re xi tjiín kjo̱a̱xió” tsó.

³ Melkisendee̱k kisꞌiejiín na̱ꞌmi ko̱jo na̱an ko̱jo xota̱ xi xchá, ti̱nde katsenjín ti̱nde kꞌienjín, yàjín ñá kjindibáni, kó xá chináꞌmii̱ tikón ngatsjéni̱xtjin, xikoó kui xi tsi̱ꞌe̱ ndií Néná.

⁴ Tsitsíjenjnúu̱ kókjiꞌi nkꞌa kamá xaá Melkisendee̱k, nga ti̱ kuii̱ xota̱ tji̱e̱ xcháná xi ꞌmí Abraa̱n katsjaá tie nga úchán ni xi katsꞌeén já ree̱ ngi̱jii̱n kjo̱a̱xcha̱án.

⁵ Kó ja̱koxi̱ boá nga bi̱ tsó kjo̱a̱kitii̱, nga chináꞌmi xi xota̱ tji̱e̱e̱ nda̱ xi ꞌmí Lebii̱, tjiín ngo kjo̱a̱ꞌniú nga skjíbé tie nga úchaán ngayeje ni xi tsꞌén xota̱ na̱xi̱ńdaá, ndatsi xkjín má, ngatꞌa̱ ti̱ xota̱ tji̱e̱e̱ Abraa̱n chji̱a̱ni.

⁶ Ta̱nga Abraa̱n tie nga úchaán ni xi katsꞌén katsꞌénkꞌasꞌiee̱n Melkisendee̱k ndatsi kui nda̱a̱ xota̱ tji̱e̱e̱ Lebii̱jín chji̱a̱ni, kó Melkisendee̱k tsíchji̱a̱a̱ Néná tsi̱ꞌe̱ nga katsꞌénchikonñé kui xi ja̱bo̱a̱ je kasakoo̱ ni xi katsóyàtjón Néná nga tsja̱á.

⁷ Kó je yá cha̱n cha̱n ñá nga nkꞌa ngase xaá xi chji̱a̱a̱ Néná, tsi̱ꞌe̱ nga Néná sa̱ꞌínchikonñé ngo xi ngindie ngase xaá.

⁸ Chináꞌmi xi chji̱a̱ni xota̱ tji̱e̱e̱ Lebii̱ xi ngotꞌe̱ niꞌánkꞌasꞌiee̱n tie nga úchaán ni xi niꞌaán, xota̱ xi fesón boá, ta̱nga Melkisendee̱k, ta̱kó tikón, ngatꞌa̱ xo̱jo̱n eén Néná chji̱a̱jín tsi kꞌien kui nda̱a̱.

⁹ Kó ngaskande ka̱ma bi̱ kꞌuin, nga kui chináꞌmi xi chji̱a̱ni xota̱ tji̱e̱e̱ Lebii̱, ti̱ je katsꞌénkꞌasꞌiee̱n Melkisendee̱k tie nga úchaán nii̱ nga, ngatꞌa̱ Abraa̱n boá xi katsꞌénkꞌasꞌien kui nii̱ ngajoo̱ xota̱ tji̱e̱e̱,

¹⁰ ngatꞌa̱ kjiꞌanga Melkisendee̱k kijíkjaꞌáyíndi̱yà Abraa̱n, Abraa̱n ja̱bo̱a̱ jè yaꞌa ngi̱jin yojoo̱ kui xi xota̱ tji̱e̱e̱ ka̱ma, xi kji̱e̱ tsenjiín kui ni̱xtjin jàn.

Bi̱ tsꞌén tjibóko ánní nga ngo chináꞌmi xi tja̱tsi̱e̱ kamáchjién

¹¹ Néná katsjaá kjo̱a̱kitii̱ xota̱ na̱xi̱ńdá Israee̱l. Kui kjo̱a̱kitii̱ kamánda ta̱ngatꞌanii̱ nga kui chináꞌmi xi chji̱a̱ni Lebii̱ ko̱síko̱jo tsi̱ꞌe̱ nga kui xotaa̱ kixi̱ kꞌuíndo ngindyi̱ko̱n Néná. Ta̱nga nga kui chináꞌmii̱ kamájiín katsꞌén kui xaá, kuíni nga jatjokjà ngo chináꞌmi xi kje̱ꞌe: Ngo xi jmí tsi chináꞌmi xi chji̱a̱ni Aaroo̱n, ta̱sá ngo xi xikoó Melkisendee̱k.

¹² Ngatꞌa̱ kjiꞌanga sa̱síkjo xá chináꞌmii̱, kjo̱a̱ꞌniútjínnií nga ti̱ sa̱síkjo kjo̱a̱kitii̱ nga.

¹³ Ngatꞌa̱ kui chináꞌmi xi kje̱ꞌeé, kui xi tjindókjo̱a̱a̱, kuí boá xi Kjisoo̱, kó kje̱ꞌe xota̱ tji̱e̱e̱ xota̱ Israee̱l chji̱a̱ni, nínga kji̱e̱ ngo chináꞌmi fotjojin.

¹⁴ Ngatꞌa̱ je ya cha̱n cha̱n nga Ndi̱a̱ná Jesukristoo̱, ki̱a̱ kjindibáni xota̱ tji̱e̱e̱ Jundáa̱, kó Moisee̱ jmí ni katsójín nga kui xota̱ tji̱e̱e̱ ki̱a̱ kjo̱tjojinni chináꞌmi.

¹⁵ Kó ꞌniú ngase nda ka̱makjínná ni xi ndyi̱ndokjo̱a̱ kꞌi̱e̱e̱ ngatꞌa̱ kui chináꞌmi tja̱tsi̱e̱e̱ xi jeꞌee̱, bo̱a̱ kjíꞌí xaá xikoó xá chináꞌmii̱ Melkisendee̱k.

¹⁶ Kui xi jmí tsi katseꞌeé kui xá chináꞌmii̱ ta̱ngatꞌanii̱ ngo kjo̱a̱botíxoma xi tsáyà ñá xota̱ tji̱e̱ ndibání já chináꞌmii̱, ta̱sá katseꞌéxaá ngatꞌa̱ tjiín ngaꞌniú nga kꞌuijñá ngatsjéni̱xtjin, májín ꞌme.

¹⁷ Ngatꞌa̱ jè bi̱ tsꞌén kjitꞌa nínga ndokjo̱a̱ kjo̱a̱a̱ kui: Jí xí chináꞌmi ji ngatsjéni̱xtjin, bo̱a̱ kjiꞌi xáa̱ xikoó xá xí tsi̱ꞌe̱ chináꞌmi Melkisendee̱k.

¹⁸ Ja̱ bo̱a̱ tsꞌén nga kui kjo̱a̱kiti xchaá jè ngiti̱ jmí ni chjíjiín, ngatꞌa̱ kisꞌiejiín ngaꞌniú ko̱jo asíko̱jojínná,

¹⁹ ngatꞌa̱ kjo̱a̱kitii̱ kamájiín katsꞌén xotaa̱ xi chjiéngá ka̱ma, ta̱nga ngotꞌe̱ ꞌne̱, tikónná ngo kjo̱a̱chiyá xi nda ngase, kuí kjo̱a̱a̱ nga ndyi̱niꞌántiñáa̱ yojoná Néná.

²⁰ Kjiꞌanga kamá kui nii̱, Néná katsjá tsꞌoa nga bo̱a̱ ka̱ma.

²¹ Ta̱nga nga katsjáxaá chináꞌmi xi chji̱a̱ni xota̱ tji̱e̱e̱ Lebii̱ bo̱a̱jín katsꞌén. Kó kjo̱a̱a̱ kui chináꞌmi xi̱ꞌbi̱, Néná xí katsjá tsꞌoa nga kui xi ka̱ma chináꞌmi, kó bi̱ tsꞌén tjítꞌa xo̱jo̱n eén Néná: Néná katsjá tsꞌoa nga bo̱a̱ ka̱ma, kó ko̱síkjojín ni xi je bi̱ katsó: Jí xí chináꞌmi ji ngatsjéni̱xtjin, bo̱a̱ kjiꞌi xáa̱ xikoó xá xi tsi̱ꞌe̱ chináꞌmi Melkisendee̱k.

²² Kuíni nga Kjisoo̱ boá xi bokóná nga Néná katsꞌén ngo kjo̱a̱ꞌbínda tja̱tsi̱e̱ xi nda ngase.

²³ Kó chináꞌmi xi ngasee̱ kjín kamá, ngatꞌa̱ kjo̱a̱bo̱yaa̱ katsjandièjiín nga ta̱kó sa̱ꞌínra kui xaá,

²⁴ ta̱nga kꞌienjín Kjisoo̱, ngatꞌa̱ ngatsjéni̱xtjin nga tikón xá chináꞌmii̱, kó jmí tsi kje̱ꞌe xí sa̱ko̱ó.

²⁵ Kó kuíni nga Kristoo̱ maa̱ ꞌboxiéꞌá ngatsjéni̱xtjin ngayeje xota̱ xi ngatꞌaa̱ kui nga tsꞌéntíñaa̱ yojoo̱ Néná, ngatꞌa̱ ngatsjéni̱xtjin tikón, tsi̱ꞌe̱ nga ku̱i̱ꞌatjé nga ku̱i̱chji̱a̱a̱ Néná kjo̱a̱a̱ kui xotaa̱.

²⁶ Kjisoo̱ kuí boá kui chináꞌmi xi ꞌniú nkꞌa xaá xi machjiénná ñá: Kuí xí tsjie, kuí xí jmíjiín ni xi ndajín, kuí xí jmíjiín ni xi ndándí, kuí xí xín tikónnii̱ xota̱jeé, kuí xí ꞌniú niꞌándikón ki̱a̱ ndiꞌakꞌajmii̱,

²⁷ kuí xí chjiénjiín nga sa̱ꞌínkꞌasꞌien kjo̱a̱tjó ndyiojón ndyiojón, xikoó chináꞌmi xi ꞌniú nkꞌa xaá xi chjiéngá tjón mára sa̱ꞌínkꞌasꞌien ngo kjo̱a̱tjó kjo̱a̱a̱ jeé, sꞌe̱ jaskan kjo̱a̱a̱ jeé xota̱ na̱xi̱ńdaá. Ngatꞌa̱ Kjisoo̱ ta̱ ngo tsí ndi̱yà ko̱jo ngatsjéni̱xtjin nga katsꞌénkꞌasꞌien yojoo̱.

²⁸ Kjo̱a̱kitii̱ katsjáxaá chináꞌmi xi ꞌniú nkꞌa xaá xi niꞌin kamaá nga katsꞌénkjatjosón ni xi katsꞌénkjó Néná. Jaskan ngije katseꞌé kjo̱a̱kitii̱, Néná katsjá tsꞌoa nga tsja̱á ngo chináꞌmi xi ꞌniú nkꞌa xaá, kó kuí boá xi ndií, kui xi ngatsjéni̱xtjin kamá xi chjiéngá ka̱ma.