Xota̱ Ebreo̱ 5 - Xo̱jo̱n eén Néná

¹ Ngayeje chináꞌmi xi ꞌniú nkꞌa xaá xi tjoꞌójin ngi̱jii̱n xotaa̱, katseꞌéxárií ngindyi̱ko̱n Néná, tsi̱ꞌe̱ nga kui xi tsja̱á chji̱e̱ ko̱jo kjo̱a̱tjó xi si̱ꞌankꞌasꞌiee̱n Néná kjo̱a̱a̱ jeé xotaa̱.

² Kui chináꞌmii̱ ka̱maa̱ kꞌuieé kjo̱a̱chiyákjo̱a̱ kjo̱a̱a̱ xota̱ xi ndajín makjiín ngo ni, ko̱jo xota̱ xi tjimá kichajá ndi̱ya̱à Néná, ngatꞌa̱ ti̱ xota̱ boá kui chináꞌmi xi ꞌniú nkꞌa xaá nga,

³ kó ta̱ngatꞌanii̱ kui nii̱ nga chjiéngá sa̱ꞌínkꞌasꞌien chji̱e̱ kjo̱a̱a̱ jé xí tsi̱ꞌe̱, ko̱jo kjo̱a̱a̱ jeé xota̱ na̱xi̱ńdaá.

⁴ Ngojín xota̱ xi ka̱maa̱ nga kui soboá sa̱ꞌín yojoo̱ ngo chináꞌmi xi ꞌniú nkꞌa xaá, Néná boá xi tsíchji̱a̱a̱, xikoó nda̱ xi ꞌmí Aaroo̱n.

⁵ Ti̱ bo̱a̱ ti̱ tsꞌén jmí tsi Kristoo̱ xi katsjá soboaá kjo̱a̱je yojoo̱ nga chináꞌmi xi ꞌniú nkꞌa xaá kamá, Néná boá xi katsjaá kui kjo̱a̱ndaa̱ nga bi̱ katsoó: Jí xí ndína ji, án xí Na̱ꞌmíi̱ an, ngotꞌe̱.

⁶ Kó ti̱ bi̱ ti̱ tsó ingo ndiè xo̱jo̱n eén Néná: Jí xí boá chináꞌmi xi ngatsjéni̱xtjii̱n, bo̱a̱ kjiꞌi xáa̱ xikoó xá xi tsi̱ꞌe̱ chináꞌmi Melkisendee̱k.

⁷ Kó kjiꞌanga kisꞌijña Kristoo̱ kui nga̱sondiee̱, ꞌniú tsíꞌá kó achichí askjandá nga tsíchji̱a̱a̱ kui Néná xi ka̱maa̱ nga xín sa̱ꞌínkjaꞌàa̱ kjo̱a̱bo̱yaa̱, kó Néná tsintꞌieé, ta̱ngatꞌanii̱ nga kamábendikón Néná.

⁸ Kó ndatsi ndií Néná kuí, tsie kjo̱a̱ni̱ma̱ jaꞌatio nga kamaá kandaꞌyáꞌén.

⁹ Kó ngije Kristoo̱ kamá xi chjiéngá ka̱ma kui, kuí boá xi kamá kui xi ngatsjéni̱xtjin kꞌo̱xiéꞌá kui xota̱ xi ndyi̱ntꞌièꞌeén.

¹⁰ Kó Néná katsꞌén nga kui xi kamá chináꞌmi xi ꞌniú nkꞌa xaá, xikoó xá xi tsi̱ꞌe̱ chináꞌmi Melkisendee̱k.

Bi̱ tsꞌén tjibóko kjo̱a̱a̱ nga chjiéngá ꞌniú ku̱i̱ndyionjo̱ kjo̱a̱sꞌijinná

¹¹ Kjo̱a̱a̱ kui nii̱, achichí ni xi tikónjne̱ xi kꞌuiyájne̱ jún, ta̱nga achichí niꞌin nga kꞌuiyá cha̱n cha̱njne̱, ngatꞌa̱ jún ndajín makjínjnú.

¹² Chjiéngá je mostro̱ ka̱majnú katsaki, nga je tsienii̱ nga kandaꞌyájnú éntjatsi̱e̱e̱, ta̱nga ta̱sá chjiénjnú nga ingo ndi̱yà kꞌuiyá nginíjnuú kjo̱a̱bokoyaá Néná kui xi tjón bokoyaá. Jè ja̱ kon ndínda kjimajnú jún ngatꞌa̱ xikoó tsi ntsjén chjiéngá sꞌi̱o̱jnú, jmí tsi nichinie.

¹³ Kó ngayeje xi ntsjén ꞌbii̱, xikónií ndí xi sꞌe̱ kjiyojotꞌa chiki, nde ka̱májiín sku̱i̱e̱ ni xi kixi̱ ngindyi̱ko̱n Néná.

¹⁴ Ta̱nga nichiniee̱, tsi̱ꞌe̱ xota̱ xi xchaá boá, xi je maa̱ be ni xi nda ko̱jo ni xi ndajín, ngatꞌa̱ jè kamángaá nga ndyi̱tsꞌènkjién kjo̱a̱kjíntakoón.