Xota̱ Ebreo̱ 4 - Xo̱jo̱n eén Néná

¹ Ta̱kó tikónná ngi̱ndie nga ku̱i̱tjásꞌi̱e̱n ngi̱ya nínga niꞌánkjaꞌyá xi tsjaá xota̱ xi tsi̱ꞌe̱ Néná, xikó katsó nga katsóyàtjón, kuíni nga xchóo̱n yojoná, ngatꞌa̱ achichíra̱ ndasen kjiꞌi tsi tjín jún xi ka̱májín kjo̱chó kui ngi̱ndiee̱.

² Ngatꞌa̱ ñá ti̱ je ikꞌíni̱jmìná kuí éntjatsi̱e̱e̱ xikoó kui xotaa̱ nga, ta̱nga kui, ta̱ kjo̱a̱ndaní nga ikꞌíni̱jmi̱ì kui eén, ngatꞌa̱ katsꞌénsꞌijinjiín kui xota̱ xi tsintꞌié kuí eén.

³ Ta̱nga ñá xi je kisꞌijinná, ku̱i̱tjásꞌi̱e̱n ñá kui ngi̱ndie nínga tsꞌénkjaꞌyá xota̱ xi tsi̱ꞌe̱ Néná, ngatꞌa̱ bi̱ katsó Néná: Kó kuíni kjiꞌanga katsꞌenxchán án, ja̱koxi̱ nga bi̱ sa̱ꞌin an kixiáa̱n: “Kꞌo̱sꞌienjín kui xotaa̱ ngi̱ndie xi tsjàa̱ nínga tsꞌénkjaꞌyá xota̱ xi tsa̱ꞌa̱n.” Ndatsi Néná je kamándo̱jo̱ó xá xí katsꞌén ndeskande koó nga katsꞌénda nga̱sondiee̱.

⁴ Ngatꞌa̱ bi̱ tsꞌén tjítꞌa xo̱jo̱n eén Néná kjo̱a̱a̱ ni̱xtjin xi ma yitoo̱: Kó katsꞌénkjaꞌyá Néná xi ma yito ni̱xtjin kjo̱a̱a̱ ngayeje ni xi katsꞌén.

⁵ Kó ti̱ bi̱ ti̱ tsó ngase kꞌi̱e̱e̱: “Kꞌo̱sꞌienjín kui xotaa̱ ngi̱ndie xi tsjàa̱ nínga tsꞌénkjaꞌyá xota̱ xi tsa̱ꞌa̱n.”

⁶ Kuíni nga ta̱kó chaja ngase nga tjín xí kꞌo̱sꞌien kui ngi̱ndie nínga niꞌánkjaꞌyaá Néná, ngatꞌa̱ kui xota̱ xi tjón ikꞌíni̱jmi̱ì kui éntjatsi̱e̱e̱, tsꞌasꞌienjín ta̱ngatꞌanii̱ kjo̱a̱kitikjo̱a̱a̱.

⁷ Kó Néná ingo ni̱xtjin íjñá ngotꞌe̱ nga bi̱ tsó: Ngotꞌe̱ ꞌne̱, katsó ngije je jaꞌa kjín nó, nga katsꞌénkíchji̱a̱ Ndabii̱: Tsi ngotꞌe̱ ko̱nda̱ꞌyájnú nda̱a̱. Ngata̱ niꞌántajajínjnú ini̱ma̱jnú.

⁸ Ngatꞌa̱ tsi Josuee̱ xi katsjaá ngi̱ndie nínga niꞌánkjaꞌyá kui xota̱ xi chji̱a̱ni Israee̱l, ja̱ Néná ngiti̱ tsíchji̱a̱jín nga tsja̱á kje̱ꞌe ni̱xtjin tsobo̱a̱.

⁹ Kó kuíni nga ta̱kó tikoón ngi̱ndie nga kꞌo̱sꞌien xotaa̱ ki̱a̱ nínga niꞌánkjaꞌyá xi tsi̱ꞌe̱ xota̱ na̱xi̱ńdaá Néná.

¹⁰ Ngatꞌa̱ kui xota̱ xi ꞌbosꞌien ngi̱ndie nínga niꞌánkjaꞌyá xi tsi̱ꞌe̱ xota̱a̱ Néná, ti̱ tsꞌénkjaꞌyá kjo̱a̱a̱ xá xí ndyi̱tsꞌèn, xikótsꞌèn Néná katsꞌénkjaꞌyá kjo̱a̱a̱ xá xí katsꞌén.

¹¹ Ja̱ kuíni nga chjiéngá si̱ꞌán ngo kjo̱a̱ꞌniú tsi̱ꞌe̱ nga ku̱i̱tjásꞌi̱e̱n kui ngi̱ndie nínga niꞌánkjaꞌyaá, tsi̱ꞌe̱ nga ngojín xi ko̱e̱je̱tji̱ngi kui chi̱bo̱a̱ xi íjñá kui xota̱ xi tsintꞌiéꞌénjiín.

Bi̱ tsꞌén tjibóko ngaꞌniú xi tjiín eén Néná

¹² Ngatꞌa̱ eén Néná, tikón, kó tjínrií ngaꞌniú, kó kuí xí yojó ngase ta̱bo̱a̱jiín ngo ki̱cha̱ xi yojó nga jó ngoboaá, kó kui eén ꞌbosꞌien ngaskande nínga ꞌniú na̱nga̱a̱ ini̱ma̱a̱ ko̱jo a̱si̱énni̱xtjii̱n, ko̱jo nínga tjíkjoo̱ ńdaa̱, ko̱jo ngi̱jii̱n ńdaa̱, kó kuí boá xi kotꞌa kjo̱a̱kjíntakoón, ko̱jo ni xi mejeén sa̱ꞌín ngo ini̱ma̱.

¹³ Kó jmíjín ngo ni xi Néná katsꞌénda xi ka̱maꞌmaa̱ yojoo̱ ngindyi̱ko̱n kui, ta̱sá ngayeje nii̱ xi síndo tsijen ko̱jo ya cha̱n cha̱n ngindyi̱ko̱n kui Néná, kui xi chjiéngá si̱ꞌankꞌasꞌiée̱n xki̱i̱.

Bi̱ tsꞌén tjibóko nga Kjisoo̱ boá chináꞌminá xi ta̱nisién nkꞌa xaá

¹⁴ Kuíni nga ꞌniú ku̱i̱ndyión nga kongíntji̱ngí kui kjo̱a̱sꞌijin xi timatji̱ngí, ngatꞌa̱ tikónna ngo chináꞌmi xi ꞌniú nkꞌa xaá xi jaꞌatjoón ndiꞌakꞌajmii̱, kó kuí boá xi Kjisoo̱, ndií Néná.

¹⁵ Ngatꞌa̱ tikónná ngo chináꞌmi xi ꞌniú nkꞌa xaá xi ma ni̱ma̱a̱ kjo̱a̱ꞌindaná, kui xi je kachjatꞌayákón xikoó ñá, ta̱nga katsꞌénjéjín.

¹⁶ Si̱ꞌantiñáa̱ yojoná tsobo̱a̱, kó si̱ꞌanꞌniátakón Néná xi botixómáná, ko̱jo xi tsjáná kjo̱a̱ndaa̱, tsi̱ꞌe̱ nga sa̱kóná kjo̱a̱ni̱ma̱takoón, kó sa̱kóná kjo̱a̱ndaa̱ kjiꞌá má nga ka̱machjiénná kuí.