Xota̱ Ebreo̱ 10 - Xo̱jo̱n eén Néná

Bi̱ tsꞌén tjibóko nga Kristoo̱ ta̱ ngo tsí ndi̱yà katsjá ngo kjo̱a̱tjó tsi̱ꞌe̱ nga kiniꞌánjetakón jeé

¹ Kjo̱a̱kitii̱ Moisee̱ ta̱ ya nga ta̱ katsjá tsí ngo chi̱bo̱a̱a̱ ni nda xi jaskan kꞌuié, ta̱nga jmí tsi kui nii̱ xi ja̱koxi̱ nga kuí má bo̱a̱. Kjo̱a̱kitii̱ kamájiín katsꞌén xotaa̱ xikótsꞌèn mejeén Néná nga ka̱ma, kui xota̱ xi tsꞌéntsjaà Néná, kó xi xki̱ nó tsꞌenkꞌásꞌieén ti̱ kuii̱ kjo̱a̱tjoó.

² Tsi ja̱koxi̱ nga kjo̱a̱kitii̱ xi maa̱ foaꞌáxín jé, ngije kamátsjie xota̱ xi tsꞌenkꞌásꞌieén kjo̱a̱tjó Néná, jera̱ ngiti̱ jmí jé tsꞌénkiejín yojoo̱, kó ngiti̱ jmí kjo̱a̱tjó sa̱ꞌínkꞌasꞌienjínra̱ tsobo̱a̱.

³ Ta̱nga nga xki̱ nó niꞌánkꞌasꞌien kui kjo̱a̱tjoó, niꞌánkjaꞌátsjiee̱n nga tjiín jé.

⁴ Ngatꞌa̱ jiín cho̱yojo xi̱ꞌii̱n, ko̱jo jiín tindso̱ xi̱ꞌii̱n májiín foaꞌáxín jeé.

⁵ Kuíni nga Kristoo̱ nga jeꞌe kui nga̱sondiee̱, bi̱ katsó: Kamámejénjiín ji kjo̱a̱tjó ko̱jo chji̱e̱, ta̱sá ngo yojo ikꞌíjñinde xi katseꞌéní.

⁶ Tsjájín kamaá ji cho̱ xi ꞌbítí yejee̱, ti̱nde kjo̱a̱tjó xi foaꞌáxín jeé.

⁷ Kuíni nga bi̱ kixian an: “Kꞌi̱e̱ tikòn an kꞌi̱e̱e̱, Ne, tsi̱ꞌe̱ nga sa̱ꞌinkjatjosón an ni xi mejeén ji, xikótsꞌèn kjitꞌa kui chꞌo̱ xo̱jo̱o̱n kjo̱a̱a̱ an.”

⁸ Nga tjón tjón, bi̱ katsó nga tsíchji̱a̱: “Kamámejénjiín ji kjo̱a̱tjó, ko̱jo chji̱e̱, ko̱jo nga kꞌuití yejee̱ cho̱, ko̱jo chji̱e̱ xi ꞌbíchjítjé jeé.” Bo̱a̱ katsó, ndatsi kjo̱a̱kitii̱ tsangiya nga niꞌánkꞌasꞌien kui nii̱.

⁹ Kósꞌe̱ bi̱ katsó ngase: “Kꞌi̱e̱ tikòn an kꞌi̱e̱e̱, Ne, tsi̱ꞌe̱ nga sa̱ꞌinkjatjosón an ni xi mejeén ji.” Kui nii̱ xi tsó nga jaꞌáxín ni xi tjoón, tsi̱ꞌe̱ nga kisꞌijña ni xi ma joó.

¹⁰ Néná jè katsꞌéntsjiená, ngatꞌa̱ Jesukristoo̱ katsꞌénkjatjosón ni xi kamámejeén Néná, kjiꞌanga ti̱ kuii̱ yojoo̱ katsꞌénkꞌasꞌien nga kiniꞌánkꞌién ta̱ ngo tsí ndi̱yà.

¹¹ Ngayeje chináꞌmii̱ ndyiojón ndyiojón ndyi̱tsꞌèn xá xí tsoboaá, kó ndyi̱tsꞌènkꞌásꞌién kjín ndi̱yà ti̱ kuii̱ kjo̱a̱tjó, kó kui nii̱ jmíni̱xtjin ka̱maa̱ kjo̱a̱ꞌáxín jeé xotaa̱.

¹² Ta̱nga Kristoo̱ ta̱ ngo tsí ndi̱yà katsꞌénkꞌasꞌien yojoo̱ xikoó ngo kjo̱a̱tjó xi ta̱ kjiꞌání chjínií, ta̱ngatꞌanii̱ jeé xotaa̱, kósꞌe̱ ki̱a̱ kisꞌijña nga fojnií Néná.

¹³ Ki̱a̱ tsꞌénkoya ngaskande nga Néná ku̱i̱ꞌíndo ngindie se Kristoo̱ xota̱ xi kondra̱ síndonii̱.

¹⁴ Ngo tsi kjo̱a̱tjó katsjá nga katsꞌén xi chjiéngá ka̱ma xota̱ tsjiee̱, ngatsjéni̱xtjin.

¹⁵ Kó A̱si̱énni̱xtjii̱n Néná, kuí boá xi chistiko̱ nga tjón bi̱ katsó:

¹⁶ Bi̱ katsó Ndi̱a̱ná: Kuí bí kjo̱a̱ꞌbínda xi sa̱ꞌinjo̱ an kui xotaa̱, Ngije kamá kui ni̱xtjii̱n. Ngi̱jii̱n kjo̱a̱kjíntakoón kꞌuijñájin an kjo̱a̱kitina. Kó nga̱són ini̱ma̱a̱ sa̱ꞌinꞌindó an.

¹⁷ Kó bi̱ tsó ngase A̱si̱énni̱xtjii̱n Néná: Kó nginijánjín kjo̱a̱ꞌátsjienna jeé, ko̱jo ni xi ndajín xi katsꞌén.

¹⁸ Kó bo̱a̱ tsꞌén, ngije kiniꞌánjetakoón jeé, jè ngiti̱ jmí kjo̱a̱jín nga si̱ꞌankꞌasꞌien ngase ngo kjo̱a̱tjó ta̱ngatꞌanii̱ ngo jé.

Bi̱ tsꞌén tjibóko nga chjiéngá kongíntji̱ngí ni xi katsjáná Kjisoo̱

¹⁹ Kó kuíni ntsꞌie, ngotꞌe̱ ꞌne̱ ka̱ma ku̱i̱tjásꞌi̱e̱n cha̱n cha̱n ngi̱ndie xi ta̱nisién tsjiee̱ Néná, ta̱ngatꞌanii̱ nga Jesukristoo̱ katsjá yojoo̱ nga kiniꞌánkꞌién.

²⁰ Ngatꞌa̱ kjiꞌanga kꞌien kui, iskjíxꞌá kuí ńjño xi katsjandièjínná ñá nga ikitjasꞌi̱e̱n katsaki, ta̱nga ngotꞌe̱ ꞌne̱ tikón Kjisoo̱, kó ngatꞌaa̱ kuí boá nga ka̱ma kongínchon tiñáa̱ Néná.

²¹ Kjisoo̱ boá kui chináꞌminá xí ꞌniú nkꞌa xaá xi tikóntjoón na̱ngo̱xi̱ ndikoón Néná.

²² Kuíni chjiéngá nga ngayeje ini̱ma̱ná nga kongínchon tiñáa̱ Néná, nga kꞌuiéná ngo kjo̱a̱sꞌijin xi ja̱koxi̱, nga tsjie ka̱ma ini̱ma̱ná kjo̱a̱a̱ ni xi ndajínkjiꞌi xi tikoón kjo̱a̱kjíntakónná ko̱jo nga ko̱niéjón ñá yojoná ndáfoa xi tsjie.

²³ ꞌNiú ku̱i̱ndyión tsobo̱a̱, nga si̱ꞌanꞌniátakón nga ndyi̱chiyáa̱ Néná ngi̱yaa̱ kui kjo̱a̱sꞌijin xi ndyi̱mongíntji̱ngí, ngatꞌa̱ Néná, ja̱koxi̱ boá nga sa̱ꞌínkjatjosón ni xi je katsóyàná nga sa̱ꞌín.

²⁴ Kó ku̱i̱ndyi̱sé ndi̱yàa̱ kótsꞌèn ko̱si̱ko̱jó ja̱kꞌi̱e̱ ja̱ngaján xingi̱ nga kꞌuié ngasená kjo̱a̱tjó, ko̱jo nga ni xi nda xi si̱ꞌán.

²⁵ Ngatsjéni̱xtjin ngatamatikó, jmí tsi xikó tsꞌén xota̱ xi je ngaa̱ nga ngiti̱ fíjín, ta̱sá ko̱e̱ꞌéngaꞌniúu̱ ja̱kꞌi̱e̱ ja̱ngaján xingi̱, ngase má nga je xcha̱ nga je tikón tiña ni̱xtjin nga kjo̱e̱ꞌe nginí Ndi̱a̱ná.

Bi̱ tsꞌén tjibóko kjo̱a̱a̱ xota̱ xi ndyi̱tsꞌèn jé kó je be ja̱koxi̱i̱

²⁶ Ngatꞌa̱ tsi ngayeje takón nga si̱ꞌanjé ngije kamáyà ni xi ja̱koxi̱i̱, jè ngiti̱ jmíjín ingo kjo̱a̱tjó xi ka̱ma si̱ꞌankꞌasꞌien kjo̱a̱a̱ jeé.

²⁷ Ta̱ kuí tsí nii̱ xi sa̱ko̱ó xi bo̱a̱ ndyi̱tsꞌe̱én: Ngo kjo̱a̱botíjé xi ꞌniú ko̱jo kui ndiꞌí xí Néná sa̱ꞌínkjiéni xota̱ xi kondra̱ síndonii̱.

²⁸ Tsi tjín xí katsꞌénkjatjosónjín kjo̱a̱kitii̱ Moisee̱, kó nga jó ko̱jo tsi ján chistiko̱ xi yíngítaꞌin, kiniꞌánkjiesón tji̱ꞌni̱u̱ kuí xotaa̱, kó jmíjín xi ni̱ma̱ kamaá.

²⁹ Ja̱ ti̱ꞌankjínjnúu̱ takónjnú, kókjiꞌi ni xi si̱ꞌaa̱n kui xi tsꞌéntsjánié ni xi katsꞌén ndií Néná, kókjiꞌi ni xi si̱ꞌaa̱n kui xi ta̱ kjo̱a̱ndaní máa kui jín xí Néná índajo̱ni nga katsꞌéntsjie kui xotaa̱, ko̱jo kókjiꞌi ni xi ka̱maa̱ xi chꞌo tjítsoó A̱si̱énni̱xtjii̱n Néná xi tsꞌén tsjá kjo̱a̱ndaa̱.

³⁰ Ngatꞌa̱ jè ya nga bi̱ katsó Néná: “Án xí sa̱ꞌingojo an, án xí tsjàa̱ chjií.” Kó ti̱ bi̱ ti̱ katsó nga: “Ndi̱a̱ná xí ko̱ngasee̱ tsi nda ko̱jo tsi ndajín katsꞌén xota̱ na̱xi̱ńdaá.”

³¹ ¡Achichí ndikón kjiꞌi nga xota̱ xi ndyi̱tsꞌènjeé kꞌo̱ka ngi̱ya tsja kui Néná xí tikoón!

³² Ngatjaꞌátsjienjnú kjo̱a̱niꞌin ko̱jo kjo̱a̱ni̱ma̱ xi ikitjatiójnú nga tjón tjón, kjiꞌanga én ndaa̱ Néná katsꞌéntsijenjnú.

³³ Tjín jún xi chꞌo kiꞌmíjnú, ko̱jo kiniꞌánꞌónjnú ngindyi̱ko̱n xota̱ na̱xi̱ńdaá, kó kje̱ꞌe ni̱xtjin nijan ikitjatiójo̱jnú kjo̱a̱ni̱ma̱ kui xota̱ xi bo̱a̱ kamátaꞌii̱n.

³⁴ Ti̱ kamáni̱ma̱jnú xota̱ xi kisꞌińdoyà ndo̱bo̱a̱ya̱à, kó jmí ni kiꞌmíjínjnú nga xota̱xa̱á jaꞌáxínjnú ni xi kisꞌiejnú, ta̱sá tsja kamájnú, ngatꞌa̱ ja̱bo̱a̱ jè yàjnú nga ndiꞌakꞌajmii̱ tikónjnú ngo ni xi nda ngase, ko̱jo xi tikón ngatsjéni̱xtjii̱n.

³⁵ ꞌNiú ti̱ꞌanꞌniátakónjnú Néná, ngatꞌa̱ bo̱a̱ tsꞌén nga sa̱kójnú ngo ni je xi niꞌán.

³⁶ Chjiéngá kꞌuiéjnú kjo̱a̱chiyákjo̱a̱, tsi̱ꞌe̱ nga si̱ꞌánjnú ni xi mejeén Néná, kó bo̱a̱ tsꞌén nga sa̱kójnú ni xi katsóyàtjón nga tsja̱á.

³⁷ Ngatꞌa̱ bi̱ tsó xo̱jo̱n eén Néná: Tsá, achichí tsá ndibá xi chjiéngá kji̱ndi̱baá, kó kꞌo̱ndíyájiín.

³⁸ Xota̱na xi kixi̱i̱, ta̱ngatꞌanií kjo̱a̱sꞌijii̱n nga kꞌuijñáni nga̱sondie. Ta̱nga tsi ko̱e̱je̱ nginí nga̱xto̱n, tsjajín ka̱maa̱ ini̱ma̱na.

³⁹ Ta̱nga ñá jmí tsi bo̱a̱ kon, xikoó xota̱ xi fíni nga̱xto̱n sꞌe̱ chaja, ta̱sá ñá boá xi tjínná kjo̱a̱sꞌijin tsi̱ꞌe̱ nga kjo̱tjoꞌa ini̱ma̱ná.