Xota̱ Ebreo̱ 1 - Xo̱jo̱n eén Néná

Bi̱ tsꞌén tjibóko nga Néná tsíchji̱a̱joná nga katsꞌénkjién ndií

¹ Ni̱xtjin xcháján, Néná kjín ndi̱yà ko̱jo ja̱ kje̱ꞌe ja̱ kje̱ꞌe tsꞌén tsíchji̱a̱jo xota̱ xi xcháná nga katsꞌénkjién já chji̱ni̱e̱ꞌe̱én.

² Kó ngotꞌe̱ ꞌne̱, kui ni̱xtjin xi kjifetꞌaa̱, Néná katsangiya ndií, kó kuí xí katsꞌénkjién nga tsíchji̱a̱joná, kó kuí boá xi katsꞌénkꞌasꞌiee̱n ngayeje nii̱, ko̱jo ta̱ngatꞌanii̱ kui nga Néná katsꞌénda ngayeje nga̱sondiee̱ ko̱jo ndiꞌakꞌajmii̱.

³ Kuí ndií xi tsꞌentsíjen kjo̱a̱jee̱ Néná, kó kuí boá xi bokó xikótsꞌèn tjíjii̱n Néná, kó kuí boá xi tsꞌénkꞌíndo ngayeje ni xi tjiín, ta̱ngatꞌanii̱ ngaꞌniuú én xí chji̱a̱. Ngije katsꞌéntsjiejónná jé xí tjínná ngindyi̱ko̱n Néná, ki̱a̱ kisꞌijña ndiꞌakꞌajmii̱ nga fojnií Néná xi tsꞌénbotixómaá.

Bi̱ tsꞌén tjibóko nga ndií Néná boá xi nkꞌa ngase xaá ta̱bo̱a̱jínnii̱ ndítsjiee̱

⁴ Kuí ndií Néná xí nkꞌa ngase kiniꞌán xaá ta̱bo̱a̱jiín ndítsjiee̱, ngatꞌa̱ ta̱kuítsí bo̱a̱ xi ndí ngototoo̱ Néná.

⁵ Néná bi̱ katsoó ndií: Jí xí ndína ji, án xí Na̱ꞌmíi̱ an, ngotꞌe̱. Kó kui nii̱ jmí tsi ngo ndítsjie xi bo̱a̱ katsoó. Kó Néná ti̱ bi̱ ti̱ katsó kjo̱a̱a̱ ndií nga: Án xí Na̱ꞌmii̱ kui ka̱ma an, kó kuí xí ndína ka̱ma kui.

⁶ Kó kjiꞌanga katsangiya ndí xí tjoón kui nga̱sondiee̱, bi̱ katsó: Ngayeje ndítsjiee̱ Néná ngatsꞌéndíkón.

⁷ Kó kjénní nga kjo̱a̱a̱ ndítsjiee̱, bi̱ tsó Néná: Ndítsjiee̱, kuí xí xikoó tsi tjo̱o̱, kó moso̱na kuí xí xikoó tsi ndiꞌií.

⁸ Kó Néná nga chji̱a̱ kjo̱a̱a̱ ndií, bi̱ tsó: Ji Ne, ta̱ kjiꞌání nga ji xi ko̱ti̱xome, kixi̱ sa̱tíxoma ngi̱ndie nínga botíxome ji.

⁹ Jè kiniꞌíntjé ni xi kixi̱i̱, kó kiniꞌínchꞌí ji ni xi ndajiín, kuíni nga Néná je jaꞌájiin, kui Ne xi tse̱, kó kuí xí katsjaá tsie kjo̱a̱tsja, tsie ngase ta̱bo̱a̱jiín ndítsjiee̱.

¹⁰ Kó ti̱ bi̱ ti̱ tsó nga: Ji Ndi̱a̱, jí kiniꞌínde ji nga̱sondiee̱ ndeskande koó nga ítjatsꞌennii̱, kó ti̱ ndse̱ boá xi katsꞌénda ndiꞌakꞌajmii̱ nga.

¹¹ Ngayeje kui nii̱ xi kju̱i̱e̱, ta̱nga ji ngatsjéni̱xtjin nga ku̱i̱ndyin. Kó ngayeje kui nii̱ xi ka̱maxchá xikoó ngo ńjño xi chajá.

¹² Kó kꞌuíchꞌi̱ ji xikótsꞌèn fochꞌo̱ ngo ńjño, kó sa̱síkjo xikoó ngo xota̱ xi bosíkjo ńjñoo̱, Ta̱nga ji, ko̱si̱kjoyejín ji, kó jmíni̱xtjin ka̱maxchá jí.

¹³ Néná bi̱ katsoó ndií, kó jmí tsi ndítsjiee̱ xi bi̱ katsoó: Ti̱ndyintꞌení nga fojnína nínga botixoma an, ngaskande nga kꞌuindo an ngindie ndsa̱ki kondra̱ tse̱.

¹⁴ A mí tsí ngayeje ndítsjiee̱ nga kui xi ndyi̱tsꞌèn xaá Néná, kó nga kuí xí kanangiya tsi̱ꞌe̱ nga kui xi sa̱ꞌiín kjo̱a̱nda kui xota̱ xi sa̱ko̱ó kjo̱a̱ꞌnaxiéꞌaá.