Xo̱jo̱o̱n Sandiyaá 5 - Xo̱jo̱n eén Néná

Bi̱ tsꞌén íni̱jmì Sandiyaá ni xi ka̱maa̱ xota̱ cho̱n xi ndajín tsꞌénjo̱ mosoo̱

¹ ¡Ndaꞌyájnú kui nii̱, jún xi xota̱ cho̱njnú! Chaꞌájnú kó ꞌniú chaꞌayàjnú kjo̱a̱a̱ ngayeje kjo̱a̱ni̱ma̱ xi sꞌe̱ ku̱i̱tjájinjnú.

² Kjo̱a̱cho̱njnú je jando, kó ńjñojnú je iskjinie xobií.

³ To̱nsiniéjnú ko̱jo to̱ntiboajnú je katjoxtꞌán, kó kui xtꞌaán, kuí xí chistiko̱ ka̱ma kondra̱ tsa̱jún, kó sa̱ꞌínkjié yojojnú xikoó ngo ndiꞌí xi tsꞌenkjié. Míkjo̱a̱a̱ nga to̱n ndyi̱chjaꞌátjójnú nga je yàjnú nga je kjifetꞌa ni̱xtjii̱n.

⁴ Tsitsíjenjnúu̱ nga kui já moso̱ xi katsꞌénxájin ngi̱jin jno̱jnú xi katseꞌéjínjnú chjií nga kichꞌíṉcha̱jojnú, kui chjií je ndyi̱bongítaꞌinjnú. Ni xi ndyi̱kjandayà kui já mosoo̱, je tsintꞌieé kui Ndi̱a̱ná xi tjiín ngaꞌniuú.

⁵ Kꞌi̱e̱ tꞌanangii̱ je kixindyionjnú nga katseꞌéjnúu̱ yojojnú kjo̱a̱tsja xi nda ko̱jo je kiniꞌánkjatjosónjnúu̱ ni xi kamámejeén ini̱ma̱jnú. Jè kamáyiꞌijnú xikó maá ngo cho̱yojo xi je jachó ni̱xtjii̱n nga si̱ꞌankꞌien.

⁶ Jún jè akjangitaꞌinjnú jé xota̱ xi kixi̱ xi jmí jéjiín, kó bo̱a̱ tsꞌén kiniꞌánkjiesónjnú kui xotaa̱ xi nde kamájiín tsꞌaxiéꞌá yojoo̱ nga bo̱a̱ kamátaꞌin.

Bi̱ tsꞌén íni̱jmì Sandiyaá kjo̱a̱a̱ xikótsꞌèn xchiyàkjo̱a̱ ngaskande nga kjo̱e̱ꞌe Ndi̱a̱ná

⁷ Kó kuíni jún ntsꞌie, ngatꞌiéjnú kjo̱a̱chiyákjo̱a̱ ngaskande nga kjo̱e̱ꞌe nginí Ndi̱a̱ná. Tsitsíjen chi̱bo̱a̱yajnúu̱ kótsꞌèn nda̱ xi tsꞌénxájin tꞌanangii̱ nga koyakjo̱a̱ sakon sakoo̱n cha̱a̱n ni xi ítji̱e̱ ngaskande nga boaꞌa stsé xi boaꞌa cho̱stseè.

⁸ Jún ti̱ bo̱a̱ ti̱ tsꞌén ngatꞌiéjnú kjo̱a̱chiyákjo̱a̱, kó te̱ꞌéngaꞌniújnúu̱ ini̱ma̱jnú, ngatꞌa̱ jè kjimatiña ni̱xtjin nga kjo̱e̱ꞌe nginí Ndi̱a̱ná.

⁹ Jún ntsꞌie, ngata̱ jmí kjo̱a̱xti mindyiajenjínjnúu̱ xingi̱jnú, tsi̱ꞌe̱ nga sa̱tíjéjínjnú, ngatꞌa̱ xi tsáyà tsi nda ko̱jo tsi ndajín ndyi̱tsꞌèn xotaa̱ jè tikónxtió nga̱ntjo̱a̱a̱.

¹⁰ Jún ntsꞌie, chjábéchi̱bo̱a̱jnú kui kjo̱a̱ni̱ma̱ xi jaꞌatio ko̱jo kui kjo̱a̱chiyákjo̱a̱ xi kisꞌiee̱ kui já chji̱ni̱e̱ꞌe̱én Néná xi tsíchji̱a̱ nga katsꞌénkjié jaꞌeén Ndi̱a̱ná.

¹¹ Tsitsíjenjnúu̱ nga xota̱ xi ndyi̱foaꞌatio kjo̱a̱ni̱ma̱a̱, xikónií tsi xota̱ xi achichíra̱tsjaa̱ ꞌmíjne̱. Jún je kandaꞌyájnú kótsꞌèn kichikjoaá nda̱ xi ꞌmí Joo̱b ngayeje kjo̱a̱ni̱ma̱ xi jaꞌatio, kó jè kamáyàjnú kó katsꞌénjo̱ Ndi̱a̱ná nga fetꞌaa̱, ngatꞌa̱ Ndi̱a̱ná ni̱ma̱ máa ñá kó koyakjo̱a̱ná nga.

Bi̱ tsꞌén íni̱jmì Sandiyaá kjo̱a̱a̱ xikótsꞌèn ko̱ndókjo̱a̱a̱ Ndi̱a̱ná

¹² Jún ntsꞌie, ꞌniú míꞌájnúꞌun kui nii̱: Kjiꞌanga tjín xí ko̱síyájnú ngo ni, ngata̱ ngiboanénájín ꞌmíjnú nga si̱ꞌankjiénjnú jaꞌeén ndiꞌakꞌajmii̱, ko̱jo tsi tsi̱ꞌe̱ tꞌanangii̱, ko̱jo tsi tsi̱ꞌe̱ kje̱ꞌe ni, ta̱sá “jo̱o̱n” tꞌínjnú, tsi bo̱a̱ kjiꞌi kui nii̱, kó “jmí” tꞌínjnú, tsi bo̱a̱jín kjiꞌi kui nii̱, tsi̱ꞌe̱ nga ko̱tíjéjínjnú Néná.

¹³ A tjín ngi̱jinjnú xota̱ xi kjo̱a̱ni̱ma̱ tsꞌénfoaꞌatio. Ngatíchji̱a̱a̱ Néná. A tjín xi tsja tjiín. Nga siee̱ só xi ndaa̱ Néná.

¹⁴ A tjín xi oo̱n. Ngatíchji̱a̱a̱ xota̱ xi xchaá na̱ngo̱xi̱i̱ tsi̱ꞌe̱ nga ka̱mandaya nga ku̱i̱chji̱a̱tjé, kó nga tsanginjon isti̱ nga sa̱ꞌínkaxoma jaꞌeén Ndi̱a̱ná.

¹⁵ Kjo̱a̱ndokjo̱a̱tjé xi tjiín kjo̱a̱sꞌijii̱n boá xi sa̱ꞌíndaya xi oo̱n, kó Ndi̱a̱ná sa̱ꞌínkjastjíe̱n, kó tsi katsꞌénjé, si̱ꞌanjetakoón jeé.

¹⁶ Kuíni nga ja̱kꞌi̱e̱ ja̱ngaján tꞌíyájnúu̱ xingi̱jnú jé xí kiniꞌánjnú, kó ja̱kꞌi̱e̱ ja̱ngaján ndókjo̱a̱tjéjnú xingi̱jnú, tsi̱ꞌe̱ nga ka̱mandayajnú. Kjiꞌanga ngo xota̱ xi kixi̱ ku̱i̱chji̱a̱a̱ Néná tjínrií ngaꞌniú ni xi ku̱i̱chji̱a̱.

¹⁷ Nda̱ chji̱ni̱e̱ꞌe̱én Néná xi ꞌmí Eliyaa̱ kuí boá xi kamá ngo nda̱ xikoó ñá, kó kjiꞌanga ꞌniú tsíchji̱a̱a̱ Néná tsi̱ꞌe̱, nga ngiti̱ ko̱a̱ꞌájín stseé, ngiti̱ tsaꞌájín stsé nga̱són tꞌanangii̱ ján nó masien.

¹⁸ Kó ti̱ tsíchji̱a̱ nginií Néná ingo ndi̱yà, kó tsaꞌa nginí stseé, kósꞌe̱ tꞌanangii̱ kamáxchá nginií nichinie.

¹⁹ Jún ntsꞌie, tsi tjín ngi̱jinjnú xi je kisꞌijñatꞌaxiín ja̱koxi̱i̱, kó tsi ngo xota̱ sa̱ꞌínkjí nginí ndi̱yà xí kixi̱i̱,

²⁰ ngatamayajnú jún nga ta̱ ꞌyání xi sa̱ꞌínkjíꞌoyá ngo xota̱ jé kjo̱a̱a̱ kui ndi̱yà xi ndajínkjiꞌi xi kistsoꞌbá, jè tsꞌaxiéꞌá tsi̱ꞌe̱ nga ko̱yàjín nda̱ xi katsꞌénjeé, kó kuí boá xi katsꞌén nga kjín jeé kui nda̱a̱ je kiniꞌánjetakoón.