Xo̱jo̱o̱n Sandiyaá 1 - Xo̱jo̱n eén Néná

Bi̱ tsꞌén katsꞌéntinde Sandiyaá xota̱ na̱ngo̱xi̱i̱

¹ Án boá xi ꞌmína Sandiyá, mosoo̱ Néná xí Na̱ꞌmii̱ ko̱jo Ndi̱a̱ná Jesukristoo̱, tsꞌentindejnúꞌun jún xi tiejó xota̱ tji̱e̱e̱ Israee̱l xi kastsojoboajnú ngayeje són nga̱sondiee̱.

Bi̱ tsꞌén íni̱jmì Sandiyaá kjo̱a̱a̱ mí ni xi bosikójoná tsi̱ꞌe̱ nga ꞌniú sꞌi̱jinná Néná

² Jún ntsꞌie, tsja ngatamajnú kjiꞌanga kjín to̱ko̱ya ni ku̱i̱tjájinjnú nga chjátꞌayákónjnú,

³ ngatꞌa̱ jè yàjnú nga kjiꞌanga bitjajinjnú kjo̱a̱chjatꞌayákoón, kó nda fotjojnú, ja̱ kjo̱a̱a̱ nga ꞌniú sꞌijinjnú Néná, kó kuí nii̱ xi tsꞌén nga chikjo̱a̱jnú ta̱jmì niní.

⁴ Kó bo̱a̱ tsꞌén kjiꞌanga ndyi̱niꞌánchíkjo̱a̱jnú, ndyi̱boeꞌéndièjnúu̱ kui kjo̱a̱chiyákjo̱a̱a̱ nga sa̱ꞌín ndo̱jò xaá ngi̱jin ini̱ma̱jnú, tsi̱ꞌe̱ nga ka̱majnú jún xi chjiéngá ka̱majnú, kó nga ka̱ma xcha̱ nda ndajnú ngi̱yaa̱ kjo̱a̱sꞌijii̱n Néná, kó nga ngojín ni xcha̱jàjnú.

⁵ Kó tsi tjín jún xi chajaa̱ kjo̱a̱kjínkón, ngatíꞌaá Néná, kó Néná tsja̱á, ngatꞌa̱ Néná tsjaá ngayeje xotaa̱ tsie ni xi machjieén, kó jmíjín xi tsꞌenchꞌó nga tsjaá.

⁶ Ta̱nga chjiéngá ꞌniú sꞌi̱jii̱n nga ku̱i̱ꞌaa̱, kó nga jó nga jánjín ku̱i̱ꞌíjñaá ini̱ma̱a̱, ngatꞌa̱ kui xota̱ xi bo̱a̱ tsꞌeén, xikónií ngaꞌniuú ndáchíkoón xi ja̱kꞌi̱e̱ ja̱ngaján ngi̱ndie fíjo̱ tjo̱o̱.

⁷ Kui xota̱ xi bo̱a̱ tsꞌeén, ngata̱ tsꞌénkjójín tsi Ndi̱a̱ná ngo ni tsja̱á.

⁸ Ngatꞌa̱ kui nda̱ xi bejín ni xi mejeén, jmíni̱xtjin nda tsꞌén kjótsoꞌbá ndi̱yà xí tsoꞌbá.

Bi̱ tsꞌén íni̱jmì Sandiyaá kjo̱a̱a̱ xota̱ xi ni̱ma̱ ko̱jo xi cho̱n

⁹ Kui ntsꞌié xi ni̱ma̱ tsꞌén tikoón, tsjangatamaa̱, ngatꞌa̱ nkꞌa tikón ngindyi̱ko̱n Néná,

¹⁰ kó kui xi cho̱o̱n, tsjangatamaa̱, ngatꞌa̱ ni̱ma̱ tsꞌén tikón ngindyi̱ko̱n Néná, ngatꞌa̱ xota̱ xi cho̱o̱n, xikónií tsi ngo naxó, tsiejín ꞌbondíyaá.

¹¹ Ngatꞌa̱ nga fotjo tsꞌueé, ꞌniú sibé má ndoboaá kó xí xka̱a̱, kó ꞌbóka naxoó, kó chaja kjo̱a̱tsjakjiꞌii̱. Bo̱a̱ ti̱ tsꞌén xcha̱ja xota̱ xi cho̱o̱n ngi̱jii̱n ngayeje xá xí tsꞌén.

Bi̱ tsꞌén íni̱jmì Sandiyaá kjo̱a̱a̱ kjo̱a̱chjatꞌayákón xi bitjajìn

¹² Achichíra̱tsjaa̱ ngo nda̱ xi xchíkjo̱a̱a̱ kjo̱a̱chjatꞌayákón xi tsꞌénfoaꞌajin, ngatꞌa̱ ngije nda jatjo nga kachjatꞌayákón, sa̱ko̱ó kjo̱a̱mindyion ngatsjéni̱xtjii̱n, kuí boá chjí xí katsóyàtjón Néná nga tsja̱á xota̱ xi tsꞌéntjó Néná.

¹³ Kjiꞌanga tjín xí chjátꞌayákón nga ni xi ndajín sa̱ꞌín, ngata̱ tsꞌénkjójín nga Néná boá xi tsꞌénkjitꞌayàkón. Ngatꞌa̱ Néná jmíjín xi kjitꞌayákón, tsi̱ꞌe̱ nga ni xi ndajín sa̱ꞌín, ti̱nde jmíjín xi ka̱maa̱ skjítꞌayákón Néná, tsi̱ꞌe̱ nga ni xi ndajín sa̱ꞌín kuí.

¹⁴ Ta̱sá ni xi ndajín xi chji̱a̱a̱ ini̱ma̱a̱ xotaa̱ xi kjitꞌayákón, kó kuí nii̱ xi tsꞌeén kjo̱a̱ꞌniú ngaskande nga tsꞌénkjátjosón kui ni xi ndajiín.

¹⁵ Kósꞌe̱ ngije kiniꞌánkjatjosón kui ni xi ndajín xi mejeén ini̱ma̱ná, ki̱a̱ boá nga tokjà jeé, kó ngije kiniꞌánkjatjosón nga kiniꞌánjeé, ki̱a̱ boá nga tokjà kjo̱a̱bo̱yaa̱.

¹⁶ Jún ndí ntsꞌie xi tjóna, ngata̱ chꞌíṉcha̱jojínjnú yojojnú.

¹⁷ Ngayeje ni xi ꞌniú nda xi boeꞌéná, kuí nii̱ xi ꞌniú nda, kó ndiꞌakꞌajmi jàn ndibánií, ki̱a̱ nínga tikón Néná xí Na̱ꞌmii̱ kui xi katsꞌénda ngayeje ndiꞌí xí tjiín, kui xi bosíkjoyajín yojoo̱, ti̱nde tsꞌéntíyàjín xikoó ngo tji̱nkꞌi̱én.

¹⁸ Én xí ja̱koxi̱i̱ boá xi katsꞌénkjién nga katsꞌéntsenná, ngatꞌa̱ bo̱a̱ tsꞌén kamámejeén kui, tsi̱ꞌe̱ nga ñá xí ka̱ma cha̱n xi tjón foaꞌáꞌyá ngi̱jii̱n ngayeje ni xi katsꞌénda.

Bi̱ tsꞌén íni̱jmì Sandiyaá nga chjiéngá si̱ꞌankjatjosón xikó tsó eén Néná

¹⁹ Ngatamajnú kui nii̱ jún ndí ntsꞌie xi tjóna: Ti̱ndyiondajnú nga tsá ko̱si̱e̱nnijónjnú ngo ni, ta̱nga ngata̱ tsájín ndokjo̱a̱jnú, ko̱jo nga ta̱ tsájín niꞌánxchánjnú.

²⁰ Ngatꞌa̱ kjo̱a̱tamaá bosikójojínná nga kixi̱ ku̱i̱ndyión ngindyi̱ko̱n Néná.

²¹ Kó kuíni nga chja̱ꞌáxínjnúu̱ yojojnú ngayeje ni xi ndándí ko̱jo ngayeje ni xi ndajín xi achichí tjín kuí nga̱sondiee̱, kó ni̱ma̱kjo̱a̱ ngatamajnú nga si̱ꞌanjo̱ꞌojnú kui én xí Néná je ítji̱e̱jin ngi̱jin ini̱ma̱jnú, ngatꞌa̱ kui eén tjínrií ngaꞌniú tsi̱ꞌe̱ nga kꞌo̱xiéꞌájnú.

²² Ta̱nga nga jmí tsi ta̱ ko̱nda̱ꞌyá tsíjnú eén Néná, chjiéngá si̱ꞌankjatjosónjnú nga si̱ꞌánjnú xikó tsó, ngatꞌa̱ tsi bo̱a̱jín si̱ꞌánjnú, ta̱ ndyi̱chꞌíṉcha̱jo tsíjnú yojojnú.

²³ Ngatꞌa̱ tsi tjín xi ta̱ ntꞌié tsí eén Néná, kó tsꞌénkjátjosónjín nga tsꞌén ni xi tsó, xikónií ngo nda̱ xi kotsijee̱n kje̱n ngo chi̱tsen xí tsitsienjenjin,

²⁴ kó ngije kotsijee̱n yojoo̱, nga tsꞌénkꞌafóyà nginí, jè kichíyaá kókjiꞌi kje̱n.

²⁵ Ta̱nga kui nda̱ xi bosienníjón ndá ndaá kui kjo̱a̱kiti xi kixi̱, kui xi tsjáná kjo̱a̱ndeé, kó ꞌniú ꞌbíjñá, kó tsꞌénkjátjosón nga tsꞌén xikó tsó, kó chíyájiín ni xi tsintꞌié, kuí nda̱ xi̱ꞌbi̱ xi achichíra̱tsjaa̱ kjo̱a̱a̱ ni xi tjítsꞌén.

²⁶ Tsi tjín xí sꞌijii̱n nga ꞌniú bendikón Néná, ta̱nga tsi májiín ꞌbíꞌniuú na̱je̱n nga chji̱a̱, ti̱kuíní xi tsꞌénꞌboṉcha̱jo ini̱ma̱a̱, kó kjo̱a̱a̱ nga ꞌniú bendikón Néná tjítsoó yojoo̱, nde jmí ni chjíjiín kui nii̱.

²⁷ Kjo̱a̱yandikoón Néná xi tsjie ko̱jo xi jmíjiín ni xi ndándí ngindyi̱ko̱n Néná xí Na̱ꞌmii̱, kuí boá xi̱ꞌbi̱: Nga ko̱si̱ko̱jó kjiꞌanga kjo̱a̱ꞌatio kjo̱a̱ni̱ma̱ xota̱ xi xꞌi̱a̱a̱n, ko̱jo ínchjín kꞌán xi je kꞌien xi̱ꞌii̱n, ko̱jo nga ki̱a̱jín nijan si̱ꞌandándí yojoná kjo̱a̱a̱ ni xi ndajín xi tjiín kui nga̱sondiee̱.