Xo̱jo̱o̱n Jundaa̱ 1 - Xo̱jo̱n eén Néná

¹ Án xí ꞌmína Jundaa̱, mosoo̱ Jesukristoo̱ ko̱jo ntsꞌi̱e̱ Sandiyaá, tsꞌentindejnúꞌun ngayejejnú jún xota̱ xi Néná xí Na̱ꞌmii̱ tjoó, ko̱jo xi je tsíchji̱a̱a̱, kui xota̱ xi Jesukristoo̱ tsꞌénkoón.

² Ngatama tsie kjo̱a̱ni̱ma̱takón, ko̱jo kjo̱a̱xió, ko̱jo kjo̱a̱tjó xi tsja̱ajnú Néná.

³ Jún ndí ntsꞌie xi tjóna, achichí kamámejeén ini̱ma̱na nga sa̱ꞌinꞌindójnúꞌun kjo̱a̱a̱ kui kjo̱a̱ꞌnaxiéꞌá xi je katsjáná Néná, ta̱nga ngotꞌe̱ tsꞌenꞌindójnúꞌun kui xo̱jo̱o̱n nínga tsꞌénmíꞌájnúꞌun nga ti̱xkántjéjnú kui kjo̱a̱sꞌijin xi ngatsjéni̱xtjin katseꞌeé xota̱ na̱xi̱ńdá tsjiee̱ Néná.

⁴ Bo̱a̱ tꞌíxián an, ngatꞌa̱ tjín káꞌá xota̱ xi ta̱ngatꞌanii̱ kjo̱a̱mañaa̱ nga ki̱a̱ tsꞌasꞌienjinjnú, kui xi ndeskande koó ngasꞌe̱ kiꞌmíyatjón nga ka̱majeé, xota̱ xi ꞌniú ndajín boá xi̱ꞌba̱, kui xi kjíbé kjo̱a̱ndaa̱ Néná, tsi̱ꞌe̱ nga ta̱ ni xi mejénrií kui sa̱ꞌín, kó tsꞌénkiejín yojoo̱ nga Jesukristoo̱ boá kui Ndi̱a̱ná xí ngototo xi tsꞌénbotixómáná.

⁵ Ta̱nga ndatsi je yàjnú kui nii̱, mejénna nga sa̱ꞌinkjaꞌátsjienjnúꞌun nga Néná ngije tsꞌaxiéꞌá xota̱ na̱xi̱ńdaá nga tsꞌaxiéni nangi Ejipto̱, jaskan katsꞌénkjié xota̱ xi kisꞌijinjiín.

⁶ Ti̱ bo̱a̱ ti̱ katsꞌénjo̱ kui ndítsjie xi kixi̱jín katsꞌénkjatjosón xaá, kui xi ta̱sá índomasien ngi̱ndiee̱, Néná síndoꞌniuú ngi̱ya ndo̱bo̱a̱yà xi jñó ko̱jo xi ngatsjéni̱xtjin, tsi̱ꞌe̱ nga ka̱majeé ni̱xtjin je, nga kꞌuiyá tsi nda ko̱jo tsi ndajín katsꞌén xotaa̱.

⁷ Xikó katsꞌén kui ndítsjiee̱, ti̱ bo̱a̱ ti̱ katsꞌén xota̱ na̱xi̱ńdáꞌniú Sondoma̱ ko̱jo Ngomorra̱, ko̱jo kui xota̱ na̱xi̱ńdá xí síndotꞌaa̱ kui ngi̱ndiee̱, nga ta̱xkiya katsꞌéntsjajo̱ yojo ndikoón, nga kondra̱ kijínii̱ ni xi íjñá Néná, kuíni nga jaꞌatio kjo̱a̱ni̱ma̱ nga kamájénií ngi̱jii̱n ndiꞌí xi jmíni̱xtjin kꞌo̱o̱. Bo̱a̱ kamá, tsi̱ꞌe̱ nga kui nii̱ xi chi̱bo̱a̱ kamáná ñá.

⁸ Ti̱ bo̱a̱ ti̱ ka̱maa̱ kui já xí tsꞌasꞌienjin maña̱jnú, ngatꞌa̱ xota̱ xi ndyi̱fítji̱ngi chi̱nii̱ boá nga ndyi̱tsꞌènndándí yojoo̱ ngindyi̱ko̱n Néná, kó ndyi̱tsꞌènchꞌó xi tjiín xá, ko̱jo chꞌo ndyi̱tsoó ngaꞌniú xi ta̱nisién nkꞌaá.

⁹ Ngaskande ndítsjie ngito̱ko̱ Miyee̱ bo̱a̱jín katsꞌén kjiꞌanga askjanjo̱ xindajín ndiabloo̱ nga askjantjéni yojoo̱ Moisee̱, kamájínkón nga kui xi katsꞌénjeé nga chꞌo katsoó, ta̱sá bi̱ katsoó: “¡Ndi̱a̱ná ngatsꞌénxchánjoo̱ ji!”

¹⁰ Ta̱nga kui já xí tsꞌasꞌienjin maña̱jnú ta̱xkiya chꞌo tsꞌén chji̱a̱ kjo̱a̱a̱ ni xi kji̱e̱ makjínjiín. Kó ni xi makjiín xikótsꞌèn bee̱ko̱n, ta̱xkiya kjíbé. Kui jaá xikónií cho̱ xi tsꞌénkjójín. Kó ta̱ngatꞌanii̱ kui nii̱, nga ti̱ kuii̱ ndyi̱tsꞌènkjátsón yojoo̱.

¹¹ ¡Ni̱ma̱ xò kuí jaá! Ngatꞌa̱ ndajín ndyi̱tsꞌèn xikó katsꞌén Kaii̱n, kó ta̱ngatꞌanii̱ nga tsie to̱n mejeén nga ndyi̱tsꞌèn ni xi ndajínkjiꞌi xikó katsꞌén Balaa̱n. Xikoó Koree̱ nga ko̱yà ngatꞌa̱ bendikónjín xi botixómaá.

¹² Kui jaá, kuí boá xi tsꞌénndándí ni xi niꞌánjnú kjiꞌanga matikójnú nga niꞌánkjaꞌátsjienjnú kjo̱a̱tjó xi Néná katsjájnú, ngatꞌa̱ tsja maa̱ nga kjinie ko̱jo nga ꞌbi, kó ndasénjiín ni xi ndyi̱niꞌánjnú. Kui jaá xikónií xota̱ ngito̱ko̱ xi ta̱ ni xi nda maá kuí tsí xi ndyi̱mongase. Ko̱jo xikónií ṉdi̱ xi jmí stséjiín, xi ja̱kꞌi̱e̱ ja̱ngaján fíjo̱ tjo̱o̱. Ko̱jo xikónií yá xí jmí to tsjájín nga fochó ni̱xtjii̱n, kuí boá xi je kaꞌnaxiénijínni ndeskande ja̱ma̱a̱, jè ta̱nisién ꞌniú jè jesón.

¹³ Xikónií nga ꞌboxié xó ngaꞌniuú ndáchíkoón, bo̱a̱ tsꞌén bokó kuí jaá ni xi ndajín xi tsꞌén xi chjiéngá tsja̱á kjo̱a̱soboá katsaki. Kui jaá xikónií ńño xi je kichajá ndi̱ya̱à. Jè ki̱a̱ chji̱a̱ni nínga ꞌniú jñoó ta̱ kjiꞌání.

¹⁴ Kó ko̱jo Enoo̱k, kui xi ma yitoni nda̱ xi kisꞌijña kui nga̱sondiee̱ jaskan ngije kisꞌijña Andaa̱n, tsíchji̱a̱ xikoó ngo chji̱ni̱e̱ꞌe̱én Néná kjo̱a̱a̱ kui xotaa̱ nga bi̱ katsó: “Jéꞌe̱n, Ndi̱a̱ná je tsꞌéndibá, kó achichí kjín mi̱ ma ndítsjie xi tsꞌéndibájo̱,

¹⁵ tsi̱ꞌe̱ nga ka̱tso̱yaa̱ ngayeje xotaa̱ kui nga̱sondiee̱ tsi nda ko̱jo tsi ndajín katsꞌén, ko̱jo tsi̱ꞌe̱ nga ko̱tíjeé ngayeje xota̱ xi ndajiín, kjo̱a̱a̱ ngayeje ni xi ndajín xi katsꞌén, ko̱jo kjo̱a̱a̱ ngayeje én chꞌo tsó xi katsoó Néná.”

¹⁶ Kuí jaá xi chji̱a̱taꞌin xotaa̱, kó jmíjín ni xi nda maá kui. Ni xi mejeén ini̱ma̱a̱ xí ndyi̱mongase. Je ꞌboxié yojoo̱ nga chji̱a̱. Nda tsꞌén chji̱a̱ kjo̱a̱a̱ xotaa̱, ta̱nga ta̱ tsi̱ꞌe̱ nga sa̱kórií ni xi mejeén kui.

¹⁷ Ta̱nga jún ndí ntsꞌie xi tjóna, ngatjaꞌátsjienjnú én xi katsó já apostroo̱ Ndi̱a̱ná Jesukristoo̱,

¹⁸ nga bi̱ katsó: “Nga kju̱i̱e̱tꞌa ni̱xtjii̱n, kꞌuié xota̱ xi ko̱jno̱kie ni xi tsi̱ꞌe̱ Néná, kó ki̱a̱ kꞌuíndojin ni xi ndajín xi mejeén sa̱ꞌín.”

¹⁹ Kuí boá kui xotaa̱ xi bokjangá xota̱ na̱ngo̱xi̱i̱, kui xi tsꞌén ni xi ndajín xi chji̱a̱ ini̱ma̱a̱, ngatꞌa̱ tikónjinjiín A̱si̱énni̱xtjii̱n Néná.

²⁰ Ta̱nga jún, ndí ntsꞌie xi tjóna, ꞌniú ti̱ndyiajinjnú ni xi je sꞌijinjnú, ngatꞌa̱ ꞌniú tsjie kui nii̱ ngindyi̱ko̱n Néná, kó ndókjo̱a̱jnúu̱ Néná xikótsꞌèn bokoyájnú A̱si̱énni̱xtjii̱n.

²¹ Ti̱ndyiajinjnú kjo̱a̱tjoó Néná, kó chiyájnúu̱ ni̱xtjin nga Ndi̱a̱ná Jesukristoo̱ kꞌuieé kjo̱a̱ni̱ma̱takón nga tsja̱aná kjo̱a̱mindyion ngatsjéni̱xtjii̱n.

²² Tsi tjín xi jó xi ján síndonii̱ ini̱ma̱a̱, ni̱ma̱ ngatamajnú, kó ndókjo̱a̱jojnú tsi̱ꞌe̱ nga ꞌniú kꞌuíndo.

²³ ꞌNa̱xiéꞌájnú kje̱ꞌe xota̱ nga ko̱ꞌna̱xiéjinjnú ngi̱jin ndiꞌií, kó ti̱ kje̱ꞌe xota̱ xi ni̱ma̱ ngatamajnú, ta̱nga chónjnú yojojnú nga bo̱a̱ si̱ꞌánjnú, tsi̱ꞌe̱ nga ko̱jo júnjín sa̱ꞌínkjatsónjnú ni xi ndajín xi katsꞌén kui xotaa̱.

²⁴ Néná tjiín ngaꞌniú nga skónjnú tsi̱ꞌe̱ nga kꞌo̱kajínjnú, ko̱jo tsi̱ꞌe̱ nga ndándíjín ka̱majnú nga kongínjnú ngindyi̱ko̱n kui, kó nga ꞌniú tsja kꞌuiéjnú nga kjóchójnú nínga tikón kjo̱a̱jee̱,

²⁵ kui Néná xí ngototoo̱ kui xi ꞌboxiéꞌáná ta̱ngatꞌanii̱ Ndi̱a̱ná Jesukristoo̱, nga sꞌiee̱ kjo̱a̱je, ko̱jo kjo̱a̱botíxoma, ko̱jo ngaꞌniú, ko̱jo xá, ndeskande koó ngasꞌe̱, ko̱jo ngotꞌe̱, ko̱jo ta̱ kjiꞌání. Bo̱a̱ kjiꞌi.