Xo̱jo̱n Salmoo̱ 98 - Xo̱jo̱n eén Néná

Kixi̱ boá Néná

Só

¹ ¡Ndàjnúu̱ Néná ngo só tja̱tsi̱e̱! ¡Ngatꞌa̱ kuí boá xi achichí ni xi fíndikónná xi je katsꞌén! Tjia xi tsjiee̱ ko̱jo xi tjiín ngaꞌniú katsꞌénkjién nga katsꞌeén kondraa̱.

² Néná jè akó kjo̱a̱ꞌnaxiéꞌaá, ko̱jo jè akó kjo̱a̱kixi̱i̱, ngindyi̱ko̱n ngayeje xota̱ nga̱sondiee̱.

³ Néná jaꞌátsjiee̱n kjo̱a̱ni̱ma̱takoón ko̱jo kjo̱a̱ꞌniátakoón kjo̱a̱a̱ xota̱ na̱xi̱ńdá Israee̱l. ¡Ngaskande ngi̱ndie nínga ꞌniú kjin xi tjín tꞌanangii̱ xi je kamábe nga Néná boá xi ꞌboxiéꞌáná!

⁴ ¡ꞌNiú chaꞌayàjnú nga tsjakꞌuiéjnú nga ko̱ndókjo̱a̱jnú kjo̱a̱a̱ Néná ngayeje nga̱sondiee̱! ¡ꞌNiú ti̱ꞌantsjàjnúu̱, ko̱jo ndàjnúu̱ salmo̱!

⁵ ¡Ndàjnúu̱ salmo̱ Néná nga si̱ꞌankjaniéjnú arpaa̱, jo̱o̱n, arpa̱ ko̱jo salterio̱ ti̱ꞌankjaniéjnú!

⁶ Ti̱ꞌankjiénjnú tjioo̱ ko̱jo ndi̱ja̱a̱ cho̱tsa̱nga̱a̱. Takójnú kjo̱a̱tsjajnú ngindyi̱ko̱n Néná kui xi Rená.

⁷ ¡Nijan ngatsꞌèntsjà Néná ndáchíkoón ko̱jo ngayeje ni xi tjiín, ko̱jo nga̱sondiee̱ ko̱jo xota̱ xi tjiín!

⁸ ¡Xikoó tsi ngatsꞌéntsen tsja ndejeèꞌ, kó xikoó tsi ta̱ ngo ngatsꞌen yojoo̱ nga tsjatsꞌèn nga sie ngayeje na̱xi̱i̱ ngindyi̱ko̱n Néná!

⁹ Ngatꞌa̱ Néná ndibákatíjeé kui tꞌanangii̱, kó kjo̱a̱kixi̱i̱ sa̱ꞌínkjién nga ko̱tíjeé xota̱ nga̱sondiee̱, kó ndse̱je̱n tsꞌén ko̱tíjeé ngayeje xota̱ na̱xi̱ńdaá.