Xo̱jo̱n Salmoo̱ 97 - Xo̱jo̱n eén Néná

Néná boá ngo re xi kixi̱

¹ ¡Néná boá xi tsꞌénbotixómá! ¡Tsjangatamaa̱ tꞌanangii̱! ¡Tsjangatamaa̱ tji̱ngi̱ kjín xi tjiín!

² Ṉdi̱i̱ xi jñoó jaꞌatjiyajoo̱n nínga tikón Néná, kjo̱a̱ndaa̱ ko̱jo kjo̱a̱kixi̱i̱ boá xi tsꞌénkjién ki̱a̱ ngi̱ndie nínga botixómá.

³ Ngo ndiꞌí fítjoón ngindyi̱ko̱n kui, kó kuí boá xi tsꞌenkjié kondra̱ xi síndo nga ngo foaꞌatjiyajoo̱n.

⁴ Kjiꞌanga tsꞌénkjáꞌatꞌe tsꞌentsíjen yeje nga̱sondiee̱. Kó tꞌanangii̱ kotsijen, kó fotsié má.

⁵ Ngindyi̱ko̱n kui Néná xí tsi̱ꞌe̱ tꞌanangii̱, na̱xi̱i̱ ma ńdá xikoó ndo̱ꞌo̱si̱e̱én.

⁶ Nkꞌajmii̱ tsáyà kjo̱a̱kixi̱ xi tjiín Néná, kó ngayeje xota̱ na̱xi̱ńdaá be kjo̱a̱jee̱.

⁷ ¡Ngatꞌieé kjo̱a̱soboá ngayeje xota̱ xi ki̱a̱ ndyi̱tsꞌènxátꞌaa̱ ne kiniꞌándaa̱, ko̱jo ngayeje xi tsꞌéndíkón ni xi nénájín! ¡Ngindyi̱ko̱n Néná ti̱ndyiaxtiénjnú jún ngayeje ne xi ngasee̱.

⁸ Kjiꞌanga tsintꞌié na̱xi̱ńdáꞌniú Sioo̱n, tsja kamaá, ko̱jo na̱xi̱ńdáꞌniú xi chji̱a̱ni Jundáa̱, tsja ka̱maa̱ nga, ji Ne, ta̱ngatꞌanii̱ nga kixi̱ botíjé jí.

⁹ ¡Ngatꞌa̱ jí boá xi Ne xi tindyin ji nínga nkꞌaa̱, nga̱soón ngayeje tꞌanangii̱! ¡Achichí ꞌniú yandikoón, ta̱bo̱a̱jiín xikoó ngayeje ne xi ngasee̱!

¹⁰ Jún xi tjójnú Néná, ti̱ꞌanchꞌójnú ni xi ndajiín. Kuí boá xi foaꞌátjó ini̱ma̱a̱ xota̱ xi tsjiee̱, kó kuí boá xi ꞌboxiéꞌáni ngi̱ya tsja xota̱ xi ndajiín,

¹¹ Ndiꞌií boá xi tsꞌentsíjee̱n xota̱ xi kixi̱i̱, kó tsjaá kjo̱a̱tsja xota̱ xi kixi̱ síndo ini̱ma̱a̱.

¹² Jún xota̱ xi kixi̱, tsja ngatamajnú kjo̱a̱a̱ Néná, kó te̱ꞌéjnúu̱ ndokꞌóchji̱ì nga kjo̱a̱ꞌátsjienjnú jaꞌén tsjiee̱.