Xo̱jo̱n Salmoo̱ 96 - Xo̱jo̱n eén Néná

Néná boá xi rená

¹ ¡Ndàjnúu̱ Néná ngo só tja̱tsi̱e̱! ¡Ndàjnúu̱ Néná ngayeje kui nga̱sondiee̱!

² ¡Ndàjnúu̱ Néná, kó ti̱ꞌantsjàjnúu̱ jaꞌeén! ¡Ndyiojón ndyiojón tꞌíni̱jmijnú én tja̱tsi̱e̱ xi chji̱a̱a̱ kjo̱a̱a̱ kjo̱a̱ꞌnaxiéꞌaá!

³ ¡Tꞌíni̱jmijnú kjo̱a̱jee̱ ngi̱jii̱n na̱xi̱ńdaá, kó ngi̱jii̱n ngayeje nangi tꞌíni̱jmijnú ni xi fíndikónná xí katsꞌén kuí!

⁴ Ngatꞌa̱ Néná achichí tsie kjo̱a̱je tjiín, kó tsoboárií nga ꞌniú si̱ꞌantsjaa̱, kuí boá xi ndakon ngase ngi̱jii̱n ngayeje ne xi ngasee̱.

⁵ Ngatꞌa̱ ngayeje ne xi tjiín xota̱ na̱xi̱ńdaá, ta̱ a̱si̱én tsí bo̱a̱, ta̱nga Néná, kuí boá xi katsꞌénda ndiꞌakꞌajmii̱.

⁶ Kjo̱a̱jee̱ ko̱jo kjo̱a̱yandikoón boá xi síndo ngindyi̱ko̱n kui, kó ki̱a̱ ndiꞌandikoón ki̱a̱ tikón ngaꞌniuú ko̱jo kjo̱a̱tsjakjiꞌii̱.

⁷ Jún xota̱ ndiꞌa xi chji̱a̱ni ngayeje xota̱ na̱xi̱ńdá, cha̱ndikónjnú Néná, cha̱ndikónjnú kjo̱a̱je ko̱jo ngaꞌniú xí tjiín Néná.

⁸ Cha̱ndikónjnú Néná xikótsꞌèn tsoboaá nga si̱ꞌandikón jaꞌeén, ndibájo̱jnúu̱ kjo̱a̱tjó, kó ti̱tjásꞌi̱e̱njnú ki̱a̱ ndi̱tsee̱n ndiꞌandikoón.

⁹ ¡Ti̱ꞌantsjajnúu̱ Néná ta̱ngatꞌanii̱ kjo̱a̱tsjakjiꞌi xi tjiín nga tsjie kui! ¡Ngayeje xota̱ nga̱sondiee̱ ngatjatsié má ngindyi̱ko̱n kui!

¹⁰ Bi̱ nga tsó xota̱ na̱xi̱ńdaá: «¡Néná boá xi tsꞌénbotixómá!» Kuí boá xi ꞌniú íjñá kui nga̱sondiee̱, kó ka̱matíyájiín. ¡Kuí boá xi kixi̱ ko̱tíxomaa̱ ngayeje na̱xi̱ńdaá!

¹¹ ¡Tsjangatamaa̱ nkꞌajmii̱! ¡Tsjangatamaa̱ tꞌanangii̱! ¡Ngatjanie ndáchíkoón, ko̱jo ngayeje ni xi tjín ngi̱jii̱n!

¹² ¡Tsjangatꞌieé kꞌijñaá, ko̱jo ngayeje ni xi tjín ngi̱jii̱n! ¡Ngayeje yá xí tjín ngi̱jin kꞌijñaá, tsja ka̱maa̱ nga si̱é!

¹³ Nga sie ngindyi̱ko̱n Néná, ngatꞌa̱ jè ndibá, ngatꞌa̱ jè ndibákatíjeé xota̱a̱ kui tꞌanangii̱, kó kjo̱a̱kixi̱i̱ sa̱ꞌínkjién nga ko̱tíjeé xota̱ nga̱sondiee̱, kó kjo̱a̱ꞌniátakoón sa̱ꞌínkjién nga ko̱tíjeé xota̱ na̱xi̱ńdaá.