Xo̱jo̱n Salmoo̱ 95 - Xo̱jo̱n eén Néná

Tsjangatꞌiéná nga ko̱ndáa̱ Néná

¹ ¡Ndibájnú, kó tsjangatꞌiéná nga ko̱ndáa̱ Néná! ¡Si̱ꞌantsjàa̱ Néná, kui xi xikoó Ndi̱jo̱je xi ꞌboxiéꞌáná!

² ¡Tjian ngindyi̱ko̱n kui nga ko̱e̱ꞌée̱ ndokꞌóchji̱ì! ¡Ko̱ndáa̱ salmo̱ nga si̱ꞌantsjàa̱!

³ Ngatꞌa̱ Néná, achichí ngaꞌniú xí tjiín, ¡kó kuí boá ngo re xi nkꞌa ngase xaá, ngi̱jii̱n ngayeje ne xi ngasee̱!

⁴ Ngi̱ya tsja Néná tikón ngayeje ni xi tjín nínga ꞌniú na̱nga̱a̱ tꞌanangii̱, kó kuí tsi̱ꞌe̱ na̱xi̱ xi ꞌniú nkꞌaa̱.

⁵ Kuí tsi̱ꞌe̱ ndáchíkoón ngatꞌa̱ kuí boá xi katsꞌénda, kó tsjá boá xi katsꞌénda tꞌanangi xi ꞌniú tikoón.

⁶ ¡Ndibájnú, kó ku̱i̱ndyiaxtién nga si̱ꞌantsjàa̱, ko̱siée̱n tikóná ngindyi̱ko̱n Néná, ngatꞌa̱ kuí boá xi katsꞌéndaná!

⁷ Ngatꞌa̱ kuí boá xi Néná má, kó ñá boá xi xota̱ na̱xi̱ńdaá xi tindyión ki̱a̱ kꞌijñaá, ko̱jo ñá boá cho̱tsa̱nga̱ xi tjiyátsjà. Tsi ngotꞌe̱ ko̱nda̱ꞌyé ji nda̱a̱,

⁸ ngata̱ niꞌántajajínjnú ini̱ma̱jnú, xikó kamá ki̱a̱ Meriba̱, ko̱jo xikó kamá ni̱xtjii̱n Masaa̱, ki̱a̱ nangi kixií.

⁹ Nínga xota̱ xi xchájnú askotꞌayákónna, kó tsíchji̱a̱ti, ndatsi ja̱bo̱a̱ je kamábe ni xi katsꞌen an.

¹⁰ Yichán nó nga katsꞌenxchánjo̱ an kui xota̱ tji̱e̱e̱, kó bi̱ kixian an: Kuí boá kui xota̱ na̱xi̱ńdaá xi ngi̱jin ini̱ma̱a̱ je katsꞌénkjinna yojoo̱, kó jmí ni̱xtjin kamábe ndi̱yàna.

¹¹ Kuíni nga kjiꞌanga katsꞌenxchán án, bo̱a̱ kixian an nga kꞌo̱sꞌienjín ki̱a̱ tꞌanangi nínga sa̱ꞌínkjaꞌyá katsaki.