Xo̱jo̱n Salmoo̱ 94 - Xo̱jo̱n eén Néná

Néná kixi̱ tsꞌén kotsijee̱n xotaa̱

¹ ¡Ji Ne, jí boá ngo Ne xi tsꞌéngojo! ¡Take ji yojòo̱, Ne xi tsꞌéngojo!

² ¡Ye ꞌne̱ nendiꞌamasien xi botíjeé kui nga̱sondiee̱, te̱ꞌéchjíi̱ kui xota̱ xi nkꞌakoo̱n!

³ ¡Ngaskande kjiꞌání ji Ne, ngaskande kjiꞌání, nga tsja ka̱maa̱ xota̱ xi ndajiín!

⁴ Ngaskande kjiꞌání nga ku̱i̱chji̱a̱ én nkꞌakon, ko̱jo nga achichí yiꞌi maá yojoo̱ ngayeje xota̱ xi tsꞌén ni xi ꞌniú ndajiín.

⁵ Ndyi̱tsjánié xota̱ na̱xi̱ńdáa̱ ji Ne, ko̱jo kjo̱a̱ni̱ma̱ ndyi̱tsꞌènkjáꞌa xota̱ xi je tse̱.

⁶ Ndyi̱tsꞌènkꞌién ínchjín kꞌán xi je kꞌien xi̱ꞌii̱n, ko̱jo xota̱ xi xín nangi chji̱a̱ni, ko̱jo xota̱ xi je síndo xꞌi̱a̱n.

⁷ Kó bi̱ ndyi̱tsó ngase: «Sku̱i̱e̱jín kui nii̱ Néná, Nee̱ xota̱ Israee̱l nde koaꞌaxki̱jín kui nii̱».

⁸ Ngatamakjínjnú kui nii̱, jún xota̱ chi̱ni xi chji̱a̱ni na̱xi̱ńdaá, kó jún xota̱ xi kitikjo̱a̱, ngaskande kjiꞌání nga xota̱ xi kjínkón ka̱majnú jún.

⁹ Kui xi katsꞌénda tji̱bo̱a̱nijoo̱n, a ku̱i̱ntꞌièjín. Kó kui xi katsꞌénda ndyikoo̱n, a sku̱i̱e̱jín.

¹⁰ Kui xi tsꞌénchjíni̱e̱ xota̱ na̱xi̱ńdaá, a ko̱tíjéjín. ¡Kui xi bokoyaá kjo̱a̱kjíntakón xota̱ nga̱sondiee̱, a bejín!

¹¹ Néná be boá kjo̱a̱niꞌánkjoó xota̱ nga̱sondiee̱, kó ni xi ta̱kjo̱a̱ndaní bo̱a̱.

¹² Ji Ne, achichíra̱tsjaa̱ kui nda̱ xi niꞌínchji̱ni̱ ji, ko̱jo bokoyée̱ kjo̱a̱kitìi̱,

¹³ tsi̱ꞌe̱ nga kꞌuieé kjo̱a̱xió ni̱xtjin xi ndajiín, tji̱e̱nga kjimanda ti̱xa̱nga̱tsjo̱ó xota̱ xi ꞌniú ndajiín.

¹⁴ Ngatꞌa̱ Néná ku̱i̱ꞌíjñámasienjín xota̱ na̱xi̱ńdáa̱, ti̱nde ku̱i̱ꞌíjñá soboájín xota̱ xi je tsi̱ꞌe̱ kui.

¹⁵ Nga si̱ꞌansee̱n ni xi katsꞌén xotaa̱ kixi̱ ka̱má nginí, kó ngayeje xota̱ xi kixi̱ síndo ini̱ma̱a̱, ki̱a̱ ko̱e̱je̱tji̱ngi kui nii̱.

¹⁶ ꞌYá xí kꞌo̱xiéꞌána kjiꞌanga xota̱ xi ndajiín skjánjo̱na. ꞌYá xí an ko̱síko̱jona kondra̱a̱ xota̱ xi tsꞌén ni xi ꞌniú ndajiín.

¹⁷ Tsi Nénájín xi ko̱síko̱jona, jè tsá kꞌuijñá ini̱ma̱na ngi̱ya nínga xió kjiꞌii̱ kjo̱a̱bo̱yaa̱.

¹⁸ Ta̱nga kjiꞌanga bi̱ xian an: ¡Kjimongajón ndsa̱ko án! Kjo̱a̱ni̱ma̱takóo̱n boá xi tsjangaꞌniúna ji Ne.

¹⁹ Kjiꞌanga ꞌniú nda̱ kamána, kjo̱a̱niꞌándajòo̱n boá xi katsjaá kjo̱a̱tsja ini̱ma̱na.

²⁰ A jí sa̱ꞌínkamajoo̱ kui xota̱ xí botixómá xi ndajiín, kui xi kjo̱a̱kiti tsoó ni xi tsꞌénkjién nga ni xi ndajín tsꞌeén xota̱ xi ngasee̱.

²¹ ꞌBítíkó xtín yojoo̱ kondraa̱ xota̱ xi kixi̱i̱, kó tsjákjo̱a̱ nga niꞌánkꞌién xota̱ xi jmí jéjiín.

²² Ta̱nga Néná boá xi xikoó ngi̱ndie nínga botíjña an, Néna, kuí boá xi Ndi̱jo̱je xi ma ꞌniáko̱n an.

²³ Néná boá xi sa̱ꞌínkjindibánié ni xi ꞌniú ndajín xi katsꞌén, kó sa̱ꞌínkjié nga ti̱ kuii̱ ni xi ndajín xi katsꞌén sa̱ꞌínkjién, Néná, kui xi Néna boá xi sa̱ꞌínkjié kjin.