Xo̱jo̱n Salmoo̱ 92 - Xo̱jo̱n eén Néná

¡Achichí nda nganiꞌántsjaá Néná!

Só xi nda ni̱xtjin nga niꞌánkjaꞌyá.

¹ ¡Ji Ne, achichí nda nga ji si̱ꞌantsjajne̱, ko̱jo nga ko̱ndàjne̱ salmo̱ jaꞌée̱n, ji Ne xi tindyin ji ndiꞌakꞌajmii̱!

² Ko̱jo nga xiyà an kjo̱a̱ni̱ma̱takón xi tjiín nga ta̱jño̱ó, ko̱jo nga xiyà an kjo̱a̱ꞌniátakón xi tjiín nga jñoó.

³ Nga si̱ꞌankjanie ńjní xí tie naxá tjiín, ko̱jo salterioo̱, ko̱jo nga ko̱nda̱ꞌyá inda inda xikótsꞌèn fonie arpaa̱.

⁴ Ji Ne, nga ja̱koxi̱ achichí kjo̱a̱tsja katseꞌéní kjo̱a̱a̱ ni xi je kiniꞌín ji, kjo̱a̱a̱ ngayeje ni xi je katsꞌénda ndse̱ ji, ngaskande kjandayà tsjá má an.

⁵ A xi̱xi̱ yiꞌi ni xi kiniꞌínde ji, ji Ne. Achichí kjo̱a̱kjíntakón tjiín,

⁶ nga ngaskande xota̱ xi chi̱nii̱ bejín, ti̱nde xota̱ xi kitikjo̱a̱a̱ makjínjiín kui nii̱.

⁷ Kjiꞌanga xota̱ xi ꞌniú ndajiín, makjín nga tokjà xikoó xka̱a̱, ko̱jo xikoó tsi tjoó naxó, kuí xota̱ xi ni xi ndajín ndyi̱tsꞌe̱én, ta̱nga ta̱ tsi̱ꞌe̱ nga si̱ꞌankjie tsí ngatsjéni̱xtjin.

⁸ Ta̱nga ji Ne, ngatsjéni̱xtjin nga ji xi si̱ꞌantsjaa.

⁹ Ngatꞌa̱ kondra̱a̱, kꞌi̱e̱ tjíndo ji Ne, kó si̱ꞌankjie ngayejee̱, si̱ꞌantsojoboa ngayeje xi ni xi ꞌniú ndajín ndyi̱tsꞌe̱én.

¹⁰ Ta̱nga jí boá xi tsie ngase ngaꞌniú ko̱e̱ꞌéní xikoó cho̱ búfaloo̱, kó ko̱na̱ngínjin ji isti̱ tja̱tsi̱e̱ tokó án,

¹¹ kó ndyikón án xikótsꞌèn si̱ꞌanchaja kondra̱na. Kó tji̱bo̱a̱nijón án ku̱i̱ntꞌie̱é kui xota̱ xi ndajín, xi kondra̱ tsa̱ꞌa̱n kisꞌińdoni.

¹² Xota̱ xi kixi̱i̱, nda ko̱e̱je̱e̱, xikó maá yáxka̱jèn xí tjixoó, kó ka̱maxchá, xikó maá yákón xi tjín na̱xi̱ Líbanoo̱.

¹³ Ki̱a̱ kꞌuítji̱e̱ ki̱a̱ Ndiꞌaa̱ Néná, kó ki̱a̱ ko̱a̱ja̱a̱ naxó ki̱a̱ ndi̱tsen Néná.

¹⁴ Kó ndatsi je xchá ka̱ma, ti̱ kuí xí ko̱a̱ja̱a̱ to.

¹⁵ Tsi̱ꞌe̱ nga ko̱kó nga kixi̱ boá Néná, kui xi Ndi̱jo̱jena, kó ta̱soboá ni xi kixi̱ boá xi tjiín kui.