Xo̱jo̱n Salmoo̱ 91 - Xo̱jo̱n eén Néná

Néná boá xi kónná

¹ Kui xi tikón nga Néná xí tikón nkꞌajmii̱ skoón, ki̱a̱ kꞌuijñá ngindie nkꞌieén Néná xí tjiín ngayeje ngaꞌniuú.

² Bi̱ xiáa̱n Néná: Jí boá xi xikoó ngi̱ndie nínga botíjña̱ an, jí boá xi ngaꞌniúna, jí boá xi ꞌniátakón an.

³ Kuí boá xi kꞌo̱xiéꞌaá kjo̱a̱a̱ kui chja̱ya̱ xi ꞌbíjñá xi tsoboá cho̱o̱, ko̱jo kjo̱a̱a̱ kui chiꞌin xi tsꞌenkꞌiénná.

⁴ Tsja̱nga̱a̱ ko̱óꞌmánii̱, kó ngindie nga̱a̱ ka̱ma ku̱i̱ndyin ji, kjo̱a̱kixi̱i̱ kui, xikónií ngo ni xi ꞌbíchjaá ni xi ndajiín xi skoón jí.

⁵ Ka̱májín ko̱nda̱kin jí ni xi ndakon xi ma nga jñoó, ti̱nde ka̱májín ko̱nda̱kin jí yá yojó xi fítji̱e̱n nga ni̱xtjii̱n.

⁶ Ti̱nde ka̱májín ko̱nda̱kin jí chiꞌin xi nga ni̱xtji̱e̱e̱n ꞌbé, ti̱nde ka̱májín ko̱nda̱kin jí kjo̱a̱bo̱ya xi nga ma ndisꞌueé tsꞌenkjié.

⁷ Ka̱má tsi xtji̱e̱e̱n nínga skóo̱n, ku̱i̱xo̱ ngo mi̱ xota̱ xi kju̱i̱e̱són, ko̱jo tsi nga kixi̱i̱ ku̱i̱xo̱ tie mi̱ ngase xota̱ xi kju̱i̱e̱són, ta̱nga nínga tindyin ji, jmí ni ka̱májiín.

⁸ Nga ja̱koxi̱ ndyikin má ji xi sku̱i̱e̱, kótsꞌèn nga xota̱ xi ꞌniú ndajiín ko̱e̱ꞌéchjií.

⁹ Ngatꞌa̱ nga ikꞌíjñí ji Néná nga kui xi skoón, ko̱jo nga kui Néná xi tikón ndiꞌakꞌajmii̱ xi xikoó tsi ngi̱ndie nínga tindyin ji,

¹⁰ kuíní nga nde ngojín ni xi ndajín xi kji̱ndi̱bánieé, ti̱nde ngojín chiꞌin xi kjo̱chó ngi̱ndie nínga tindyin ji.

¹¹ Ngatꞌa̱ Néná sa̱ngíyá ndítsjiee̱ tiña nínga tindyin ji, tsi̱ꞌe̱ nga skoón ngayeje ndi̱yà nínga ku̱i̱ńtje̱ ji.

¹² Ngi̱ya tsja kui ndítsjiee̱ ko̱e̱je̱joo̱, tsi̱ꞌe̱ nga jmí ndi̱jo̱ sti̱ngíjín ndsa̱ki ji.

¹³ Ko̱jna̱ní ji xandi̱je̱e̱ ko̱jo ye̱e̱, kó si̱ꞌankjítie ji ndií xandi̱je̱e̱, ko̱jo kui cho̱ chꞌokjiꞌii̱.

¹⁴ Bi̱ tsó Néná: «Ta̱ngatꞌanii̱ nga tjoó an, kuíni nga an kꞌoxiéꞌá an, kó nkꞌa kꞌuijñá an, ta̱ngatꞌanii̱ nga je kamábe jaꞌénna.

¹⁵ Kjiꞌanga ku̱i̱chji̱a̱na, an sa̱ꞌinsée̱n, kó ki̱a̱ kotíjña̱jo an kjiꞌanga nda̱ ka̱maa̱, kó án boá xi sa̱ꞌindé án, kó tsjáa̱ kjo̱a̱je kui.

¹⁶ Achichí kjín nó tsjàa̱ nga kꞌuijñá nga̱sondie, kó án xí sa̱ꞌin an nga sku̱i̱e̱ kjo̱a̱ꞌnaxiéꞌána».