Xo̱jo̱n Salmoo̱ 90 - Xo̱jo̱n eén Néná

¡Ti̱ꞌinchikonñí ji xájne̱!

Moisee̱ bi̱ tsꞌén tsíchji̱a̱a̱ Néná.

¹ ¡Ji Ne, ta̱kjiꞌání nga ji xi kjima ji xikoó tsi ngi̱ndie nínga mindyionjne̱!

² Ndeskande ngindiee̱ nga kiniꞌínde ji na̱xi̱i̱, ko̱jo ngindiee̱ nga katseꞌée̱ ndiꞌí tꞌanangii̱, ko̱jo nga̱sondiee̱, ndeskande koó ngasꞌe̱, ko̱jo ngatsjéni̱xtjin nga jí boá xi ji ji.

³ Jí boá xi niꞌín ji nga chojo má nginí xota̱ nga̱sondiee̱, kó bi̱ sée̱: Chojo ngatama nginíjnú jún ndií Andaa̱n.

⁴ Ngatꞌa̱ nga ngo mi̱ nó ngindyikin ji, xikónií tsi ngojña̱ boá, kó jè jaꞌá kui ni̱xtjii̱n, ko̱jo xikónií tsi chiboa oraa̱ ni̱xtji̱e̱e̱n.

⁵ Chjafé ji xotaa̱ xikó maá nga fíjo̱ná ndáfoa xi ꞌniú mongaa̱, kuí boá xi xikoó tsi ngo ńjñá xí tsꞌénkjáꞌáná nga je tjisísi̱e̱én, xikónií tsi kꞌijñá xí kjimaxchaá,

⁶ kui xi nga ta̱jño̱ó, ꞌbíjñá sa̱si̱e̱ sa̱si̱e̱ kó boajaá naxó, ta̱nga ngije kamángixoón, je kixíꞌniú, kó xí ngijee̱.

⁷ Kjiꞌanga niꞌínxchín jí, kuí nii̱ xi tsꞌenkjiéjne̱, kó tsꞌéntsobéjinjne̱ kjo̱a̱xcháa̱n.

⁸ Jè ikꞌínde ngindyikin ji ni xi ꞌniú ndajín xi kiniꞌánjne̱, ko̱jo ni xi ꞌbíꞌmájne̱ je ikꞌínde tsijen kje̱n ji.

⁹ Nga ja̱koxi̱ ngayeje ni̱xtjin nga tindyionjne̱, ki̱a̱ tsí tji̱e̱n fochó kjiꞌanga niꞌínxchín jí, kó achichí tsá foaꞌa nójne̱, xikó maá nga ngo ndi̱yà chjondá.

¹⁰ Ichítié ko̱jo kan tsí nó mindyionjne̱ nga̱sondie, kó xota̱ xi ngi̱chí tjingáꞌniuú ngaskande ichítié ko̱jo kantié nó fóchó, ta̱nga ngayeje kjo̱a̱nkꞌakoo̱n, ta̱ ni xi jmí ni chjíjiín tsí bo̱a̱, ngatꞌa̱ tsá foaꞌa, xikoó tsi mongíntji̱e̱njne̱.

¹¹ ꞌYá xí be ngaꞌniú xí tjiín nga niꞌínxchín jí, kó kjo̱a̱xcháa̱n achichí ngaꞌniú xí tjiín, xikó maá kjo̱a̱yandikón xí chjiéngá ko̱e̱ꞌeé jí.

¹² Takoyèjne̱ tsi̱ꞌe̱ nga nda xꞌi̱a̱xki̱ ni̱xtjinjne̱, tsi̱ꞌe̱ nga ini̱ma̱jne̱ kꞌuieé kjo̱a̱kjínkón.

¹³ Ji Ne, ngaskande kjiꞌání nga kji̱ndi̱béchin nginíjne̱. ¡Ngatamani̱ma̱a̱ kui moso̱ xi tse̱!

¹⁴ ¡Te̱ꞌéndièjne̱ nga sꞌi̱kitsie májne̱ kjo̱a̱ni̱ma̱takóo̱n, tsi̱ꞌe̱ nga ngayeje ni̱xtjin nga ku̱i̱ndyionjne̱, ko̱ndájne̱ ji nga kꞌuiéjne̱ kjo̱a̱tsja!

¹⁵ Te̱ꞌéjne̱ kjo̱a̱tsja, xikó kjiꞌi ni̱xtjin nga katseꞌéjne̱ kjo̱a̱ndasen, ko̱jo ngayeje nó nga ikitjajinjne̱ ni xi ndajín.

¹⁶ Takée̱ ni xi kiniꞌín ji kui mosoo̱, kó takée̱ ndií kjo̱a̱je xi tjiín jí.

¹⁷ Kó kuí kjo̱a̱tsjakjiꞌi xi tikoón Ndi̱a̱ná, kui xi Néná, kui nii̱ xi ngatjandibániéná, tꞌíyé ji nga bo̱a̱ kjiꞌi xá xí je katsꞌén ndsa̱jne̱. ¡Jo̱o̱n Ne, kui xá xí je katsꞌén ndsa̱jne̱, tꞌíyé ji nga bo̱a̱ kjiꞌi kui nii̱!