Xo̱jo̱n Salmoo̱ 9 - Xo̱jo̱n eén Néná

Kjo̱a̱kixi̱i̱ Néná

Só xi katsꞌénda Ndabii̱.

¹ Ji Ne, ngayejení ini̱ma̱na nga sa̱ꞌintsjaá, kó xiyáni̱jmì án ngayeje ni xi fíndikónná xí niꞌín ji.

² Tsjakꞌuiéna ko̱jo tsja ka̱mana ta̱ngatꞌanii̱ ji, ¡siee só, ji Ne xi tindyin ji ki̱a̱ nkꞌajmii̱!

³ Kijíꞌoyání kondra̱na, ixó, kó ki̱a̱ jesón ngindyikin ji,

⁴ Ngatꞌa̱ jí boá xi titsitsijìi̱n kjo̱a̱ xi tsa̱ꞌa̱n, kó tiboeꞌéní kjo̱a̱nda xi tjínna. Ne xi kixi̱ boá ji, kó jè tibotíxome ji nga tindyinsén ji yáxíríe̱ ndikóo̱n.

⁵ Kiniꞌínxchínje̱ ji xota̱ na̱xi̱ńdaá, kiniꞌínkjisén ji xota̱ xi ndajiín, ¡kó kiniꞌínkjié ji jaꞌeén ngatsjéni̱xtjin!

⁶ Jè kichajá kondraa̱, jè kisꞌińdomasien ngatsjéni̱xtjin. Na̱xi̱ńdáꞌniú xí kiniꞌínkjatsén jí, ki̱a̱ nijan jesónjo̱ kjo̱a̱foaꞌátsjiee̱n.

⁷ Ta̱nga Néná, ngatsjéni̱xtjin nga kꞌuijñá, kó jè tikónndaa̱ yáxíríe̱ nínga botixómá nga sa̱ꞌínjeé xotaa̱.

⁸ Kó kixi̱ tsꞌén sa̱ꞌínjeé xota̱ na̱xi̱ńdá xí tjín nga̱sondiee̱, kó ta̱ són sa̱ꞌínjo̱ na̱xi̱ńdaá nga sa̱ꞌínjeé.

⁹ Néná boá xi skoón xota̱ xi ndajín mataꞌii̱n, kuí boá xi tsja̱angaꞌniuú xotaa̱ kjiꞌanga nda̱ ka̱maa̱.

¹⁰ Jí boá xi ka̱maꞌniátakoón xota̱ xi bee ji, ngatꞌa̱ ji Ne, jmíni̱xtjin ꞌbíndemasin ji xi ji mongasee̱.

¹¹ ¡Ndàjnúu̱ salmo̱ kui Néná xí tikón na̱xi̱ńdáꞌniú Sioo̱n! ¡Tꞌíyájnú ngi̱jii̱n ngayeje xota̱ na̱xi̱ńdaá ngayeje ni xi je katsꞌén kuí!

¹² Ngatꞌa̱ kui xi tsꞌéngojo nga niꞌánkjiesón xota̱ xi jmí jéjiín, jè jaꞌátsjiee̱n kui, kó kji̱e̱ chíyájiín nga ni̱ma̱ ndyi̱tsó xota̱ xi ndyi̱foaꞌatio kjo̱a̱ni̱ma̱a̱.

¹³ Ji Ne, ¡ngatama ni̱ma̱a̱ an! ¡Tsitsíjìi̱n kjo̱a̱ni̱ma̱ xi tsꞌénfoaꞌatio an, ta̱ngatꞌanii̱ kui xota̱ xi chꞌoo̱ an! ¡Jí boá xi katseꞌéndièjín ji nga ki̱a̱ jachó an nga̱ntjo̱a̱a̱ kjo̱a̱bo̱yaa̱!

¹⁴ Tsi̱ꞌe̱ nga ka̱ma sa̱ꞌintsjaá ji ngindyi̱ko̱n ngayeje xotaa̱, ki̱a̱ nga̱ntjo̱a̱a̱ na̱xi̱ńdáꞌniú Sioo̱n, kó achichí tsjakꞌuiéna kjo̱a̱a̱ nga ji kaꞌnaxiéꞌéní.

¹⁵ Xota̱ na̱xi̱ńdá xí bejiín jí, ti̱ kuii̱ ixóyà ti̱xa̱ xi katsꞌénda kui, ki̱a̱ kisitsakjájin se kui nda̱ꞌya xi ti̱ kuii̱ yején ꞌmá.

¹⁶ Néná jè akó yojoo̱, kó kixi̱ tsꞌén je katsꞌénseén xotaa̱. Xota̱ xi ꞌniú ndajiín, ti̱kuíní xi ixóyà chja̱ya̱ xi índo.

¹⁷ ¡Ngatjiesón xota̱ xi ꞌniú ndajiín, ko̱jo ngayeje xota̱ na̱xi̱ńdá xí je katsꞌénchíyaá ji!

¹⁸ Ngatꞌa̱ jmí tsi ngatsjéni̱xtjin nga si̱ꞌanchíyá xota̱ ni̱ma̱a̱, ti̱nde jmí tsi ngatsjéni̱xtjin nga xcha̱ja kjo̱a̱chiyaá xota̱ xi ndyi̱foaꞌatio kjo̱a̱ni̱ma̱a̱.

¹⁹ ¡Ye ꞌne̱ Ne, ti̱sítji̱n ji! ¡Nga boeꞌéndièjín ji nga nkꞌa ka̱maa̱ yojoo̱ xota̱ nga̱sondiee̱! ¡Kó ngindyikin ji nganiꞌánjeé na̱xi̱ńdaá!

²⁰ ¡Tꞌíjìi̱n ndikón tsi̱ꞌe̱ nga sku̱i̱e̱ndikoón! ¡Ngatamabe kui xotaa̱ nga ta̱ xota̱ tsí bo̱a̱!