Xo̱jo̱n Salmoo̱ 88 - Xo̱jo̱n eén Néná

Ji Ne, ngata̱ ꞌbíjñísoboéjínní

Só xi nda na̱xko̱yá tsi̱ꞌe̱ soó Koree̱, xi katsꞌénda Emaa̱n.

¹ Ji Ne, jí boá xi ꞌnaxiéꞌéní, kó ni̱xtjin ni̱xtji̱e̱n ni̱ma̱ tꞌíxián an ngindyikin ji.

² Te̱ꞌéndiè ji nga nínga tindyin ji, ko̱nda̱ꞌyá nga tsꞌénchji̱a̱a̱, ¡tasínijìnní kjiꞌanga ni̱ma̱ xian án nga kuichjiaá!

³ Ngatꞌa̱ ini̱ma̱na je tsꞌajoo̱n kjo̱a̱ni̱ma̱ xi tsꞌénfoaꞌatio an, nga ngaskande je mejeén ma kjáchó an nga̱tsjo̱ó.

⁴ Jè tjixki̱ an xikoó xota̱ xi je kjo̱chó ngi̱ya ti̱xa̱ nga̱tsjo̱ó, jè ngiti̱ jmíjín ngasena ngaꞌniú.

⁵ Jè ki̱a̱ tikónjin an ngi̱jii̱n xota̱ xi je jesoón, xikó maá xota̱ xi kiniꞌánkjiesón xi je ki̱a̱ síndo nga̱tsjo̱ó, kui xi ngiti̱ foaꞌátsjienjiín jí, kui xi ngi̱ya ndse̱ kachjeꞌéxínnii.

⁶ Ki̱a̱ ikꞌíjñíní ki̱a̱ ti̱xa̱ xi ꞌniú na̱nga̱a̱, kui ngi̱ndie na̱nga̱ xi ta̱nisién ꞌniú jñoó.

⁷ Ngaꞌniuú kjo̱a̱xcháa̱n jè tikónniéna, je kiniꞌín ndasenní, xikó maá tsi ngaꞌniuú ndáchíkoón xi katsꞌénkjígindiona.

⁸ Je kiniꞌínkjìnní ngayeje xota̱ xi nda yaꞌana, je kiniꞌín ji nga je ꞌniú kamáchꞌoó an. Jè tikónꞌya an, kó jmíjín kótsꞌèn kjo̱tjo an.

⁹ Ji Ne, ngaskande ndibajén má ndándyíkón án kjo̱a̱a̱ kui kjo̱a̱ndasee̱n. Ndyiojón ndyiojón chjiáa̱ ji, kó mejen an ndsa̱ án nínga tindyin ji.

¹⁰ A si̱ꞌin jí ngo kjo̱a̱ndikón ngi̱jii̱n xota̱ xi je jesoón. A kjo̱stjíe̱n a̱si̱énni̱xtjii̱n xota̱ xi je jesoón tsi̱ꞌe̱ nga tsja̱á ndokꞌóchji̱ì.

¹¹ Ki̱a̱ ngi̱ya nga̱tsjo̱ó a tjín xí ku̱i̱chji̱a̱ kjo̱a̱a̱ kjo̱a̱ni̱ma̱takóo̱n, kó ki̱a̱ ngi̱jii̱n xota̱ xi je jesoón, a tjín xí ku̱i̱chji̱a̱ kjo̱a̱a̱ kjo̱a̱kixìi̱.

¹² A tjín xí sku̱i̱e̱ndikón kjo̱a̱ndikón xí niꞌín ji, ki̱a̱ nínga ꞌniú jñoó, axa̱ tjín xi sku̱i̱e̱ndikón kjo̱a̱kixi̱ xi niꞌín ji, ki̱a̱ ngi̱ndie nínga je kiniꞌánchíyaá.

¹³ Ta̱nga an ji Ne, jí boá xi tsꞌénmíꞌaá nga ko̱si̱ke̱jení, kuíni nga xki̱ ta̱jñó, xki̱ ta̱jñó ngindyikin ji kjo̱chó kjo̱a̱ndokjo̱a̱na.

¹⁴ Ngatꞌa̱ ji Ne, míkjo̱a̱a̱ nga an niꞌínchꞌíní kó mindyinꞌmíní.

¹⁵ Ndeskande koó nga kjindí an nga achichí tsie kjo̱a̱ni̱ma̱ tsꞌénfoaꞌatio an, ¡kó jè mejeén kꞌien an katsaki! Jé katsꞌenchíkjo̱a̱ an kjo̱a̱ni̱ma̱ xi kiniꞌínkjaꞌatíní, ¡kó jè ngiti̱ chikjo̱a̱jínna ngase!

¹⁶ Kjo̱a̱xcháa̱n an je tsꞌákaniéna, kó ni xi ta̱nisién chꞌokjiꞌii̱ jè katsꞌénna,

¹⁷ ngatꞌa̱ xikoó tsi ndáfoaa̱ je íchjáꞌyána nga ngo ni̱xtjii̱n, kó je jaꞌatjiyajon yejena.

¹⁸ Jí boá xi kiniꞌínkjìnní amingo̱na, ko̱jo xota̱ xi nijan ma an, kó ngotꞌe̱ ꞌne̱, ta̱kuítsí kui ngi̱ndie xi jñoó xi tikón ngasena.