Xo̱jo̱n Salmoo̱ 85 - Xo̱jo̱n eén Néná

¡Te̱ꞌé ji ngi̱ndie nga ku̱i̱ndyion nginíjne̱!

Só xi nda na̱xko̱yá tsi̱ꞌe̱ soó Koree̱.

¹ Ji Ne, achichí nda niꞌínje̱ ji xota̱ xi chji̱a̱ni nangìi̱, ngatꞌa̱ kiniꞌín kjindibeꞌóyé nginí ji xota̱ tji̱e̱e̱ Jakoo̱b xi kisꞌińdoꞌniú ngasꞌe̱.

² Jí boá xi kichꞌiénijín ji ni xi ꞌniú ndajín xi katsꞌén xota̱ na̱xi̱ńdáa̱, kó ikꞌíñiꞌmi ji ngayeje jé xí katsꞌén.

³ ¡Ngiti̱ kiniꞌínxchínjín ji ngase, kó xín kiniꞌínkjeꞌe ji kjo̱a̱xcháa̱n!

⁴ Ji Ne xi ꞌnaxiéꞌéjne̱, ti̱ꞌintja̱tsi̱e̱ye nginíjne̱ kó ngiti̱ niꞌínxchínje̱jínjne̱ ngase.

⁵ A ngatsjéni̱xtjin si̱ꞌinxchínje̱jne̱ ji̱n. Kó a si̱ꞌinxchínje̱ jí xota̱ tji̱e̱ xi sꞌe̱ kꞌuieé nga.

⁶ A jè ngiti̱ ko̱e̱ꞌéndièjín ji nga ku̱i̱ndyion ngasejne̱, tsi̱ꞌe̱ nga ji̱n xi xota̱ na̱xi̱ńdá tse̱ tsja ka̱majne̱ kjo̱a̱a̱ ji.

⁷ ¡Ji Ne, takejne̱ kjo̱a̱ni̱ma̱takóo̱n, kó ꞌnaxiéꞌéjne̱!

⁸ Kosiennijòo̱n ni xi ka̱tso̱ Néná, ngatꞌa̱ ku̱i̱chji̱a̱ kjo̱a̱ kjo̱a̱xió xi kꞌuieé xota̱ na̱xi̱ńdaá ko̱jo xota̱ tsjiee̱, tsi̱ꞌe̱ nga ngiti̱ kitikjo̱a̱jín ka̱ma.

⁹ Jè tikón tiña kjo̱a̱ꞌnaxiéꞌaá xota̱ xi bendikón Néná, tsi̱ꞌe̱ nga kjo̱a̱jee̱ Néná kꞌuijñá tꞌananginá.

¹⁰ Kjo̱a̱ni̱ma̱takoón ko̱jo ni xi ja̱koxi̱i̱, xikoó tsi kasakoo̱ xkjín, kó kjo̱a̱kixi̱i̱ ko̱jo kjo̱a̱xioó, ndse̱je̱n kamá, xikoó tsi atíndsoꞌá xkjín.

¹¹ Ni xi ja̱koxi̱i̱ xikoó tsi ngi̱jin tꞌanangii̱ kjo̱tjokjaní, kó kjo̱a̱kixi̱i̱ xikoó tsi ndeskande nkꞌajmii̱ skotsíjenni.

¹² Néná nda sa̱ꞌínkꞌijñáná, kó tꞌananginá nda ni xi ka̱maxchaá,

¹³ kó kjo̱a̱kixi̱i̱, ki̱a̱ ko̱e̱je̱tjoón kui, kó kuí boá xi ki̱a̱ ku̱i̱ꞌíjñáná ndi̱yà nínga fotsoꞌbá kuí.