Xo̱jo̱n Salmoo̱ 84 - Xo̱jo̱n eén Néná

¡Achichí tsjákjiꞌi na̱ngo̱xi̱i̱!

Só xi nda na̱xko̱yá tsi̱ꞌe̱ soó Koree̱.

¹ ¡Achichí tsjachon ngi̱ndie nínga tindyin ji, ji Ne xi xi tsi̱ꞌe̱ jájuún!

² Achichí ni xi kjimaa̱ ini̱ma̱na nga mejeén nga ki̱a̱ kꞌuíjñá ndi̱tsee̱n na̱ngo̱xi̱i̱ ji Ne, ¡ini̱ma̱na ko̱jo yojona mejeén nga si̱eé kui Néná xí tikoón.

³ Ngaskande ni̱sie ngorrioo̱n sakoó ngi̱ndie nínga ꞌbíndo, kó ni̱sie stseé sakoó ndo̱bo̱a̱ nínga ꞌbíndo ndií, ki̱a̱ tiñaa̱ ṉchandikóo̱n ji Ne xi tsi̱ꞌe̱ jájuún, jí boá xi rena, ko̱jo jí boá xi Néna ji.

⁴ ¡Achichíra̱tsjaa̱ xota̱ xi ki̱a̱ síndo ndiꞌa nínga tindyin ji! ¡Ngatꞌa̱ ngatsjéni̱xtjin nga ji ndyi̱tsꞌèntsjaà!

⁵ ¡Achichíra̱tsjaa̱ kui nda̱ xi ji boeꞌée̱ ngaꞌniú, kui xi ngayeje ini̱ma̱a̱ nga ki̱a̱ ko̱e̱je̱ ndi̱yàa̱!

⁶ Kjiꞌanga kjo̱a̱ꞌaxtikjá nangi soón Kjo̱a̱chaꞌaá, ko̱síkjoyá nga ndáńchꞌi̱ nínga tjo ndáfoaa̱, sa̱ꞌín kui ngi̱ndiee̱, kó stsé xi tjón boaꞌaa̱, ꞌbikítsie maá kjo̱a̱niꞌánchikonñé.

⁷ Tji̱e̱nga ndyi̱fí, tsie ngase ngaꞌniú kꞌuieé, kó sku̱i̱e̱ Néná nga kjo̱chó na̱xi̱ńdáꞌniú Sioo̱n.

⁸ ¡Ji Ne, ji xi Nee̱ jájuún ji, ndaꞌyé ji kjo̱a̱ndokjo̱a̱na! Tasínijìnní, ji xi Nee̱ Jakoo̱b ji!

⁹ Tsitsíjin ji Ne, ji xi ꞌbíchjée̱ ni xi ndajiín, tsitsíjìi̱n kje̱n kui xi ji kachjeꞌéjin ji.

¹⁰ Ngatꞌa̱ ta̱sá nda ngase nga ngo ni̱xtjin kotíjña̱ an na̱ngo̱xi̱i̱, ta̱bo̱a̱jiín tsi ngo mi̱ ni̱xtjin kjin kotíjña̱ñaa. Ta̱sá kjo̱a̱ꞌajin an nga ki̱a̱ kotíjña̱ an nga̱ntjo̱a̱ Ndiꞌaa̱ Néna, ta̱bo̱a̱jiín nga ki̱a̱ kotíjña̱ an ndiꞌaa̱ nínga ndajín kjima.

¹¹ Ngatꞌa̱ jí boá xi tsꞌué jí, ko̱jo jí boá xi ꞌbíchjaá ni xi ndajín, jí boá xi tiboeꞌéjne̱ kjo̱a̱nda ko̱jo kjo̱a̱yandikón. Kó Néná kjo̱a̱ꞌáxínjiín kjo̱a̱ndaa̱ xota̱ xi ngatsjéni̱xtjin nga nda ndyi̱tsꞌe̱én.

¹² ¡Ji Ne xi tsi̱ꞌe̱ jájuún, achichíra̱tsjaa̱ kui nda̱ xi ji kjimaꞌniátakoón!