Xo̱jo̱n Salmoo̱ 83 - Xo̱jo̱n eén Néná

¡Ti̱ꞌincheje ji kondra̱jne̱!

Só xi katsꞌénda Asaa̱f.

¹ Ji Ne, ji Ne, ndókjo̱e̱ ji, chjáxꞌé jí ndso̱ꞌbe, ngata̱ xiójín mindyin ji.

² Ngatꞌa̱ kꞌi̱e̱e̱ je kjima xa̱n xa̱n kondra̱a̱, kó kui xi chꞌoo̱ ji, je ndyi̱kjininkꞌa to̱ko̱.

³ Ndyi̱tsꞌènkjó cha̱n cha̱n ni xi ndyi̱ꞌbínda kondra̱a̱ xota̱ na̱xi̱ńdáa̱, kó je índa ni xi ndajín xi sa̱ꞌínjo̱ xota̱ xi ji tichìi̱n,

⁴ kó ngaskande je bi̱ katsó: «¡Ndibájnú, kó si̱ꞌankjie tsi̱ꞌe̱ nga nde ngiti̱ ingo na̱xi̱ńdá ka̱májín, kó nga nginijánjín ko̱ndókjo̱a̱ ngase jaꞌeén xota̱ na̱xi̱ńdá Israee̱l!»

⁵ Ngatꞌa̱ ta̱ ngo tsí kamá nga inda ngo ni kondra̱ tse̱,

⁶ kó ki̱a̱ kamátikó ki̱a̱ ndiꞌaa̱ xota̱ tji̱e̱e̱ Endoo̱n, ko̱jo xota̱ ismaelitaa̱, ko̱jo xota̱ tji̱e̱e̱ Moaa̱b, ko̱jo xota̱ angarenoo̱,

⁷ ko̱jo xota̱ tji̱e̱e̱ Ngebaa̱l, ko̱jo xota̱ tji̱e̱e̱ Amoo̱n, ko̱jo xota̱ tji̱e̱e̱ Amalee̱k, ko̱jo xota̱ Filisteaa̱, ko̱jo xota̱ na̱xi̱ńdáꞌniú Tiroo̱

⁸ ko̱jo xota̱ xi chji̱a̱ni nangi Asiria̱ ki̱a̱ nijan kamá kui xotaa̱, kó kuí boá xi tsjangaꞌniuú xota̱ tji̱e̱e̱ Loo̱t.

⁹ ¡Bo̱a̱ ti̱ꞌinje̱ ji kui xotaa̱, xikó kiniꞌínje̱ ji xota̱ tji̱e̱e̱ Mandiaa̱n! ¡Xikó kiniꞌínje̱ ji nda̱jun xi kiꞌmí Sísaraa̱, ko̱jo nda̱ re Jabii̱n ki̱a̱ tꞌa ndejèꞌ Sisoo̱n!

¹⁰ Kui xi kiniꞌánchaja ki̱a̱ nangi Endoo̱r, kó ki̱a̱ kisꞌiyojo tꞌanangii̱, xikó maá yeꞌe.

¹¹ ¡Bo̱a̱ ti̱ꞌinje̱ ji xota̱ xi ngito̱ko̱o̱, xikó kiniꞌínje̱ ji Oree̱b ko̱jo See̱b! Xikó kiniꞌínje̱ ji já ngito̱ko̱ Sebaa̱ ko̱jo Salmunaa̱,

¹² ngatꞌa̱ bi̱ katsó: Si̱ꞌantsa̱ñá kuí tꞌanangi nínga tjín ndi̱xcho̱ xi tsi̱ꞌe̱ Néná.

¹³ ¡Ji Ne, ti̱ꞌin ji nga ndyíkií ngatjíjo̱, xikó má tsꞌén fíjo̱ tjo̱o̱ xka̱ kixií!

¹⁴ ¡Bo̱a̱ kon ngatama ji xikoó ndiꞌí xí tsꞌenkjié kꞌijñaá, xikoó ndiꞌí xí tsꞌenkjié na̱xi̱i̱!

¹⁵ ¡Bo̱a̱ tsꞌén ti̱yítji̱ngìi̱ nga siꞌinkjìn jí tjo̱ꞌniúu̱! ¡Tindyiendikíi̱n nga siꞌinkaꞌe ji stsé xí ta̱nisién ꞌniuú!

¹⁶ Ji Ne, ¡tꞌíkitsie máa̱ kjo̱a̱soboá kje̱n, tsi̱ꞌe̱ nga ko̱ngase jaꞌée̱n!

¹⁷ ¡Ngatsjéni̱xtjin ti̱ꞌinkjeꞌe ji kjo̱a̱soboá ko̱jo nda̱ ngatamaa̱! ¡Nga niꞌán ni̱ma̱kjo̱a̱, kó nga niꞌánkjie!

¹⁸ ¡Kó ngatamabe nga ta̱ jí tsí, ji xi ꞌmií Néná, nga jí boá xi Néná xí tikón nkꞌajmii̱ xi tsꞌénbotixómaá ngayeje nga̱sondiee̱!