Xo̱jo̱n Salmoo̱ 82 - Xo̱jo̱n eén Néná

Néná boá ngo Ne xi kixi̱

Só xi katsꞌénda Asaa̱f.

¹ Néná boá xi tikóntjoón kui ngi̱ndie nínga botíxoma xi tikón ki̱a̱ nkꞌajmii̱, kó ngamasiee̱n ngayeje ne xi ki̱a̱ síndoo̱, kuí boá xi tsꞌénjeé:

² «Ngaskande kjiꞌání nga to̱kó kixi̱jín si̱ꞌanjéjnúu̱ xotaa̱, ko̱jo nga ta̱sá xota̱ xi ndajiín xi ko̱ꞌna̱xiéꞌájnú.

³ ¡Tasíko̱jojnú xota̱ xi jmí ngaꞌniújiín ko̱jo xi síndo xꞌi̱a̱a̱n! ¡Kixi̱ ti̱ꞌanjo̱jnú xota̱ xi ndasen síndoo̱, ko̱jo xota̱ xi ni chjieén!

⁴ ¡ꞌNa̱xiéꞌájnú xota̱ xi ndasen síndoo̱, ko̱jo xota̱ xi ni chjieén! ¡Ti̱ꞌandéjnú ngi̱ya tsja xota̱ xi ꞌniú ndajiín!

⁵ Ta̱nga jún jmí ni yajínjnú, ti̱nde mejénjínjnú nga ka̱makjínjnú, to̱kó ki̱a̱ tima kichajájnú nínga jñoó, kó kuí nii̱ xi tsꞌénkjátsié má ngindiee̱ tꞌanangii̱.

⁶ »Kó bi̱ kixian an: Jún boa xi Nejnú, kó ngayeje jún boá xi ndií Néná xí tikón nkꞌajmii̱,

⁷ ta̱nga ko̱yàjnú xikoó ngayeje xotaa̱, ¡kó kꞌo̱kajnú xikoó ngayeje xota̱xá xí botixómaá!»

⁸ ¡Ji Ne, ti̱sítji̱n ji, kó ji ti̱ꞌinjée̱ xota̱ nga̱sondiee̱! ¡Ngatꞌa̱ jí boá xi tse̱ ka̱ma ngayeje na̱xi̱ńdá xí tjiín!