Xo̱jo̱n Salmoo̱ 81 - Xo̱jo̱n eén Néná

Néná achichí nda tsꞌénjo̱ xota̱ na̱xi̱ńdaá

Só xi katsꞌénda Asaa̱f.

¹ ¡Tsja ngatamajnú nga ko̱ndàjnúu̱ Néná! ¡Ngatꞌa̱ kuí boá xi tsjangaꞌniúná! ¡Chaꞌayàmájnú nga tsjangatꞌiéjnú nga si̱ꞌantsjajnúu̱, Nee̱ Jakoo̱b!

² ¡Ndàjnúu̱ salmo̱, kó ti̱ꞌankjaniéjnú panderoo̱, ko̱jo arpaa̱, ko̱jo salterioo̱!

³ Ti̱ꞌankjaniéjnú tjioo̱ kjiꞌanga si̱ꞌánjnú sꞌué nga chjindié saá, ko̱jo nga si̱ꞌánjnú sꞌué nga ńtsó saá, ko̱jo ni̱xtjin nga si̱ꞌán sꞌué ndikónná.

⁴ Ngatꞌa̱ kjo̱a̱kiti boá kui nii̱ tsi̱ꞌe̱ xota̱ Israee̱l, kó Nee̱ Jakoo̱b boá xi bo̱a̱ tsꞌén atíxoma.

⁵ Kuí boá xi ngo kjo̱a̱kiti tsi̱ꞌe̱ xota̱ tji̱e̱e̱ Kosiee̱, kjiꞌanga jatjoni nangi Ejipto̱. Tsintꞌièe̱ ngo nda̱ xi bejín an, xi bi̱ katsó:

⁶ «Jè jaꞌáxín án nga̱són tjiàa̱ kui chꞌià é xí yaꞌanijín, jé kamándé tsjá kjo̱a̱a̱ kui ńdiekachján xi ta̱nisién eé.

⁷ Kjiꞌanga ꞌniú nda̱ kamaá, ni̱ma̱ kase ji nga kandokjo̱e̱ní, kó án tsꞌaxiéꞌaá, katsꞌénseén ndeskande ngi̱jii̱n ṉdi̱ xi jñó má ndyi̱a̱a̱ nínga tikónꞌmá an, ki̱a̱ má nínga tjitjó ndáfoaa̱ ki̱a̱ ngi̱ndie xi ꞌmí Meribaa̱, ki̱a̱ askotꞌayákoón.

⁸ »Jún xota̱ na̱xi̱ńdá xí tsa̱ꞌa̱n, ndaꞌyájnú ni xi tsꞌénbotixoma an, ¡jún xota̱ Israee̱l tsi ko̱ndaꞌyájnúꞌun!

⁹ Kꞌuiéjiín ne xi kje̱ꞌe, ti̱nde ko̱si̱e̱ntꞌajínjnúu̱ tikójnú ne xi nde yajín.

¹⁰ Án boá xi Nejnú má an, án boá xi tsꞌaxiéjnúꞌun ki̱a̱ nangi Ejipto̱. ¡Chjáxꞌájnú ndso̱ꞌbájnú, kó an tsjajnúꞌun ni xi xi̱ni̱e̱jnú!

¹¹ »Ta̱nga xota̱ na̱xi̱ńdána tsintꞌiéjiín nda̱na, kó xota̱ Israee̱l, ngiti̱ kamámejénjiín an.

¹² Kuíni nga ta̱sá katsjandièe̱ nga katsꞌén ni xi kamámejeén ini̱ma̱a̱, tsi̱ꞌe̱ nga ki̱a̱ kijítji̱ngi ni xi ndajín xi kamámejeén katsꞌén.

¹³ »¡Achichíra̱ tsjana tsi xota̱ na̱xi̱ńdána tsintꞌiéna katsaki! ¡Achichíra̱ tsjana tsi xota̱ Israee̱l ki̱a̱ kisꞌiṉtso̱ma ndi̱yàna katsaki!

¹⁴ ¡Ta̱ ngotjónra̱ tsí katsꞌenkjié án kondra̱a̱, kó katsꞌenkjiénra̱ an ngaꞌniúna nga katsꞌenkjié an kondra̱a̱!

¹⁵ Xota̱ xi chꞌoo̱ Néná, ki̱a̱ra̱ je ni̱ma̱kjo̱a̱ kixindyia ngindyi̱ko̱n kui, ta̱nga ngatsjéni̱xtjinra̱ nga Néná kotijée̱.

¹⁶ Néná rá xi katsjaá to ndso̱ko̱a̱n ṉño̱pan xi nda ngasee̱, kó kuira̱ ntsjién xí ꞌbe tꞌa ndi̱jo̱jee̱, katsjaá tsi̱ꞌe̱ sa̱ꞌíntsie cha̱n cha̱a̱n».