Xo̱jo̱n Salmoo̱ 80 - Xo̱jo̱n eén Néná

¡Takejne̱ kjo̱a̱ndàa̱!

Só xi katsꞌénda Asaa̱f.

¹ Ji Ne xi koo̱n xota̱ Israee̱l, ndaꞌyé ji: Ji xi xi tińtje̱tjée̱n xota̱ tji̱e̱e̱ Kosiee̱, xikoó tsi ngo xtín cho̱tsa̱nga̱, ji xi ki̱a̱ botíxome ji ngi̱jii̱n keruu̱b: ¡Take ji ngaꞌniúu̱!

² ¡Ngindyi̱ko̱n xota̱ tji̱e̱e̱ Efraii̱n, ko̱jo xota̱ tji̱e̱e̱ Benjaa̱, ko̱jo xota̱ tji̱e̱e̱ Manasee̱, take ji ngaꞌniúu̱, kó ndibé ꞌna̱xiéꞌéjne̱!

³ ¡Ji Ne, ti̱ꞌintja̱tsi̱e̱ye nginíjne̱! ¡Takejne̱ ndiꞌí ꞌna̱a̱ kje̱n ji, kó kjo̱tjoꞌajne̱!

⁴ Ji Ne xi tsi̱ꞌe̱ jájuún, ngaskande kjiꞌání nga to̱kó si̱ꞌinxchín jí, kondraa̱ nga ndyi̱chji̱a̱a̱ xota̱ na̱xi̱ńdáa̱.

⁵ Ngindiee̱ nga nichinie xi ko̱e̱ꞌée̱, ta̱sá pan xi tjiín ndándyíkon katseꞌée̱, Ngindiee̱ nga ni xi ꞌyó ko̱e̱ꞌée̱, ta̱sá achichí ndándyíkón katseꞌée̱ nga katsꞌe.

⁶ Jí boá xi kiniꞌín ji nga xota̱ tꞌa ndiꞌajne̱ tsajnókiejne̱, ¡ko̱jo nga kondra̱jne̱ ti̱ kuii̱ tsajnójo̱ xkjín!

⁷ ¡Ji Ne xi tsi̱ꞌe̱ jájuún, ti̱ꞌintja̱tsi̱e̱ye nginíjne̱! ¡Takejne̱ ndiꞌí ꞌna̱a̱ kje̱n ji, kó kjo̱tjoꞌajne̱!

⁸ Ji̱n boá xi xikoó ńꞌniú tostsi̱jè xí kjindibéje̱ni ji ki̱a̱ nangi Ejipto̱, kó tsi̱ꞌe̱ nga kꞌi̱e̱ ikꞌítji̱e̱jne̱ kui tꞌanangii̱ ikiyitji̱ngìi̱ xota̱ na̱xi̱ńdaá.

⁹ Kiniꞌíntsjie tꞌanangii̱ tsi̱ꞌe̱ kui tostsi̱je̱è, kó kisꞌiee̱ ja̱ma̱, sꞌe̱ kisꞌikitsieni ngayeje na̱xi̱ńdaá.

¹⁰ Achichí kjín kamá nga na̱xi̱i̱ kisiꞌmani tji̱nkꞌi̱e̱én, kó ꞌyo̱o̱ yíꞌmáni yákón xi tsi̱ꞌe̱ Néná.

¹¹ Katsꞌénkjín ndií kui tostsi̱je̱è ngaskande nga jachó ndáchíkoón, kó ꞌyo̱o̱ ngaskande ndejeèꞌ jachó.

¹² Ji Ne, ánní nga kiniꞌínkixóndé jí xó xí tjíchjáꞌyáni, nga ngayeje xota̱ xi foaꞌaa̱ ꞌboje̱n too̱ kui tostsi̱jèe̱.

¹³ Chi̱nga̱ kꞌijñaá je katsꞌénkjatsón, kó ngayeje cho̱ tamaá ndyi̱tsꞌènkjié.

¹⁴ Ji Ne xi tsi̱ꞌe̱ jájuún, ndibé tasíke̱je nginí ji̱n, ¡Tsitsíjin ji ndeskande nkꞌajmii̱, ti̱ꞌinkjé, kó ndibé tsitsíjìi̱n kui jno̱ tostsi̱je̱è!

¹⁵ Kuí boá kui xka̱ xi ndse̱ má ji xi ítji̱e̱, ko̱jo kui ꞌyo̱ xi tse̱ xi ji katseꞌéngaꞌníi̱.

¹⁶ Jè ikichá kó je ikꞌítí, je kjifesón ta̱ngatꞌanii̱ nga kamábe nga tamá tikón kje̱n ji.

¹⁷ Tasíke̱je ji kui nda̱ xi ji kachjeꞌéjin ji, kui ndií nda̱ xi̱ꞌin xi ji katseꞌéngaꞌniúu̱.

¹⁸ Bo̱a̱ tsí tsꞌén nga si̱ꞌankjinjínjne̱ yojojne̱ ji. ¡Te̱ꞌéndièjne̱ nga ku̱i̱ndyion ngasejne̱ nga̱sondie, kó jí boá xi si̱ꞌankaxomajne̱ jaꞌée̱n!

¹⁹ Ji Ne xi tsi̱ꞌe̱ jájuún. ¡Te̱ꞌéndiè ji nga kji̱ndi̱báchon nginíjne̱ ji! ¡Te̱ꞌéndiè ji xcha̱jne̱ xcha̱ ꞌna̱ ꞌna̱ ji̱n kje̱n ji tsi̱ꞌe̱ nga kjo̱tjoꞌajne̱!