Xo̱jo̱n Salmoo̱ 79 - Xo̱jo̱n eén Néná

ꞌBijñámasiénjínná Néná

Só xi katsꞌénda Asaa̱f.

¹ Ji Ne, xota̱ na̱xi̱ńdá xí bejiín jí je jachókjánjo̱jne̱, je tsꞌasꞌien ki̱a̱ na̱ngo̱xi̱ tsjièe̱, kó je katsꞌénkjiékjo̱a̱ nga katsꞌénkjatsón na̱xi̱ńdáꞌniú Jerusale̱n.

² Atítsojo yojo kꞌiee̱n mosòo̱, tsi̱ꞌe̱ nga iskjinie ni̱sie xi kjinie yojo siee̱n, kó yojoo̱ xota̱ tsjiée̱ cho̱ tamá xí tjín tꞌanangii̱ katsjaá.

³ Iskjitjón jiín xota̱ xi jesoón, xikó maá tsi ndáfoa ngayeje na̱xi̱ńdáꞌniú Jerusale̱n kó kui xota̱ xi je jesoón nde ngojín xi bónijín.

⁴ Xota̱ xi síndotꞌa na̱xi̱ńdá nínga tindyionjne̱ mojnókiejne̱, ¡kjo̱a̱soboá ko̱jo kjo̱a̱mojnóchaá xota̱ xi síndotꞌajne̱ kjimajne̱!

⁵ Ngaskande kjiꞌání ji Ne. A ngatsjéni̱xtjin nga si̱ꞌinxchín jí. A xikónií ndiꞌí xí tjítíngá ka̱ma kjo̱a̱chi̱ni̱i̱.

⁶ Ti̱ꞌinxchínje̱ ji xota̱ na̱xi̱ńdá xí bejiín jí, ko̱jo xotaa̱ ngi̱ndie nínga botíxoma xi tsꞌénkáxomájín jaꞌée̱n.

⁷ Ngatꞌa̱ kuí boá xi je katsꞌénkjié xota̱ tji̱e̱e̱ Jakoo̱b, kó je katsꞌénkjiékjo̱a̱ ngi̱ndie nínga síndo nga.

⁸ Ngata̱ ji̱njín chjeꞌéchjíjne̱ jé xí katsꞌén xota̱ xi xchájne̱ ngasꞌe̱, ¡tsá ye ji! Kó ngatjandibániéjne̱ kjo̱a̱ni̱ma̱takóo̱n, ngatꞌa̱ jè ta̱nisién ꞌniú jè kiniꞌánchajajne̱.

⁹ ¡Ji Ne xi ꞌboxiéꞌájne̱, ¡tasíke̱jejne̱! Ta̱ngatꞌanii̱ kjo̱a̱je xi tjiín jaꞌée̱n, ¡xín ti̱ꞌinkjeꞌejne̱ jeé, kó ti̱ꞌinjetakínjne̱ jéjne̱, ta̱ngatꞌanii̱ kjo̱a̱tjó xi tjiín jaꞌée̱n!

¹⁰ Míkjo̱a̱a̱ nga: «Ñá tikón Nee̱ ꞌne̱», ka̱tso̱jne̱ xota̱ na̱xi̱ńdá xí bejiín jí. Ngatamaya ngi̱jii̱n kui xota̱ na̱xi̱ńdaá ko̱jo ngatamaya ji̱n, nga si̱ꞌingojo ji kjo̱a̱a̱ nga kiniꞌánkjiesón xota̱ mosòo̱.

¹¹ ¡Ngo kjo̱a̱nda, ndaꞌyé ji ni xi ni̱ma̱ ndyi̱tsó xota̱ xi síndoꞌniuú! Ta̱ngatꞌanii̱ xikó kjiꞌi ngaꞌniú xí tjiín, ꞌna̱xiéꞌé ji xota̱ xi je si̱ꞌankjiesoón.

¹² Ji Ne, ti̱ꞌin ji nga kui xota̱ na̱xi̱ńdá xí síndotꞌajne̱, yito ndi̱yà bo̱a̱ kjiꞌi ngatꞌíchjí, kjo̱a̱a̱ kui ni xi ndajín xi katsꞌénjoo̱ ji.

¹³ Kó bo̱a̱ tsꞌén ji̱n xi xota̱ na̱xi̱ńdáa̱, ko̱jo xi cho̱tsa̱nga̱ xi tse̱, ngatsjéni̱xtjin nga ji xi si̱ꞌantsjajne̱, ¡ngatsjéni̱xtjin nga ji xi ko̱ndájne̱ só!