Xo̱jo̱n Salmoo̱ 78 - Xo̱jo̱n eén Néná

Néná boá xi koo̱n ko̱jo xi fotsoꞌbátjoón xota̱ na̱xi̱ńdaá

Só xi katsꞌénda Asaa̱f.

¹ Jún xota̱ na̱xi̱ńdána, ndaꞌyájnú kjo̱a̱bokoyána, kó ti̱ꞌansénjnúu̱ én xí fotjoo̱ ndso̱ꞌba án.

² Énkjínkón boá xi kuichjiájojnúꞌun, kó xiyà cha̱n cha̱njnúꞌun ni xi tjiꞌmá xi kamá ni̱xtjin xcháján.

³ Ni xi je kandaꞌyá ñá, ko̱jo ni xi je kamákjínná, kui ni xi íni̱jmìná xota̱ xi xcháná.

⁴ Ka̱májín kꞌuiꞌmáa̱ ndíná kuí nii̱, chjiéngá kꞌuiyáa̱ xota̱ xi jaskan kꞌuieé xikótsꞌèn niꞌántsjáa̱ Néná, ko̱jo ngaꞌniú xí kisꞌiee̱, ko̱jo ni yiꞌi xi katsꞌén kuí.

⁵ Néná índa ngo ni kjo̱a̱a̱ xota̱ tji̱e̱e̱ Jakoo̱b, kó íjñá ngo kjo̱a̱kiti tsi̱ꞌe̱ xota̱ na̱xi̱ńdá Israee̱l, kó xota̱ xi xcháná atíxomaa̱, tsi̱ꞌe̱ nga kui kjo̱a̱kitii̱ xi sa̱ꞌínkjién nga sa̱ꞌínchji̱ni̱e̱ ndií,

⁶ tsi̱ꞌe̱ nga kui xota̱ xi jaskan kꞌuieé sku̱i̱e̱ kui nii̱ nga, kó ko̱jo kui ndí xi jaskan stse̱én, nga kui xotaa̱ xi ka̱tso̱yaa̱ ndií,

⁷ tsi̱ꞌe̱ nga ka̱ma sa̱ꞌinꞌniátakón Néná, kó nga xchi̱yàjiín ni yiꞌi xi katsꞌén Néná, ko̱jo nga ta̱sá ꞌniú sa̱ꞌínmején kjo̱a̱botíxomaa̱.

⁸ Kó nga bo̱a̱jín kón ka̱ma xikoó xota̱ xi xchaá, kui xi tji̱e̱e̱ xota̱ ndajín ko̱jo xi kitikjo̱a̱ kamá. Tji̱e̱e̱ xota̱ xi katsjájiín kon ini̱ma̱a̱, ti̱nde a̱si̱énni̱xtjii̱n kixi̱jín kamá nga kamáꞌniátakón Néná.

⁹ Xota̱ tji̱e̱e̱ Efraii̱n, kui já xí katsꞌénkjién yáchjonyaá, nga̱xto̱n kijíni ni̱xtjin nga kamá kjo̱a̱xcha̱án.

¹⁰ Katsꞌénkjatjosónjín ni xi índajo̱ Néná, ti̱nde kamámejénjiín ki̱a̱ kijítji̱ngi kjo̱a̱kitii̱.

¹¹ Katsꞌénchíyà ni xi katsꞌén Néná, ko̱jo ngayeje kjo̱a̱ndikón xí ja̱ bo̱a̱ je akoó.

¹² Ngindyi̱ko̱n xi xchaá katsꞌén ni xi fíndikónná, ki̱a̱ nangi Ejiptoo̱ ko̱jo kꞌijñaá Soaa̱n.

¹³ Néná jó tjín katsꞌén ndáchíkoón, kó katsꞌénkjaꞌa yise, ítikó ndáfoaa̱ nga xikoó tsi jó xó katsꞌén nga̱ndee̱.

¹⁴ Nga ni̱xtjii̱n, ngo ṉdi̱ katsꞌénkjié nga yejeén ndi̱yà, kó nga jñoó, ngo ndiꞌí katsꞌéntsijee̱n.

¹⁵ Ki̱a̱ nangi kixií jó tjín katsꞌén nga akján ndi̱jo̱jee̱, kó ndáfoa xi ndibání ndeskande nínga na̱nga̱a̱ tꞌanangii̱ katsꞌénkꞌi.

¹⁶ Ngi̱jin ndi̱jo̱ yiꞌii̱ katsꞌénkjatjoni xo̱ngàndántꞌié, kó katsꞌénkjatjajen ndáfoaa̱ xikoó ndejeèꞌ.

¹⁷ Ta̱nga kui xotaa̱ katsꞌénjé nginí kondraa̱ Néná, kó katsꞌénkitikjo̱a̱a̱ yojoo̱ Néná ki̱a̱ nangi kixií.

¹⁸ Katsꞌénkjó nga kamámejeén askotꞌayákón Néná, nga tsíꞌaá nichinie xikótsꞌèn kamámejeén.

¹⁹ Kó tsíchji̱a̱taꞌin Néná, nga bi̱ katsó: «A ka̱márií Néná ku̱i̱ꞌíjñá ngo yámíxa̱ kꞌi̱e̱ nangi kixií.

²⁰ Ja̱koxi̱ boá nga ngo ndi̱jo̱je yeꞌeé, kó jatjoo̱ ndáfoa xi ta̱nisién tsie, ta̱nga, a ka̱márií tsjáná pan ko̱jo tsi yojo, tsi̱ꞌe̱ nga skji̱ni̱e̱ xota̱ na̱xi̱ńdaá»

²¹ Kjiꞌanga Néná tsintꞌié ni xi katsó, achichí katsꞌénxchán, kó xikoó tsi ngo ndiꞌí ítsꞌi̱yanii̱ nga kití kondraa̱ xota̱ tji̱e̱e̱ Jakoo̱b, kó ngaskande xota̱ Israee̱l jachótꞌaa̱ kui kjo̱a̱xcha̱án Néná.

²² Ta̱ngatꞌanii̱ nga kisꞌijinjiín Néná, ti̱nde kamáꞌniátakónjín nga Néná ka̱maa̱ kꞌo̱xiéꞌá.

²³ Ta̱nga Néná katsjaá kjo̱a̱ ṉdi̱i̱ ndeskande nkꞌajmii̱, kó iskjíxꞌá nga̱ntjo̱a̱a̱ ndiꞌakꞌajmii̱,

²⁴ kó katsꞌénkixoó kui xotaa̱ nichinie xi ꞌmí mana̱, kó paa̱n ndiꞌakꞌajmii̱ katsjaá.

²⁵ Pan xi kjinie ndítsjiee̱ katsjaá xota̱ nga̱sondiee̱, kó tsie nichinie katsangiyaa̱, ngaskande nga nda stsi̱e̱é.

²⁶ Sꞌe̱ jaskan ndeskande nkꞌajmii̱ yítsiéni tjo̱ xtji̱e̱e̱n nínga fotjo tsꞌueé, kó ti yítsiéni tjo̱ xi ndibání xtji̱e̱e̱n na̱ngi nga katsꞌénkjién ngaꞌniuú.

²⁷ ¡Néná katsꞌén nga ixóni yojo nkꞌa jàn, xikoó tsi xa̱ xi ixó! ¡Achichí ni̱sie katsangiyaa̱, xikó maá tsomií ndáchíkoón!

²⁸ Kó ki̱a̱ katsꞌénkixó kui ni̱siee̱ ngamasiee̱n nínga síndo ndiꞌaa̱ xotaa̱, kó ixó nga ngo foaꞌatjiyajoo̱n ndiꞌaa̱.

²⁹ Kó xotaa̱ tsꞌajón maá nga iskjinie nichiniee̱, ngatꞌa̱ Néná katsꞌénkjatjosón ni xi kamámejeén.

³⁰ Ta̱nga nde kji̱e̱ tsꞌénkꞌíxiójín bojoó, ngatꞌa̱ to̱kó ndyi̱a̱ꞌa ngase tsꞌoa kui nichiniee̱,

³¹ nga kjindibánié kjo̱a̱xcha̱án Néná. Kó jesón jáxíꞌín xí ꞌniú ngasee̱. ¡Kó katsꞌénkasiéntikoó xota̱ Israee̱l xi je katjoꞌójii̱n!

³² Ta̱nga kui xotaa̱ to̱kó katsꞌénjérá ngase, katsꞌénsꞌijinjín ni xi fíndikónná xí katsꞌén Néná.

³³ Kuíni nga Néná ta̱ xikónií tsi yítsieé nga katsꞌénkjiesón, kó nó xi kisꞌińdo ngase kjo̱a̱ni̱ma̱ jaꞌatio.

³⁴ Kui xotaa̱ ta̱ kjiꞌa tsí nga tsangase Néná, kjiꞌanga nga Néná katsꞌénkjiesón xkjín, kósꞌe̱ katsꞌénkꞌoyá yojoo̱, sꞌe̱ ti̱ tsintꞌiéꞌén nginí,

³⁵ ta̱ kjiꞌa tsí bo̱a̱ nga jaꞌátsjiee̱n nga Néná boá xi Ndi̱jo̱jee̱, kui Néná xí tikón ndiꞌakꞌajmii̱, kui xi tsꞌaxiéꞌá.

³⁶ Achichí tsjatsó ni xi tsíchji̱a̱jo Néná nga katsꞌénkjién tsꞌoa, ta̱nga na̱je̱n katsꞌénkjién nga índisojo̱,

³⁷ ngatꞌa̱ ini̱ma̱a̱ jmí tsi kixi̱ kamá, ti̱nde jmí tsi kamáꞌniátakón nga katsꞌénkjatjosón ni xi índajo̱.

³⁸ Ta̱nga Néná, kui xi achichí kjo̱a̱ni̱ma̱takón tjiín, katsꞌénjetakoón ni xi ndajín xi katsꞌén, kó katsꞌénkjiéjín. Achichí kjín ndi̱yà nga íꞌniuú kjo̱a̱xcha̱án, kó jmíni̱xtjin nga kamáxtií,

³⁹ jaꞌátsjiee̱n Néná nga ta̱ xota̱ nga̱sondie tsí bo̱a̱, xikó maá tsi ngo tjo̱ xi fí, kó ngiti̱ ndibáꞌóyájín.

⁴⁰ Achichí kjín ndi̱yà nga katsꞌénxtií Néná ki̱a̱ nangi kixií, kó Néná achichí ndasen kamaá kui nii̱.

⁴¹ Kósꞌe̱ ti̱ askotꞌayákón nginí Néná, ¡kó katsꞌénxtií kui Néná xi tsjie, xi tsi̱ꞌe̱ na̱xi̱ńdá Israee̱l!

⁴² Nde jaꞌátsjienjiín ni̱xtjin nga Néná katsꞌénkjién ngaꞌniuú, nga tsꞌaxiéꞌá ngi̱ya tsja kondra̱a̱.

⁴³ Ko̱jo kjiꞌanga Néná íjñá chi̱bo̱a̱ ki̱a̱ nangi Ejiptoo̱, ko̱jo ni xi fíndikónná xí katsꞌén ki̱a̱ kꞌijñaá Soaa̱n,

⁴⁴ kjiꞌanga jín katsꞌén ndáfoaa̱ ndejeèꞌ, tsi̱ꞌe̱ nga ngiti̱ ka̱májín kꞌuí ndáfoaa̱.

⁴⁵ Ko̱jo kjiꞌanga katsangiyaa̱ chisien xi katsꞌénkjié, ko̱jo xkji̱e̱ xi katsjaá chiꞌin,

⁴⁶ ko̱jo kjiꞌanga katsjandieè stsaá ngayeje ni tjieé, ko̱jo kjiꞌanga chjo̱bo̱a̱a̱ katsꞌénkjié xá xí katsꞌén,

⁴⁷ ko̱jo kjiꞌanga katsꞌénkjatsón ngi̱ndie nínga ꞌbítji̱e̱ tostsi̱je̱è nga katsꞌénkixó ndókoá, kó nínga tjitjíe̱ toꞌingo̱, ndáfoa xi tjiín nchꞌàn índongándá,

⁴⁸ ko̱jo kjiꞌanga katsjandiè nga katsꞌénkjaꞌatꞌe ko̱jo nga ixó ndókoá, kó nga kui nii̱ xi katsꞌénkjié cho̱yojoo̱ ko̱jo cho̱tsa̱nga̱a̱,

⁴⁹ ko̱jo kjiꞌanga achichí katsꞌénxchán Néná, nga ta̱nisién ꞌniú atíjeé, kjo̱a̱xcha̱án, ko̱jo kjo̱a̱ndasen, ko̱jo kjo̱a̱nda̱ kisꞌiee̱ ko̱jo katsangiyaa̱ ngo xtín ndítsjie xi tsꞌenkjiéná,

⁵⁰ ko̱jo kjiꞌanga katsꞌén ni xi mejeén nga katsꞌénxchán, kó tsꞌaxiéꞌájín ini̱ma̱a̱ ngi̱ya tsja kjo̱a̱bo̱yaa̱, ¡ta̱sá ki̱a̱ katsꞌénkꞌasꞌien yojoo̱ tsi̱ꞌe̱ nga kju̱i̱e̱són!

⁵¹ Kó katsꞌénꞌoón tsi̱ꞌe̱ nga jesón ndí tjoón xota̱ Ejiptoo̱, kui ndí xí tjoón ngaꞌniú xí kisꞌiee̱ xota̱ ndiꞌaa̱ Kaa̱n.

⁵² Kó katsꞌénkjataxie xota̱ na̱xi̱ńdaá xikó maá cho̱tsa̱nga̱, kó ki̱a̱ kijíjo̱ nangi kixií, xikó má tsꞌén fítjoón cho̱o̱ nda̱ xi koo̱n cho̱tsa̱nga̱a̱,

⁵³ katsjandieè nga nda ko̱e̱je̱, tsi̱ꞌe̱ nga stsa̱kjonjín, tji̱e̱nga ndáchíkoón yíꞌmá kondra̱a̱ kui xotaa̱.

⁵⁴ Kó ki̱a̱ kijíjo̱ ngaskande tsindioó nangi tsjiee̱, kui na̱xi̱ xi katsꞌén nga katsꞌénkjién ngaꞌniuú tsja kixi̱.

⁵⁵ Xikótsꞌèn kijí xota̱ Israee̱l, Néná tsangatji̱ngii̱ xota̱ na̱xi̱ńdá xi kisꞌińdo ki̱a̱a̱, kó chi̱bo̱a̱ katsꞌénkjién nga katsꞌénkꞌasꞌiee̱n tꞌanangi xi tsoboaá xota̱ Israee̱l, kó xota̱ tji̱e̱e̱ Israee̱l ki̱a̱ índo ndiꞌańjñoo̱.

⁵⁶ Ta̱nga kui xotaa̱ askotꞌayákón ko̱jo katsꞌénxtií Néná, kó tsintꞌiéꞌénjiín kjo̱a̱botíxomaa̱,

⁵⁷ ta̱sá nga̱xto̱n kijíni xikó má katsꞌén xota̱ xi xchaá, nga kixi̱jín kamá, kó xikó maá yáchjonyá xi jmí tsi kixi̱ kamá.

⁵⁸ Katsꞌénxtií Néná kjo̱a̱a̱ ngi̱ndie xi ꞌniú nkꞌa xi katsꞌénda, kó katsꞌénchi̱ni̱ Néná kjo̱a̱a̱ kui a̱si̱én xí yá kamándani xi ne katsoó,

⁵⁹ kó nga tsintꞌié kuí nii̱ Néná, achichí ndasen kamaá, kósꞌe̱ achichí ꞌniú kamáchꞌoó xota̱ Israee̱l.

⁶⁰ Kuíni nga Néná íjñámasien ndiꞌandikón xí kisꞌijña ki̱a̱ na̱xi̱ńdáꞌniú Siloo̱, kui ndiꞌa nínga kisꞌijña nga kisꞌijña ngi̱jii̱n xotaa̱,

⁶¹ ¡kó katsjandiè nga koxa̱a̱ kjo̱a̱ꞌbíndaa̱, kui xi akó kjo̱a̱jee̱ Néná, ngi̱ya tsja xota̱ kondra̱a̱ kisꞌijña!

⁶² Kó ti̱ katsꞌénkꞌasꞌien xota̱ na̱xi̱ńdaá tsi̱ꞌe̱ nga ki̱cha̱ndojó kiniꞌánkjiesónni, katsꞌénxchán kjo̱a̱a̱ kui xota̱ xi je kui tsi̱ꞌe̱.

⁶³ Ndiꞌí katsꞌénkjiéni já xo̱ngo̱ò, kó ínchjín xo̱ngò xí ku̱i̱xaa̱n, je kjo̱a̱bixaa̱n,

⁶⁴ kó chináꞌmii̱ ki̱cha̱ndojó kiniꞌánkjiesónni, kó ínchjín kꞌaán askjandánsénjín.

⁶⁵ Ta̱nga Néná jaꞌaá, xikó maá ngo nda̱ chꞌokon xi foaꞌaá nga kisꞌifé ta̱ngatꞌanii̱ nga bino̱ katsꞌe,

⁶⁶ kó ki̱cha̱ndojó katsꞌénꞌónnii̱ kondra̱a̱, ¡kó ngatsjéni̱xtjin nga katsjaá kjo̱a̱soboá!

⁶⁷ Katsꞌénchꞌó xota̱ ndiꞌaa̱ Kosiee̱, kó jmí tsi xota̱ tji̱e̱e̱ Efraii̱n xi jaꞌájin,

⁶⁸ ta̱sá xota̱ tji̱e̱e̱ Jundáa̱ xi jaꞌájin, ko̱jo na̱xi̱ xi tikón ki̱a̱ na̱xi̱ńdáꞌniú Sioo̱n kui xi achichí tjó kamaá.

⁶⁹ Ki̱a̱ nínga nkꞌaa̱ na̱xi̱ Sioo̱n ki̱a̱ katsꞌénda na̱ngo̱xi̱i̱, xikó maá kui tꞌanangi xi ngatsjéni̱xtjin nga ꞌniú íjñá.

⁷⁰ Néná jaꞌájin Ndabii̱, kui xi mosoo̱ kamá, kó ki̱a̱ tsꞌaxiéni ngi̱jin na̱xi̱ nínga kistsoꞌbájo̱ cho̱tsa̱nga̱a̱,

⁷¹ kó jaꞌáxín nga ngiti̱ jmí cho̱tsa̱nga̱ askonjiín, tsi̱ꞌe̱ nga ta̱sá xota̱ na̱xi̱ńdá Israee̱l xi askoo̱n, kui xi xota̱ na̱xi̱ńdaá Néná.

⁷² Kó Ndabii̱ kuí boá xi askoo̱n xota̱ na̱xi̱ńdaá xikó kjiꞌi nda ini̱ma̱a̱, kó kuí boá xi akoó ndi̱yà, xikó tsꞌén maa̱ niꞌánxá.