Xo̱jo̱n Salmoo̱ 77 - Xo̱jo̱n eén Néná

Ni xi fíndikónná xi tsꞌén Néná

Só xi katsꞌénda Asaa̱f.

¹ Nda̱na katsꞌénkjién án nga tsíchji̱a̱a̱ Néná, Néná tsíchji̱a̱a̱, kó Kuí tsintꞌiéna.

² Kjiꞌanga tsie kjo̱a̱ni̱ma̱ jaꞌatio an, tsangase an Ndi̱a̱ná, kó Kuí iskjininkꞌa ndsa̱ án, nga ni̱xtji̱e̱e̱n, kó nde katsꞌénkjaꞌyájín, ndatsi ini̱ma̱na tsangase kjo̱a̱niꞌándajoo̱n.

³ Kjiꞌanga foaꞌátsjienna Néná, achichí ni xi maa̱ ini̱ma̱na, kjandá an, kó ꞌmeya má an.

⁴ ¡Jí boá xi mindyieńjñínní! ¡Nde bejín an ni xi sa̱ꞌin an, kó nde bejín an kó xián án!

⁵ Jè katsꞌenkjó án ni̱xtjin xi kisꞌie ndeskande koó ngasꞌe̱, ko̱jo nó xí je jaꞌaa̱.

⁶ Foaꞌátsjienna só xi kisie an nga jñoó, tsꞌenkjó án ngi̱jin ini̱ma̱na kó a̱si̱én ni̱xtjinna bosíyá kui nii̱:

⁷ «A ngatsjéni̱xtjin tjítsꞌénchꞌóná Néná tsobo̱a̱, kó a jè ngiti̱ tjójiín ñá.

⁸ A je jè yeje kjo̱a̱ni̱ma̱takoón, a je kichajá kjin ni xi katsóya tjón nga sa̱ꞌín.

⁹ A kichíyárií Néná nga kꞌuieé kjo̱a̱ni̱ma̱takón tsobo̱a̱, a kjo̱a̱tamaá boá xi asíkjo kjo̱a̱ni̱ma̱takoón tsobo̱a̱.»

¹⁰ Kósꞌe̱ ti̱ aa̱n bi̱ xian an: «¡Ndajínra̱ kjiꞌina, kótsꞌèn bo̱a̱ tsꞌén tsꞌenkjó án, nga Néná jè asíkjo ngaꞌniú xí tjiín!

¹¹ ¡Jaꞌátsjienna ni xi je katsꞌén Néná, jo̱o̱n, jaꞌátsjienna ni xi fíndikónná xí katsꞌén ngasꞌe̱!

¹² Sa̱ꞌinkjó án kjo̱a̱a̱ ngayeje ni xi je kiniꞌín ji, Sa̱ꞌinkjó án kjo̱a̱a̱ ngayeje ni xi fíndikónná xí je kiniꞌín ji!

¹³ »Ji Ne, ¡Tsjie boá ndi̱yàa̱! ¡ꞌYá ne xi bo̱a̱ tsꞌén tjiín kjo̱a̱je xikoó Néná!

¹⁴ Jí boá kui Ne xi tsꞌén kjo̱a̱ndikoón, Jí boá akake ji ngaꞌniúu̱ ngi̱jii̱n xota̱ na̱xi̱ńdaá.

¹⁵ Ngaꞌniúu̱ boá xi kiniꞌínkjìn jí kjiꞌanga kaꞌnaxiéꞌé ji xota̱ tji̱e̱e̱ Jakoo̱b ko̱jo xota̱ tji̱e̱e̱ Kosiee̱.

¹⁶ »Kamábee̱ ndáfoaa̱ ji Ne, nga kamábee̱ ndáfoa katsakjónní, ¡ngaskande kui ndáfoa xi ꞌniú na̱nga̱a̱, achichí ꞌniú janingí!

¹⁷ Ṉdi̱i̱ achichí ndáfoa iskjitjón, kó nkꞌa jàn kandaꞌyá nga janie cho̱ꞌo̱o̱n, kó yáyojóo̱ kijí kꞌi̱e̱ kijí jàn nga jatjo.

¹⁸ Nda̱a̱ cho̱ꞌo̱o̱n ki̱a̱ kisꞌijña ngi̱jii̱n tjo̱ꞌniuú, kó ndiꞌií nga foaꞌatꞌèe̱ katsꞌéntsijen nga̱sondiee̱, nga janie, kjiꞌá boá nga jaꞌa ngo kjo̱a̱ndi̱ko̱n tꞌanangii̱.

¹⁹ Ngo ndi̱yà nínga ikitja kiniꞌínde ji ki̱a̱ ndáchíkoón kó kachjéxꞌé jí ngo ndi̱yà ngi̱jii̱n ndáfoaa̱ xi ꞌniuú, ta̱nga nde ngojín xi kamábe chi̱bo̱a̱ ndsa̱ki ji.

²⁰ Xikó má tsꞌén fotsoꞌbátjoón cho̱tsa̱nga̱a̱ nda̱ xi kondaa̱, bo̱a̱ má kiniꞌínje̱ ji xota̱ na̱xi̱ńdáa̱, nga Moisee̱ ko̱jo Aaroo̱n kiniꞌínkjìn jí, tsi̱ꞌe̱ nga kisꞌiṉtso̱matjoón xota̱ na̱xi̱ńdáa̱».