Xo̱jo̱n Salmoo̱ 76 - Xo̱jo̱n eén Néná

Néná boá xi tsꞌén

Só xi katsꞌénda Asaa̱f.

¹ Néná ya ki̱a̱ nangi Jundáa̱, kó ki̱a̱ na̱xi̱ńdá Israee̱l ꞌniú yandikón jaꞌeén.

² Ki̱a̱ na̱xi̱ńdáꞌniú Jerusalee̱n tikón na̱ngo̱xi̱i̱, kó ki̱a̱ na̱xi̱ńdáꞌniú Sioo̱n tikón ngi̱ndiee̱.

³ Ki̱a̱ boá nínga Néná tsꞌénxi̱ yáyojoó, ko̱jo ni xi ꞌbíchjaá ni xi ndajiín, ko̱jo ki̱cha̱ndojoó, ko̱jo ngayeje ni xi niꞌánkjién nga má kjo̱a̱xchán.

⁴ Ji Ne, jí boá xi tjiín kjo̱a̱je ko̱jo ngaꞌniú, ¡ta̱bo̱a̱jiín na̱xi̱ xi tjíndo ngatsjéni̱xtjii̱n.

⁵ Já chꞌokon xi fí kjo̱a̱xcha̱án kachjeꞌéxiín ngaꞌniú xí kisꞌiee̱, kó kisꞌiyojofé. Ngiti̱ ingojín já xí ꞌniuú, xi kamaá katsꞌénkjién ngase tsja.

⁶ ¡Kjiꞌanga niꞌínxchín jí Ne xi tsi̱ꞌe̱ Jakoo̱b, karro̱ kjo̱a̱xcha̱án ko̱jo ndi̱je̱e̱ ki̱a̱ kisꞌiyojo nga kisꞌiyojofé!

⁷ ¡Ta̱ jí tsí xi ma ndakoo̱n! Kjiꞌanga ꞌniú si̱ꞌinxchín jí, ꞌyá xí kjo̱chíkjo̱a̱a̱ nga ji ku̱i̱ꞌítꞌaa̱.

⁸ Ndeskande nkꞌajmii̱ kandaꞌyáni kjo̱a̱botíjée̱, kó tꞌanangii̱ kitsjiendikón, sꞌe̱ kisꞌie xió xió.

⁹ Kjiꞌanga Ji kixi̱ tsꞌén kiniꞌínsée̱n xotaa̱, tsi̱ꞌe̱ nga kaꞌnaxiéꞌé ji ngayeje xota̱ xi ntꞌiéꞌén xí tjín tꞌanangii̱.

¹⁰ Jí boá xi tsꞌéntsjaà kjo̱a̱xcha̱án xota̱ nga̱sondiee̱, kó xikoó tsi ngo tji̱xinꞌbíkjá niꞌín ji kjo̱a̱xchán xí jmí ni chjíjiín xi ꞌbongii̱ xotaa̱.

¹¹ Si̱ꞌankjatjosóo̱n Néná ngayeje ni xi kiꞌmíyatjóo̱n nga si̱ꞌán, ngayeje jún xota̱ na̱xi̱ńdá xi tindyiontꞌájnú, ndibájo̱jnúu̱ kjo̱a̱tjó kui Néná xi fíndikónná.

¹² Kuí boá xi ni̱ma̱kjo̱a̱ tsꞌénkꞌíndo a̱si̱én ni̱xtjii̱n xota̱xá xí botixómaá, kó kuí boá xi tsꞌén nga fotsiéndíkón má ngayeje re xi tjín nga̱sondiee̱.