Xo̱jo̱n Salmoo̱ 75 - Xo̱jo̱n eén Néná

Kixi̱ tsꞌén tsꞌensénná Néná

Só xi katsꞌénda Asaa̱f.

¹ ¡Ndokꞌóchji̱ì ndyi̱boeꞌéjne̱ ji Ne, ndokꞌóchji̱ì ndyi̱boeꞌéjne̱! Ngatꞌa̱ achichí tiña tikónjne̱ jaꞌée̱n. Xotaa̱ ndyi̱chji̱a̱ kjo̱a̱a̱ ni xi fíndikoón xi kiniꞌín ji.

² Jí boá xi bi̱ kase ji: «Ni̱xtjin xi an koko an, Án má bo̱a̱ xi kixi̱ kotijé án.

³ Kjiꞌanga kjo̱tsiè tꞌanangii̱ ko̱jo xota̱a̱, kó ngije mejeén ku̱i̱xo̱, Án boá xi koꞌniú án nínga tikónsón.

⁴ Bi̱ xiáa̱n xota̱ xi nkꞌakoo̱n: Ngata̱ jejín ꞌnaxiéjnú yojojnú, kó bi̱ xiáa̱n xota̱ xi ndajiín: Ngata̱ nkꞌajín ꞌnaxiéjnú yojojnú,

⁵ nga nkꞌakonjín maá yojoo̱ kjo̱a̱a̱ ngaꞌniú xí tjiín, ti̱nde nga ꞌniújín ndikón ngase maa̱ yojoo̱ nga ku̱i̱chji̱a̱».

⁶ Ngatꞌa̱ kjo̱a̱yandikoón, jmí tsi ki̱a̱ ndibání xtji̱e̱e̱n nínga fotjo tsꞌueé, ko̱jo tsi nínga ꞌbosꞌien, ti̱nde ki̱a̱jín ndibánií nínga nangi kixií.

⁷ Néná boá kui xi nendiꞌamasiee̱n, kó kuí boá xi ni̱ma̱kjo̱a̱ ꞌbijñá kui xi nkꞌakon maa̱ yojoo̱.

⁸ Ngi̱ya tsja Néná je tikón ngo chi̱tsen, kó bino̱ xi ndyi̱a̱ xi je tsꞌájii̱n, je kjima xán. Kó kjiꞌanga skjitjón, ngayeje xota̱ xi ꞌniú ndajín xi tjín tꞌanangii̱ kꞌuí ngaskande nga ngiti̱ ingojín tín ku̱i̱ꞌíjñá ngase.

⁹ Ta̱nga an, ngatsjéni̱xtjin kuichjiá an kjo̱a̱a̱ kui, kó sièe̱ salmo̱ Nee̱ Jakoo̱b.

¹⁰ Bi̱ tsó Néná: Sa̱ꞌínkjié an ngaꞌniuú ngayeje xota̱ xi ꞌniú ndajiín, ta̱nga tsie ngase ngaꞌniú tsja̱á xota̱ xi kixi̱i̱.