Xo̱jo̱n Salmoo̱ 73 - Xo̱jo̱n eén Néná

¡Achichí ndaxota̱ Néná!

Só xi katsꞌénda Asaa̱f.

¹ Nga ja̱koxi̱ Néná, achichí ndaxota̱ tsꞌénjo̱ xota̱ Israee̱l, kui xota̱ xi tsjie síndo ini̱ma̱a̱.

² Kjo̱a̱a̱ an ki, jè mején katsꞌenjé án katsaki, jè ta̱ ngi̱chií tsí kichajána nga ko̱ngajon an katsaki,

³ ngatꞌa̱ kamáꞌonkon an kjo̱a̱a̱ xota̱ xi nkꞌa ꞌboxié yojoo̱, kjiꞌanga kamábe an nga tjitjóninkꞌaa̱ yojoo̱ xota̱ xi ꞌniú ndajiín.

⁴ ¡Ngatꞌa̱ jmíjiín xi so xi ndakjan kjiꞌanga je fesón, kó achichí nda yojoo̱ nga tjingáꞌniuú!

⁵ Jmíjiín kjo̱a̱xti xikoó xi tjiín kje̱ꞌe xota̱, ti̱nde jmí kjo̱a̱ni̱ma̱ ndyi̱foaꞌatiojín xikoó xota̱ xi ngasee̱.

⁶ Ngatꞌa̱ kjo̱a̱nkꞌakoo̱n boá xi xikoó tsi kui xi ixkìꞌ kjimaa̱, kó ni xi ndajiín, kuí boá xi xikoó tsi kui xi ńjñobichitjé kjimaa̱.

⁷ ¡Kjifotjoꞌmé má ndyi̱ko̱n nga yiꞌi kui xotaa̱! ¡Kó tsꞌénkjátjosón ni xi ndajín xi maxkè ini̱ma̱a̱!

⁸ Mojnókie xotaa̱ kó chꞌo tsó nga chji̱a̱, achichí nkꞌakon má nga ꞌbínda nga ndajín sa̱ꞌín.

⁹ Tsꞌoa tsꞌénkjién nga chꞌo tsoó nkꞌajmii̱, kó na̱je̱n tsꞌénkjién nga chji̱a̱taꞌin xota̱ nga̱sondiee̱.

¹⁰ ¡Kuíni nga xota̱ na̱xi̱ńdána kui ndyi̱fíkoón, kó ꞌniú kjíbé eén xikoó tsi ndáfoa xi ndyi̱ꞌbi!

¹¹ Kó bi̱ tsó nga chji̱a̱: Kótsꞌèn beni Néná. A tjínrií kjo̱a̱kjíntakón Néná.

¹² ¡Bo̱a̱ kón má xota̱ xi ꞌniú ndajiín! ¡Nde ta̱jmìjín ni xi nda̱ maa̱, kó saꞌniú sáꞌniú ma cho̱n ngase!

¹³ Kósꞌe̱, a ta̱kjo̱a̱ndaní nga katsꞌentsjie an ini̱ma̱na, ko̱jo a ta̱kjo̱a̱ndaní nga aniejón an ndsa̱ án, nga jmí jéjínna.

¹⁴ ¡Ngatꞌa̱ nga ngo ni̱xtjii̱n nga tjíꞌbéna! ¡Kó ndyiojón ndyiojón tjíniꞌánjéna!

¹⁵ Tsi bi̱ xián án: Bo̱a̱ tsꞌén kuichjiá an xikoó kui xotaa̱, kꞌuindisojo̱ra an xota̱ tji̱e̱e̱ ndíi̱ tsobo̱a̱.

¹⁶ Katsꞌenkjó án tsi̱ꞌe̱ nga ka̱makjínna kui nii̱ katsaki, ta̱nga achichí niꞌín kamána.

¹⁷ Ngaskande nga kijí an ki̱a̱ ndiꞌandikoón Néná, kó ki̱a̱ boá nínga kamákjínna ni xi maa̱ nga fetꞌani, kui xota̱ xi ꞌniú ndajiín.

¹⁸ Nga ja̱koxi̱, jí boá xi ki̱a̱ ikꞌínde ji nínga ko̱ngajon, kó ko̱e̱ꞌéndiè ji nga ku̱i̱xo̱ tsi̱ꞌe̱ nga kju̱i̱e̱.

¹⁹ ¡Ta̱niján má kjindibá nga kiniꞌánkjié! ¡Kótsꞌèn nga ndikoón boá xi katsꞌénkjié!

²⁰ Xikó má má nga foaꞌáná, bo̱a̱ má tsꞌén kjiꞌanga kjo̱a̱ꞌaá ji Ne, chꞌo ka̱maa̱ xikó kón kui xotaa̱.

²¹ Kjiꞌanga kamáxtií ini̱ma̱na, kó nga kamákjinie chjo̱ondáyána,

²² Achichí kitikjo̱a̱ ko̱jo chi̱ni kamá an, ¡xikó maá tsi ngo cho̱ tamá kamá an ngindyikin ji!

²³ Kó ndatsi ngayeje kui nii̱ je kamána, ngatsjéni̱xtjin nga ji tikónjoo̱, jí boá xi chjábéngí ji ndsa̱ kixi̱ an.

²⁴ Jí boá xi ko̱e̱ꞌéní kjo̱a̱botíxomàa̱, kó nga kjo̱chó ni̱xtjin jí boá xi chjábéní nínga tikón kjo̱a̱jèe̱.

²⁵ ¡ꞌYá xí tikónna ki̱a̱ nkꞌajmii̱, ja̱ ta̱ jí tsí! Kó tsi ki̱a̱ tikóntꞌaa̱ ji, jmí nii̱ kui nga̱sondiee̱ mejénjínna.

²⁶ Yojona ko̱jo ini̱ma̱na je kjife, ta̱nga jí boá xi ndi̱jo̱jee̱ ini̱ma̱na, jí boá xi ngatsjéni̱xtjin nga ku̱i̱ndyinje̱ní.

²⁷ Ngatꞌa̱ kju̱i̱e̱ boá kui xota̱ xi sa̱ꞌínkjii̱n yojoo̱, jí boá xi si̱ꞌinkjie ji ngayeje xi kje̱ꞌe ne ko̱e̱je̱tji̱ngi, kó ku̱i̱ꞌíjñámasiee̱n ji.

²⁸ Kó án sa̱ꞌintiñaa yojona, ngatꞌa̱ kuí boá kui nii̱ xi ꞌniú tsjá má ngasena. Néna kui xi ndi̱a̱na, kuí boá xi tsꞌénkónna, tsi̱ꞌe̱ nga xiyà an ngayeje ni xi je katsꞌén!