Xo̱jo̱n Salmoo̱ 7 - Xo̱jo̱n eén Néná

Nga chjiáꞌaá Néná nga kixi̱ sa̱ꞌínsénná

Kjo̱a̱ndasen xi katsóyaà Ndabii̱ Néná kjo̱a̱a̱ ni xi katsꞌénjo̱ Kuu̱, ngo nda̱ xi chji̱a̱ni xota̱ tji̱e̱e̱ Benjaa̱.

¹ Ji Ne xi tsa̱ꞌa̱n, jí boá xi kjimaꞌniákoo̱n, ꞌNa̱xiéꞌéní, kó ti̱ꞌindéní kjo̱a̱a̱ ngayeje kui xota̱ xi ndyi̱mongatji̱ngina,

² ngatꞌa̱ tsájmi̱, sa̱ꞌínkꞌiénna, kó sa̱ꞌínxi̱na xikó tsꞌén xandi̱je̱e̱, kó ngiti̱ jmíjín xi ka̱maa̱ kꞌo̱xiéꞌána.

³ Ji Ne xi tsa̱ꞌa̱n, mí ni xi ndajín xi je katsꞌen an. Mí ni xi ndajín xi je katsꞌén ndsa̱ án.

⁴ A ndajín tsꞌén ichjíi̱ xota̱ xi xió tsaꞌana. Ta̱sá je katsꞌendé án kui kondra̱ xi jmí kjo̱a̱jín nga ndajín tsaꞌana.

⁵ Ja̱ tsi bo̱a̱ kjiꞌi ni xi katsꞌen an, te̱ꞌéndiè ji nga kondra̱na ngatangatji̱ngina, kó ngatjachótjingína, te̱ꞌéndièe̱ nga kjo̱a̱yandikónna ngaskande ngindie jàn ngatꞌíjñá tsobo̱a̱.

⁶ Ji Ne, ti̱sítji̱n ji, kó tiniꞌínxchín jí nga ku̱i̱xkén ji kjo̱a̱a̱ kjo̱a̱tamaá kondra̱na, kó kjo̱a̱ndana tꞌen ji nga ka̱ma kui kjo̱a̱niꞌánjé xí kanangiye ji,

⁷ ¡ki̱a̱ ngatꞌíndotꞌaa̱ ngayeje na̱xi̱ńdaá, kó jí tatíxome ji, ndeskande ki̱a̱ ndiꞌakꞌajmii̱!

⁸ Ji Ne, ji xi kixi̱ tsꞌén niꞌínsée̱n xota̱ na̱xi̱ńdaá: ¡ndókjo̱e̱ ji tsi nda ko̱jo tsi ndajín katsꞌen an, kó te̱ꞌéjéní, ta̱nga chꞌi̱e̱xki̱ ji nga kixi̱ án, ko̱jo nga jmí jéjínna!

⁹ Ngatjie ngotꞌe̱ ꞌne̱ ni xi ndajín xi tsꞌén xota̱ xi ndajiín, kó xota̱ xi kixi̱i̱, ꞌniú ngasꞌijña, ngatꞌa̱ kui Ne xi kixi̱i̱, kuí boá xi kotꞌa ini̱ma̱a̱ ko̱jo kjo̱a̱niꞌánkjoó.

¹⁰ Néná boá xi konna xikoó ngo ni xi ꞌbíchjaá ni xi ndajín, kó kuí boá xi ꞌboxiéꞌá xi kixi̱ síndo ini̱ma̱a̱.

¹¹ Néná kuí boá ngo Ne xi kixi̱, ngo Ne xi ndyiojón ndyiojón tsꞌénjeé xota̱ xi ndajiín.

¹² Tsi sa̱ꞌínkꞌoyàjín yojoo̱ kui xotaa̱, Néná sa̱ꞌínyojó ki̱cha̱ndojoó, kó ku̱i̱ꞌíjñanda yáchjonyáa̱, tsi̱ꞌe̱ nga skji̱ní yáyojoó.

¹³ Jè tikónndaa̱ ni xi tsꞌenkꞌiénná xi tsꞌénkjién, ¡kó ti̱ je tikónndaa̱ yáyojoó xi tjítokóni ndiꞌií!

¹⁴ Tsitsíjenjnúu̱ nga xota̱ xi ꞌniú ndajiín, xikoó tsi ndí kiniꞌánkaꞌa, sꞌe̱ kui ni xi ndajiín, kuí boá xi ndí kamá ngi̱ya nga̱ntso̱a̱, kó kjo̱a̱ndisoo̱ boá xi tsijeén.

¹⁵ Ngo ti̱xa̱ xi ꞌniú na̱nga̱ katsꞌénda, ¡ta̱nga ti̱kuíní xi kꞌo̱kayà kui ti̱xa̱a̱!

¹⁶ Ni xi ndajín xi tsꞌén, ti̱kuíní xi ndajín sa̱ꞌiín, kó kjo̱a̱tamaá, ti̱kuíní to̱ko̱ xi kꞌo̱kanieé.

¹⁷ Ta̱nga an ki, sa̱ꞌintsjáa̱ Néná, ta̱ngatꞌanii̱ kjo̱a̱kixi̱i̱. ¡Kó sièe̱ só jaꞌeén kui Néná xí tikón ndiꞌakꞌajmii̱!