Xo̱jo̱n Salmoo̱ 69 - Xo̱jo̱n eén Néná

¡ꞌNa̱xiéꞌéní jí Ne!

Só xi katsꞌénda Ndabii̱.

¹ ¡ꞌNa̱xiéꞌéní ji Ne, ngatꞌa̱ ndáfoaa̱ jè ngaskande kjásén án tji̱e̱n!

² ¡Jè tjínijínꞌniú án nínga na̱nga̱a̱ ndásee̱, kó sakójínna ngo ngi̱ndie xi tajá nínga kosien an ndsa̱ko án! ¡Jè ngi̱jii̱n ndáfoa xi ꞌniú na̱nga̱a̱ tikónjin an, kó ngaꞌniuú ndáfoaa̱ je tsꞌénfítjiboajo̱na!

³ Jè jenda an nga tsꞌénmíꞌá an nga tjín xí ko̱síko̱jona, jè tsiejénꞌón nga kixíjén na̱xo̱na. Jè tjísichjá má ndyikón án nga tsꞌénkoyàa̱ Néna.

⁴ ¡Kjín ngase ma xi nde jmí kjo̱a̱jín nga chꞌoo̱ an, ta̱bo̱a̱jiín tsja̱ xi tjiín tokó án! Achichí ngaꞌniú xí tjiín xota̱ xi mejeén sa̱ꞌínkꞌiénna, kondra̱na je kamá, kó nde jmí kjo̱a̱jiín, kó ngotꞌe̱ ꞌne̱ chjiéngá án kꞌuichjí án kjo̱a̱a̱ ni xi ánjín katsꞌenchejé án.

⁵ Ji Ne, jí boá xi ye ji kjo̱a̱chi̱nina. ¡Kó jmí tsi tjiꞌmaá jé xí katsꞌen an!

⁶ ¡Ngata̱ boeꞌéndièjín ji, nga ta̱ngatꞌanii̱ an kjo̱a̱soboá kjo̱a̱ꞌa kui xota̱ xi ji ndyi̱koyaa̱! ¡Ji Ne xi tsi̱ꞌe̱ ngayeje jájuún! ¡Ngata̱ boeꞌéndièjín ji, nga ta̱ngatꞌanii̱ an ka̱matsobéjii̱n kui xota̱ xi ji ndyi̱mongasee̱, ji Ne xi tsi̱ꞌe̱ xota̱ Israee̱l!

⁷ Ngatꞌa̱ ta̱ngatꞌanií ji nga chꞌo tjíꞌmína, ¡kó nde bejín an ñá kuijen an kje̱n án, ta̱ngatꞌanii̱ kui kjo̱a̱soboaá!

⁸ ¡Ngaskande ti̱ kuii̱ ntsꞌié án, xikoó tsi kje̱ꞌe xota̱ kjimaa̱ an! Kó xota̱ xi xín nangi kjimaa̱ an ndií na̱anna.

⁹ Ngatꞌa̱ kjo̱a̱chi̱ni̱i̱ ndiꞌàa̱ tjítsꞌénkjié ngaꞌniúna, kó an tsꞌákaniéna ni chꞌo tsó xi tjíꞌmií ji.

¹⁰ Askjandá an nga ndasen katsꞌenkjaꞌa an kjindiá yojona, kó ta̱ngatꞌanii̱ kui nii̱ nga chꞌo kiꞌmína.

¹¹ Ti̱ tsajá an ńjño xa̱ꞌya̱ nga, kó ta̱ngongá án ndyi̱mojnókiena ngotꞌe̱ ꞌne̱.

¹² ¡Xota̱ xi ki̱a̱ ꞌbíndo nga̱ntjo̱a̱a̱ na̱xi̱ńdaá an ndyi̱chji̱a̱taꞌinna, kó ngaskande xota̱ xi chꞌi̱i̱ tsꞌéndataꞌinna énkjàn!

¹³ Ta̱nga jí boá xi chjiáa̱ ji Ne, kuí má ni̱xtjin xi nda ngase maa̱ ji. Ji Ne, ta̱ngatꞌanii̱ kjo̱a̱ni̱ma̱takón tsie xi tjiín, ti̱ꞌinsénní ngatꞌa̱ kixi̱ boá kjo̱a̱ꞌnaxiéꞌáa̱.

¹⁴ ¡ꞌNa̱xiéjinní ngi̱jii̱n ndásee̱, kó ngata̱ boeꞌéndièjín ji nga ki̱a̱ ko̱e̱je̱ngindió kjin an! ¡ꞌNa̱xiéꞌéní ngi̱ya tsja xota̱ xi chꞌoo̱ an, ko̱jo ꞌna̱xiéꞌéní ki̱a̱ nínga na̱nga̱a̱ ndáfoaa̱!

¹⁵ ¡Ngata̱ boeꞌéndièjín ji nga ngaꞌniuú ndáfoaa̱ ko̱e̱je̱tjiboajo̱na! Ti̱nde nga ki̱a̱jín kꞌo̱kayà an ti̱xa̱na̱nga̱a̱, ko̱jo tsi kui ti̱xa̱a̱ xtje̱jenna.

¹⁶ ¡Ti̱ꞌinsénní ji Ne, ngatꞌa̱ achichí nga nda kjo̱a̱ni̱ma̱takóo̱n, ndibékasíke̱jení ta̱ngatꞌanii̱ kui kjo̱a̱ni̱ma̱takón tsie xi tjiín!

¹⁷ Ngata̱ ꞌbíjñiꞌmíjíi̱n kje̱n ji kui mosoo̱, ngatꞌa̱ achichí nda̱ kjimana, ¡tsá yé chií ji, kó ti̱ꞌinsénní!

¹⁸ ¡Ti̱ꞌintiñíní yojòo̱, kó ꞌna̱xiéꞌéní, ꞌna̱xiéꞌéní ngi̱ya tsja kondra̱na!

¹⁹ Jí boá xi ye ji kjo̱a̱ni̱ma̱na, ko̱jo ni xi tsꞌéntsobéjinna, ko̱jo kjo̱a̱soboána. Ngindyikin ji boá nínga tjíndo ngayeje kondra̱na.

²⁰ Kjo̱a̱mojnóchaá je katsꞌénꞌoón ini̱ma̱na, achichí ndasen je tikón an, Askoyáa̱ nga tjín xí ni̱ma̱ ka̱maa̱ an, ta̱nga jmíjín xi bo̱a̱ katsꞌén, askoyáa̱ nga tjín xí sa̱ꞌíndajonna, ta̱nga jmíjín xi jachó,

²¹ ni xi tjiín sa ikindyiaa̱ ni chiniena, kó kjiꞌanga kamáxíndána, bino̱ san katseꞌéna.

²² ¡Ni chinie xi síndosón yámíxa̱a̱, ko̱jo ni xi nda maá kui, xi chja̱ya̱a̱ ngatama!

²³ ¡Ngatama xa̱ ndyi̱ko̱n, tsi̱ꞌe̱ nga kꞌuíndo ti̱ka̱! ¡Kó ti̱ꞌin ji nga ngiti̱ jmí ngaꞌniú ꞌbéjiín!

²⁴ ¡ꞌNiú ti̱ꞌinxchínje̱ ji kui! ¡Ngatjachótjíngií kjo̱a̱xcháa̱n!

²⁵ ¡Ngasꞌietiya ndo̱bo̱a̱xa̱á! ¡Kó ingojín xi ki̱a̱ ꞌbíndoyá ngase ndiꞌaa̱!

²⁶ Ngatꞌa̱ ndyi̱mongatji̱ngii̱ kui xi ji kiniꞌínꞌíi̱n, kó ndyi̱chji̱a̱ kjo̱a̱a̱ kui xi ji kiniꞌínkijenꞌin ji.

²⁷ ¡Tꞌíjñisén ngasée̱ ni xi ndajín, kui ni xi ndajín xi ndyi̱tsꞌèn, kó ngatꞌa̱ boeꞌéndièjíi̱n nga ki̱a̱ kꞌuíndo ngi̱jii̱n xota̱ kixi̱i̱!

²⁸ ¡Ti̱ꞌinkjie ji jaꞌeén ki̱a̱ xo̱jo̱o̱n kjo̱a̱mindyioo̱n! ¡Kó ngata̱ ki̱a̱jín nijan ꞌbítꞌe ji jaꞌeén ko̱jo xota̱ xi kixi̱i̱!

²⁹ Ta̱nga an ki, ji Ne, an xi ndasen tikón an ko̱jo an xi onna, nkꞌa ngatꞌíjñána kjo̱a̱ꞌnaxiéꞌáa̱.

³⁰ Án boá xi sa̱ꞌintsjáa̱ jaꞌée̱n nga sie an, ¡kó achichí nkꞌa kꞌuijñá an nga tsjaa̱ ndokꞌóchji̱ì!

³¹ Kó tsja ngase ka̱maa̱ Néná kuí nii̱, ta̱bo̱a̱jiín kjo̱a̱tjó xi niꞌánkꞌasꞌiee̱n nga niꞌánkꞌieén cho̱yojo xi̱ꞌin, ko̱jo tsi ndobiyo̱ xi ko̱jo ndi̱ja̱a̱ ko̱jo ningoo̱ niꞌánkꞌasꞌiee̱n.

³² Kjiꞌanga sku̱i̱e̱ kui nii̱ xota̱ xi ndyi̱foaꞌatio kjo̱a̱ni̱ma̱a̱ achichí tsjá ka̱maa̱. ¡Jún xi ndyi̱mindyiséjnú Néná, ti̱ꞌanꞌniútakónjnú ini̱ma̱jnú!

³³ Ngatꞌa̱ Néná ntꞌiérií xota̱ xi ni̱ma̱ síndoo̱, ¡kó chꞌójín maá xota̱ na̱xi̱ńdá xí síndoꞌniuú!

³⁴ ¡Ti̱ꞌantsjàjnúu̱ jún nkꞌajmii̱ ko̱jo tꞌanangii̱! ¡Ti̱ꞌantsjàjnúu̱ jún ndáchíkoón, ko̱jo ngayeje ni xi tjín ngi̱jinjnú!

³⁵ Ngatꞌa̱ Néná boá xi kꞌo̱xiéꞌá na̱xi̱ńdá Sioo̱n, kó kuí boá xi sa̱ꞌíndaya nginí ndi̱yàtieé na̱xi̱ńdáꞌniuú nangi Jundáa̱. Kó ki̱a̱ kꞌuíndo, kó sa̱ꞌíntsi̱ꞌe̱.

³⁶ Xota̱ tji̱e̱e̱ xota̱ xi ki̱a̱ katsꞌénxátꞌaa̱ kui tsi̱ꞌe̱ ka̱ma, kó xota̱ na̱xi̱ńdá xí tjoó jaꞌée̱n, kuí boá xi ki̱a̱ kꞌuíndo.