Xo̱jo̱n Salmoo̱ 68 - Xo̱jo̱n eén Néná

Néná boá xi ngatsjéni̱xtjin tsꞌén

Só xi katsꞌénda Ndabii̱.

¹ ¡Ye ꞌne̱ Ne, ti̱sítji̱n ji, kó ti̱ꞌintsojoboe ji kondra̱a̱! ¡Ti̱ꞌin ji nga ko̱ngandikón ngindyikin ji, xota̱ xi chꞌoo̱ ji!

² ¡Ti̱ꞌin ji nga xcha̱ja ndo̱jò ndójo̱, xikótsꞌèn chaja ṉdi̱i̱ ¡Ngatjie xikó má tsꞌén fe ndo̱ꞌo̱si̱e̱én ngi̱jin ndiꞌií! Bo̱a̱ ngatamaa̱ xota̱ xi ꞌniú ndajiín ngindyi̱ko̱n Néná.

³ Ta̱nga tsjangatamaa̱ xota̱ xi kixi̱i̱, tsjangatamaa̱ ngindyi̱ko̱n Néná, ¡jo̱o̱n, nga kjínkꞌá má nga tsjangatamaa̱.

⁴ ¡Ndàjnúu̱ Néná! Ndàjnúu̱ salmo̱ nga si̱ꞌankjiejnú jaꞌeén. ¡Tꞌíjñandajnúu̱ ndi̱ya̱à kui xi fotsoꞌbásón nga̱són ṉdi̱i̱! ¡Kuí boá xi ꞌmí Néná! ¡Tsja ngatamajnú ngindyi̱ko̱n kui!

⁵ Néná boá xi na̱ꞌmii̱ xota̱ xi síndo xꞌi̱a̱a̱n, kó kuí boá xi koo̱n ínchjín kꞌán xi je jesón xi̱ꞌii̱n, kuí boá xi Néná ki̱a̱ Ndiꞌandikoón nínga tikón.

⁶ Kuí boá kui Néná xí tsjaá ngo ndiꞌa xota̱ xi tjimásoón, kó tsꞌéndé xota̱ xi síndo ndo̱bo̱a̱ya̱à, tsi̱ꞌe̱ nga nda ko̱e̱je̱e̱, ta̱nga xota̱ xi ntꞌiéꞌénjiín, ki̱a̱ ꞌbíndo soboá ki̱a̱ tꞌanangi kixií.

⁷ Ji Ne, kjiꞌanga kꞌintjée̱n xota̱ na̱xi̱ńdáa̱, kjiꞌanga kisꞌińtje̱ ji ki̱a̱ nangi kixií,

⁸ kó nga jáchí ji ki̱a̱ na̱xi̱ Sinaii̱, jatsié tꞌanangii̱, kó nkꞌajmii̱ katsꞌénkaꞌa stseé, ngindyi̱ko̱n Néná, kui xi Nee̱ xota̱ Israee̱l.

⁹ Ji Ne, jí boá xi achichí stsé kanangiye ji, kó katseꞌéngaꞌní nginíi̱ tꞌanangi xi ji katseꞌéjne̱.

¹⁰ Kó xota̱a̱ ki̱a̱ kisꞌińdo kui tꞌanangii̱, kui tꞌanangi xi ta̱ngatꞌanii̱ nga ndaxota̱ ji nga ikꞌíjñinde ji tsi̱ꞌe̱ xota̱ xi ni̱ma̱a̱.

¹¹ Ji Ne, kandokjo̱e̱ ji, kó achichí kjín mi̱ ínchjín xí katsóyà kuí eén:

¹² «¡Já ree̱ ko̱jo jájuún xi tsá xi boaꞌa ndyi̱monga!» Kó ínchjín xí kisꞌińdo ki̱a̱ ndiꞌaa̱, akjángá kjo̱a̱cho̱n xi jaꞌáxiín kondraa̱:

¹³ Tji̱e̱nga jún ki̱a̱ katsjayojoféjnú ki̱a̱ ngi̱jin ndi̱jo̱ na̱xi̱i̱, nga̱a̱ tójoo̱ to̱ntiboa kisꞌijon, kó to̱nsinié xi ꞌna̱a̱ kisꞌijon tsja̱nga̱a̱.

¹⁴ Kjiꞌanga Néná xí tsi̱ꞌe̱ ngayeje ngaꞌniuú tsangatji̱ngii̱ já ree̱, nchꞌàn ixó ki̱a̱ nangi soón na̱xi̱ Salmoo̱n.

¹⁵ Na̱xi̱i̱ Néná boá na̱xi̱ nangi Basaa̱n, achichí nkꞌa na̱xi̱i̱ nangi Basaa̱n.

¹⁶ Jún na̱xi̱ xi ꞌniú nkꞌa, ánní nga ma onkonjnú nga tsitsijenjnúu̱, kui na̱xi̱ xi Néná jè jaꞌájin, nga ki̱a̱ kꞌuijñá, ja̱koxi̱ boá nga Néná ki̱a̱ kꞌuijñá ngatsjéni̱xtjin.

¹⁷ Achichí kjín mi̱ tosena̱ ma karro̱ xi tsꞌénkjién Néná tsi̱ꞌe̱ kjo̱a̱xcha̱án, ndeskande ki̱a̱ na̱xi̱ Sinaii̱ ndibání Néná nga fí na̱ngo̱xi̱ ndikoón.

¹⁸ Kꞌinnijíngí ji nínga nkꞌaa̱, nga kꞌinje̱ ji xota̱ xi síndoꞌniuú, ki̱a̱ kachjábé jí kjo̱a̱tjó xi katsꞌénkꞌasꞌiee̱n xota̱ nga̱sondiee̱, kó ngaskande ko̱jo xota̱ xi kitikjo̱a̱a̱ katsꞌénkꞌasꞌiee̱n nga, kó ki̱a̱ kixindyinjìi̱n kui xotaa̱ ji Ne.

¹⁹ ¡Ngatamachikonñé Néná! ¡Néná xí ꞌboxiéꞌáná ndyiojón ndyiojón boaꞌanijín chꞌiàná!

²⁰ ¡Néná boá kui Néná xi ꞌboxiéꞌáná, kó kuí boá xi ꞌboxiéꞌáná ngi̱ya tsja kjo̱a̱bo̱yaa̱!

²¹ ¡Nga ja̱koxi̱ Néná boá xi sa̱ꞌínꞌoón to̱ko̱ xota̱ xi kondra̱a̱, kui to̱ko̱ tjen toko xota̱ xi ngatsjéni̱xtjin nga ndyi̱tsꞌènjeé!

²² Néná jè bi̱ katsó: «Án boá xi sa̱ꞌinkjindibáꞌóyá nginí an ndeskande nangi Basaa̱n, án boá xi sa̱ꞌinkjindibáꞌóyá nginí an ndeskande nínga na̱nga̱a̱ ndáchíkoón,

²³ tsi̱ꞌe̱ nga ndsa̱ki ji tsja̱jin jiín kondra̱a̱, kó ngaskande ńñáa̱ xto̱mójón kui jiín»

²⁴ ¡Jè ya xota̱ xi tjimátji̱ngii̱ ji Ne! Xota̱ xi tjimájo̱ Néna, kui xi rena, nga ndyi̱fí Ndiꞌandikoón.

²⁵ Xota̱ xi siee̱ boá xi tjimátjón, sꞌe̱ jaskan tjimá já xí tsꞌénkjánieé, ki̱a̱ ngi̱jii̱n ínchjín xo̱ngò xí tsꞌénkjánié panderoo̱.

²⁶ Nda ndókjo̱a̱jnú kjo̱a̱a̱ Néná ki̱a̱ ngi̱jii̱n xota̱ xi matikoó, ti̱ꞌantsjàjnúu̱ Néná jún xi xota̱ Israee̱l jún.

²⁷ Ki̱a̱ boá nínga tikón ngito̱ko̱ Benjaa̱, kui nda̱ xi chichí ngasee̱, ki̱a̱ nijan tikónjo̱ xota̱ xi ꞌniú yandikón xi chji̱a̱ni Jundáa̱, ko̱jo xi chji̱a̱ni Sabuloo̱n, ko̱jo xi chji̱a̱ni Neftalii̱!

²⁸ Nèe̱ jè akó ngaꞌniú xí tjiín, ¡Ji Ne, take ji nga bo̱a̱ kjiꞌi ni xi kiniꞌín ji ngi̱jinjne̱!

²⁹ Ji Ne, ta̱ngatꞌanii̱ na̱ngo̱xi̱i̱ xi tikón ki̱a̱ na̱xi̱ńdáꞌniú Jerusale̱n, nga já ree̱ kjo̱chójoo̱ ni xi tsjakon.

³⁰ Ti̱ꞌinxchínje̱ ji kui xota̱ xi xikó maá cho̱ tamá xí síndo ngi̱ndyió na̱xi̱i̱, kui xi xikó maá ngo xtín cho̱yojo toro̱, ko̱jo ndií cho̱yojo xi tsi̱ꞌe̱ na̱xi̱ńdaá, kui xi ndyi̱tsjánié to̱ntiboaa̱. ¡Ti̱ꞌintsojoboe ji xota̱ na̱xi̱ńdá xí achichí tsjá maá nga kjaán!

³¹ Nangi Ejipto̱ kji̱ndi̱báni xota̱ xi tjiín xaá, kó nangi Etiopía̱ achichí tsá tsja̱á tsja Néná.

³² Ngayeje jún xota̱ xi tꞌanangii̱ ndokjo̱a̱nijnú, ¡ndàjnúu̱ Néná! ¡Ndàjnúu̱ salmo̱ Néná!

³³ Kui xi fotsoꞌbásón nga̱soón nkꞌajmii̱, ndeskande ni̱xtjin xcháján, ¡tsitsíjenjnúu̱ kuí boá xi chji̱a̱, kó ꞌniú ndaꞌyaá nda̱a̱!

³⁴ ¡Ti̱ꞌankiejnú yojojnú kjo̱a̱a̱ ngaꞌniú xí tjiín Néná! Nga̱soón na̱xi̱ńdá Israee̱l ka̱ma xcha̱ kjo̱a̱yandikoón, kó ka̱ma xcha̱ ngaꞌniuú ki̱a̱ nkꞌajmii̱.

³⁵ Ji Ne, ¡Achichí je yaa̱ nga tindyin ji ndiꞌandikóo̱n! Néná xí tsi̱ꞌe̱ xota̱ Israee̱l kuí boá xi tsjaá ngaꞌniú xota̱ na̱xi̱ńdaá. ¡Ngatamachikonñé Néná!