Xo̱jo̱n Salmoo̱ 66 - Xo̱jo̱n eén Néná

Si̱ꞌantsjàa̱ Néná kjo̱a̱a̱ ni xi fíndikónná xi katsꞌén

Só.

¹ ¡Chaꞌayàmájnú nga tsja ngatamajnú kjo̱a̱a̱ Néná ngayeje kui nga̱sondiee̱!

² ¡Ndàjnúu̱ salmo̱ kjo̱a̱a̱ kjo̱a̱je xi tjiín jaꞌeén! ¡Te̱ꞌéjnúu̱ kjo̱a̱je nga ko̱ndájnúu̱!

³ Bi̱ tꞌínjnúu̱ Néná: ¡Achichí fíndikónná ngayeje ni xi je kiniꞌínde ji! Ta̱ngatꞌanii̱ nga tsie ngaꞌniú xí tjiín, kuíni nga kondra̱a̱ ki̱a̱ kꞌuíndo ngindie ndsa̱ki ji.

⁴ ¡Ngayeje xota̱ nga̱sondiee̱ ko̱siéntikoó ngindyikin ji, kó sa̱ꞌíntsjaá nga si̱eé só! ¡Si̱eé salmo̱ ta̱ngatꞌanii̱ jaꞌée̱n!

⁵ ¡Ndibájnú kó tꞌíndikónjnú ni xi je katsꞌén Néná! ¡Achichí fíndikónná ni xi katsꞌén ngandaa̱ xota̱ nga̱sondiee̱!

⁶ Ndáchíkoón tꞌanangi kixí katsꞌén, kó xotaa̱ jaꞌayise nga jaꞌaxtikjá ndejeèꞌ. ¡Ki̱a̱ boá nínga tsja kamáná kjo̱a̱a̱ ngayeje ni katsꞌén kuí!

⁷ Ta̱ngatꞌanii̱ ngaꞌniú xí tjiín, nga kuí boá xi botixómáná ngatsjéni̱xtjin. Kui boá xi konda ngayeje na̱xi̱ńdaá. Ngata̱ nkꞌajín ꞌboxié yojoo̱ xota̱ xi kitikjo̱a̱a̱.

⁸ Ngayeje jún xota̱ na̱xi̱ńdá, ¡nda ndókjo̱a̱jnú kjo̱a̱a̱ Néná! ¡Te̱ꞌéndièjnú nga ko̱nda̱ꞌyaá só xi niꞌántsjájnúu̱ kui!

⁹ Néná boá xi katsjáná nga tindyión nga̱sondie, ¡kó tsjandièjín nga mongajon ndsa̱kó!

¹⁰ Ji Ne, jí boá xi kachjatꞌayékínjne̱, kó bo̱a̱ kiniꞌínje̱jne̱ xikoó to̱ntiboaa̱ nga ndiꞌí niꞌántsjieni.

¹¹ Katseꞌéndiè ji nga ikixóyájne̱ chja̱ya̱a̱, kó achichí é kamá ni xi ikꞌíjñisén ji nga̱xtonjne̱.

¹² ¡Katseꞌéndiè ji nga kjín ndi̱je̱ katsjánié tokojne̱! Ikitjajinjne̱ ndiꞌí, ikitjaxtíkjájne̱ ndáfoa, sꞌe̱ jaskan kꞌinje̱jne̱ ngi̱ndie nínga tsie nichinie tjiín.

¹³ Kꞌosꞌi̱e̱n an ki̱a̱ na̱ngo̱xi̱i̱ nga kjóchojo̱ an kjo̱a̱tjó xi ndikón nganda tse̱, kó bo̱a̱ tsꞌén kꞌuichjií ni xi kixiyatjoón,

¹⁴ kui ni xi tsíchji̱a̱ ndso̱ꞌba án kjiꞌanga nda̱ kamána.

¹⁵ Cho̱yojo toro̱ xi ꞌniú yiꞌii̱ boá xi kjóchojo̱ an nga sa̱ꞌinkꞌasꞌiee̱n kjo̱a̱tjó, ko̱jo cho̱tsa̱nga̱ xi jaꞌatji ndi̱ja̱a̱ nijan kꞌuítií, sa̱ꞌinkjiesoón cho̱yojo xi̱ꞌin, ko̱jo tindso̱ xi̱ꞌin nga.

¹⁶ Ndibájnú, kó ndaꞌyájnú, jún xi yandikónjnú Néná, kó xiyàjnúꞌun ni xi katsꞌénjo̱na Néná.

¹⁷ Ndso̱ꞌba án boá xi katsꞌenkjién án nga tsíchji̱a̱a̱ kui, kó najén án boá xi katsꞌentsjàa̱ jaꞌeén.

¹⁸ Tsi ndajínkjiꞌi ni xi kisꞌijñajii̱n ini̱ma̱na, nde tsintꞌiéjínrana Néná,

¹⁹ ¡ta̱nga Néná tsintꞌiéna, kó katsꞌénsénna nga ni̱ma̱ kixian an nga tsíchji̱a̱a̱!

²⁰ ¡Ngatamachikonñé Néná, ngatꞌa̱ tsaꞌaxki̱ kjiꞌanga tsíchji̱a̱a̱, kó ni̱ma̱ kamaá an!