Xo̱jo̱n Salmoo̱ 65 - Xo̱jo̱n eén Néná

Néná achichí kjo̱a̱niꞌánchikonñé tsjáná

Só xi katsꞌénda Ndabii̱.

¹ Ji Ne, to̱kó si̱ꞌantsjaàri ji ki̱a̱ na̱xi̱ Sioo̱n, jí boá xi kꞌuíchjií ni xi tjiꞌmíyatjón nga si̱ꞌankjatjosoón.

² Jí xi ndaꞌyé ji nga ndokjo̱a̱jne̱: Jí boá xi ko̱e̱je̱koo̱n ngayeje xota̱ nga̱sondiee̱.

³ Jéjne̱ boá xi mejeén botixómájne̱, ta̱nga jí boá xi niꞌínjetakínjne̱.

⁴ ¡Achichí kjo̱a̱niꞌánchikonñé sakoó kui xota̱ xi ki̱a̱ tiña síndotꞌaa̱, kui xi ti̱ ki̱a̱ síndo na̱ngo̱xi̱i̱ nga! Achichí nda tsiejne̱ kjo̱a̱a̱ kui nichinie xi ji nangiyejne̱.

⁵ Ji Ne xi ꞌnaxiéꞌéjne̱, jí boá xi niꞌínsénjne̱ nga ji̱n xi niꞌánjne̱. Xota̱ xi síndo nangi nínga kjii̱n, jí boá xi kjimaꞌniátakoón. Bo̱a̱ tsꞌén xota̱ xi síndo ngaskande nínga fetꞌanii̱ ndáchíkoón.

⁶ Jí xí kiniꞌínkjín jí ngaꞌniúu̱, nga kiniꞌínde ji na̱xi̱i̱.

⁷ Kiniꞌínkꞌíxí ji nga fonie ndáchíkoón, kiniꞌínkꞌíxí ji nga fonie ngaꞌniuú, kó ti̱ kiniꞌínkꞌíxí ji nga mindyikján xota̱ na̱xi̱ńdaá.

⁸ Xota̱ na̱xi̱ńdá xí kjin síndoo̱, ngaskande fotsié ndikón má nga be kjo̱a̱ndikón yiꞌi xi kiniꞌín ji, ndeskande nínga fotjo tsꞌueé, kó ngaskande nínga ꞌbosꞌien, niꞌín ji nga xotaa̱, ngaskande kjandayà má nga tsja maa̱.

^9-10 Jí boá xi tichìi̱n tꞌanangii̱: achichí tsie ndáfoa niꞌínkꞌandyi̱ni ji, kó bosíndée̱ nínga kjiꞌi ni tjieé, tsi̱ꞌe̱ nga kjín to tsja̱á. Stseé boá xi mindyiekaxeni ji tꞌanangii̱, kó ꞌbíjñinde ji tsi̱ꞌe̱ nga sitji̱e̱ ni. ꞌBíkitsieni ji ndáfoa xo̱ngàndántꞌié xi yiꞌii̱, kó jí boá xi niꞌínkjatje ngasèe̱ tjia yaá. Kó bo̱a̱ tsꞌén ꞌbíjñinde ji kꞌijñaá, tsi̱ꞌe̱ nga ngayejejne̱ kꞌuiéjne̱ to ndso̱ko̱a̱n ṉño̱pan.

¹¹ Ngije ma kjie noó, jè tjikítsienii̱ kjo̱a̱niꞌánchikonñé, ta̱ nínga tibitje jí tsie ni xi machjién tiꞌbíjñí ji.

¹² Ki̱a̱ nangi kixií, ata̱ tsjákón ndi̱xcho̱o̱, kó nínga tji̱ngi̱i̱ achichí tsjá maá,

¹³ nínga tji̱ngi̱i̱ sꞌikitsie maá cho̱tsa̱nga̱, kó nínga soón sꞌikitsie maá xka̱a̱ to ndso̱ko̱a̱n ṉño̱pan. ¡Ngayeje xotaa̱ sie, kó kjandayà má nga tsja maa̱!