Xo̱jo̱n Salmoo̱ 64 - Xo̱jo̱n eén Néná

Ni xi ka̱maa̱ xota̱ xi ꞌniú ndajiín

Só xi katsꞌénda Ndabii̱.

¹ Ji Ne, ¡ndaꞌyé ji nga ni̱ma̱ xián án nga kuichjiaá! ¡Chíi̱n kjo̱a̱mindyionna kjo̱a̱a̱ kui kondra̱ xi mindyiandíkoón!

² Tꞌíjñiꞌmíní kjo̱a̱a̱ kui ni ꞌma xi ndyi̱ꞌbínda xota̱ xi ꞌniú ndajiín, ko̱jo kjo̱a̱a̱ kui xtín xota̱ xi achichí nga ndajiín,

³ kui xi xikoó tsi tsꞌényojó na̱je̱n xikó maá ki̱cha̱ndojó xi ꞌniú yojó, kó tsꞌénkjién xikoó yáyojó xi ndikimaya tjiín,

⁴ kó ꞌbíndoꞌmá nga kjinií yáyojoó xota̱ xi jmí jéjiín, ¡jmí ni tsakjónjín má, ti̱nde jmíjín xi tsakjoón nga tsꞌén kuí nii̱!

⁵ Kjiꞌanga ꞌbínda ni xi ndajiín, ja̱kꞌi̱e̱ ja̱ngaján tsjangaꞌniuú xkjín, ꞌbínda ꞌmá nga ꞌbíndo chja̱ya̱, kó bi̱ tsó: ꞌYá xí sku̱i̱e̱ kui nii̱.

⁶ Ni xi ꞌniú ndajín ꞌbínda, kó bi̱ tsó: Jè kamándo̱joná nga nda je ikꞌínda ngo ni. Kó ni xi ꞌniú tjiꞌmaá kjo̱a̱niꞌánkjoó nga ngo nga ngo, je tjítsꞌénkjátsón ngaskande nínga ꞌniú na̱nga̱a̱ ini̱ma̱a̱.

⁷ Ta̱nga Néná ngo yáyojó ko̱sieén: Kó ta̱niján má nga ka̱maꞌoo̱n,

⁸ kó ti̱ kuii̱ na̱je̱n sti̱ngí: kó xota̱ xi sku̱i̱e̱, achichí stsa̱kjonní.

⁹ Kó ngayeje xota̱ nga̱sondiee̱ stsa̱kjonní, kósꞌe̱ kjiꞌá boá nga ku̱i̱chji̱a̱ kjo̱a̱a̱ ni xi je katsꞌén Néná, kó ka̱makjiín kui nii̱.

¹⁰ ¡Xota̱ xi kixi̱i̱ tsja ka̱maa̱ kjo̱a̱a̱ Néná, kó ko̱ngase nga Néná skoón! ¡Kó ngayeje xota̱ xi kixi̱ síndo ini̱ma̱a̱, Néná tsja̱á kjo̱a̱je!