Xo̱jo̱n Salmoo̱ 63 - Xo̱jo̱n eén Néná

Kjo̱a̱tjóo̱ chjí ngasenii̱ ta̱bo̱a̱jiín kjo̱a̱mindyioo̱n

Ndabii̱ boá xi katsꞌénda kui soó, kjiꞌanga kisꞌijña ki̱a̱ nangi kixií nangi Jundáa̱.

¹ Ji Ne, jí boá xi Néna ma ji. Achichí nda̱ kjimana nga kongasee ji, kjiꞌmeyà má an kjo̱a̱a̱ ji, kó ini̱ma̱na mejeén sku̱i̱e̱e̱, bo̱a̱ má mána xikoó ngo xi mongase ndáfoa ki̱a̱ nangi xi sibé ko̱jo xi kixií, kó sakójiín.

² ¡Bo̱a̱ tsꞌén je tsangasee̱ ki̱a̱ ndiꞌandikóo̱n, tsi̱ꞌe̱ nga skuie an ngaꞌniúu̱ ko̱jo kjo̱a̱jèe̱!

³ Ngatꞌa̱ kjo̱a̱ni̱ma̱takóo̱n nda ngase, ta̱bo̱a̱jiín kjo̱a̱mindyioo̱n. Ndso̱ꞌba án boá xi si̱eé nga sa̱ꞌíntsjaá.

⁴ ¡Nda kuichjiá an kjo̱a̱a̱ ji, tji̱e̱nga tikòn an nga̱sondie! ¡Ta̱ngatꞌanii̱ jaꞌée̱n nga skjininkꞌa an ndsa̱ án nga sa̱ꞌintsjaá!

⁵ ¡Nda stsi̱e̱é ini̱ma̱na xikó maá tsi yojo ko̱jo tsi xinié jè iskjinie! ¡Kó ndso̱ꞌba án achichí tsjá ka̱maa̱ nga sa̱ꞌíntsjaá!

⁶ Kjiꞌanga je kjiꞌijña an, kó foaꞌátsjienna ji, jí boá xi tsꞌenkjoó nga ngo ni̱xtji̱e̱e̱n.

⁷ ¡Ngatꞌa̱ jí boá xi bosíke̱jení! ¡Kó achichí tsjá mána nga sie an, ngatꞌa̱ ngindie tji̱nkꞌi̱e̱én nga̱a̱ tikón an!

⁸ ¡Ini̱ma̱na tsꞌentíñatꞌaa̱ ji, kó ki̱a̱ fítji̱ngii̱, ndse̱ xi kixi̱i̱ boá xi ꞌniú kjiꞌiꞌniuú an!

⁹ Ta̱nga kui xi ndyi̱mongase ini̱ma̱na tsi̱ꞌe̱ nga sa̱ꞌínkꞌiénna, ki̱a̱ ko̱e̱je̱ ti̱xa̱ xi ꞌniú na̱nga̱a̱ tꞌanangii̱.

¹⁰ ¡Ki̱cha̱ndojó si̱ꞌankjién nga ka̱majeé, kó yojo xi kjinie cho̱ chakaa̱l ka̱ma!

¹¹ Ta̱nga nda̱ ree̱ achichí tsjá ka̱maa̱ nga sa̱ꞌíntsjaá Néná, kó si̱ꞌandikón boá ta̱ꞌyaní xi jaꞌeén Néná ku̱i̱ꞌangini ngo ni, ta̱nga xota̱ xi ndisoo̱, kjókjo tsꞌoa.