Xo̱jo̱n Salmoo̱ 62 - Xo̱jo̱n eén Néná

Tsi Néná tikónjo̱na jmíni̱xtjin si̱ꞌanchajana

Só xi katsꞌénda Ndabii̱, xi kiniꞌándaa̱ Jendutuu̱n.

¹ Ta̱kuítsí Néná xí tsjaá kjo̱a̱xió ini̱ma̱na, ta̱kuítsí bo̱a̱ xi maa̱ ꞌboxiéꞌána,

² ta̱kuítsí Néná xi ndi̱jo̱ jena ko̱jo xi ꞌboxiéꞌána, kuí boá xi konna, kó ko̱ngajonjín an.

³ Ngayeje jún, ngaskande kjiꞌání nga to̱kó ku̱i̱xkánjo̱rajnú ngo nda̱, tsi̱ꞌe̱ nga ku̱i̱chíjmijnú xikoó ngo xó, ko̱jo tsi xikoó ngo nchꞌoá xí jè kjifítikjá.

⁴ Ta̱soboá ndyi̱niꞌánkjójnú nga mejénjnú ku̱i̱chíjmingíjnú ki̱a̱ ngi̱ndie nínga tikón, achichí tsjá májnú nga ꞌbíndisójnú, ndso̱ꞌbájnú tsꞌénchíkonñé, ta̱nga ngi̱jii̱n ini̱ma̱jnú, ni xi ꞌniú ndajín sꞌijii̱n.

⁵ Ta̱kuítsí Néná xí tsjaá kjo̱a̱xió ini̱ma̱na, ngatꞌa̱ ta̱kuítsí bo̱a̱ xi tsjána kjo̱a̱chiyá.

⁶ Ta̱kuítsí Néná xí ndi̱jo̱ jena, ko̱jo xi maa̱ ꞌboxiéꞌána, kuí boá xi konna, kó ko̱ngajonjín an.

⁷ Néná boá xi ꞌboxiéꞌána, kó kuí boá xi kjo̱a̱jena, Néná boá kui ndi̱jo̱je nínga botíjña̱ ꞌma an, Néná boá xi konna.

⁸ Jún xota̱ na̱xi̱ńdá, ¡ngatsjéni̱xtjin ngatama ꞌniátakónjnú Néná! Tꞌíyájnú ngindyi̱ko̱n kui ngayeje ni xi tjíjin ini̱ma̱jnú. ¡Néná boá xi kónná!

⁹ Ta̱kjo̱a̱ndaní bo̱a̱ xota̱ nga̱sondie xi ta̱chiboaa̱, kó kjo̱a̱ndiso boá xota̱ xi ngito̱ko̱o̱, tsi ngo nisochi̱bo̱a̱ xꞌi̱chi̱bo̱a̱ni nga joó, é ka̱ma, ta̱nga nga ja̱koxi̱ xtja̱ ngase ta̱bo̱a̱jiín ngo tjo̱.

¹⁰ Ngata̱ ki̱a̱jín maꞌniátakónjnú ni xi ꞌniú ndajiín, ti̱nde ngata̱ ꞌbejínjnú kjo̱a̱chiyá kjo̱a̱a̱ kjo̱a̱chejeé, ndatsi ka̱matsie ngase kjo̱a̱cho̱njnú, nga ki̱a̱jín ꞌbíjñajnú ini̱ma̱jnú.

¹¹ Ngo ndi̱yà je tsíchji̱a̱ Néná, kó jó ndi̱yà jè tsintꞌie an kui nii̱: «Néná boá xi tikoón ngaꞌniuú.»

¹² Jí boá xi tjiín kjo̱a̱ni̱ma̱takón ji Ne, ngatꞌa̱ jí boá xi boeꞌée̱ chjí xí tsoboaá nga ngo nga ngo xotaa̱, kjo̱a̱a̱ ni xi katsꞌén.